تانىستىرىلىم بارىسىندا تەڭگەنىڭ مۇنداي ءتۇرىنىڭ ەكونوميكالىق ديزاينى ونى تولەم قۇرالىنا اينالدىرۋعا جانە بانكتىك شوتتار مەن دەپوزيتتەردەن وتىمدىلىكتى شەكتەپ تاستاماۋعا ارنالعانىنا نازار اۋداردىق. وسىعان دەيىن تسيفرلى تەڭگەدە سىياقى ەسەپتەۋ ارقىلى ۇب وزگە تولەمدەر اراسىندا باسەكەلەستىك تۋدىرادى دەگەن پىكىر باسىم بولعان. بىراق ۇب-نىڭ دەگەنى باسقاشا ەكەن. ولار باسەكە ەمەس, تولەم تۇرلەرىن ءارتاراپتاندىرۋدى قالايدى.
بۇل رەتتە ۇلتتىق بانك تست ارقىلى تاۋەكەلدەردى تەجەپ وتىرعىسى كەلەتىنىن بايقاتقان. تاراتىپ ايتساق, تست ارقىلى ارەكەتتەردى باقىلاۋ قۇرالدارى قوسىلادى. بۇل تەتىك جەكە دەرەكتەردى باقىلاۋدى ۇب-عا ەمەس, تۇتىنۋشىنىڭ وزىنە بەرەدى. سايىپ كەلگەندە تست-دەگى قوسىمشالار تسيفرلىق اكتيۆتەردى توكەندەۋ مەن دامىتۋعا دايىن بولۋعا باعىتتالىپ وتىر.
ۇب-نىڭ مالىمدەۋىنشە, قاناتقاقتى جوبانى سىناۋ كەزىندە بەس نۇسقا زەرتتەلىپتى. ءبىرىنشى كەزەكتە ونىڭ سىرتقى ديزاينىنا ءمان بەرىلگەن. بۇل جاعدايدا قولما-قول اقشا دەپوزيت, تولەم كارتاسى نەمەسە ءموبيلدى قوسىمشا رەتىندە قابىلدانادى. بازالىق نۇسقانىڭ جوباسى ونىڭ قولما-قول اقشاعا ۇقساس ەكەنىن الدىن-الا بولجاپ وتىر. ەكىنشى جاعىنان, تست ۇلتتىق بانككە ەكونوميكالىق ۇدەرىستەرگە ولاردى شىعارۋ جانە اينالىمنان شىعارۋ ارقىلى اسەر ەتۋگە مۇمكىندىك بەرەدى. ۇلتتىق بانك بازالىق مولشەرلەمەنى وزگەرتكەن كەزدە قولما-قول اقشا مەن تست-نى ءوزارا تولىقتىرىلۋىنا بايلانىستى وتىمدىلىك مولشەرى وزگەرەدى. بۇل ءوز كەزەگىندە ىشكى جالپى ءونىم مەن ينفلياتسياعا اسەر ەتەدى.
قارجىنىڭ مۇنداي ءتۇرى اقشا-نەسيە رەتتەۋشىسىنە قارجى سەكتورىن دامىتۋعا دا ارتىقشىلىقتار بەرەدى دەگەن ءۇمىت بار. بىرىنشىدەن, ول قولما-قول اقشاسىز تولەمدەردى, اسىرەسە ينتەرنەتكە قولجەتىمدىلىگى شەكتەۋلى جەرلەردە قولجەتىمدى ەتەدى. ەكىنشىدەن, بيۋدجەت قاراجاتىنىڭ ماقساتتى جۇمسالۋىنىڭ اشىقتىعى ارتادى. وسىلايشا, قاناتقاقتى شارا اياسىندا ۇلتتىق بانك بەلگىلى ءبىر تاۋارلارعا جۇمساۋعا بولاتىن ارنايى ماقساتتاعى توكەندەردىڭ باعدارلامالانۋ مۇمكىندىگىن سىناقتان وتكەرىپ, باقىلاۋعا بولاتىنىن دالەلدەپ بەردى.
ۇلتتىق بانكتىڭ پىكىرىنشە, تست تسيفرلىق تەڭسىزدىكتى جويۋدىڭ نەگىزگى قۇرالدارىنىڭ بىرىنە اينالۋى مۇمكىن. ەكى دەڭگەيلى تست پلاتفورماسىن ىسكە اسىرۋ مودەلى ەكىنشى دەڭگەيلى بانكتەردى وسى جوباعا قاتىسۋدىڭ يننوۆاتسيالىق نۇسقاسىن ازىرلەۋگە ىنتالاندىرۋ ءۇشىن عانا ەمەس, سونىمەن بىرگە بولاشاقتا ەكوجۇيەنى قۇرۋدىڭ نەگىزگى درايۆەرى بولۋ جانە تولەم قىزمەتتەرىن جەتكىزۋشىلەر نارىعىن قالىپتاستىرۋ ءۇشىن ازىرلەنگەن. قارجىگەرلەردiڭ ح سەزiندە ۇلتتىق بانكتiڭ وكiلi كوپدەڭگەيلى تولەم جۇيەسىن جاڭعىرتۋ مودەلى ءبىر باعىتتا جۇرەتىنىن ايتقان بولاتىن. بولاشاقتا QR-تولەمدەرىن ەنگىزۋ جوسپارلانۋدا, بۇل نارىققا قاتىسۋشىلاردى ءوز قىزمەتتەرىن دامىتۋعا جانە ءوز ينفراقۇرىلىمى اياسىندا جوعارىدا ايتىپ وتكەن تولەم جۇيەسىن جاڭعىرتۋدى ىلگەرىلەتۋگە جول اشادى.
ەكىنشى دەڭگەيلى بانكتەردە تست ەنگىزۋ ولاردىڭ قىزمەتىنە ەكىۇشتى اسەر ەتۋى مۇمكىن دەگەن قاۋىپ بار. سەبەبى تست بانكتەردەن قاراجاتتىڭ سىرتقا كەتۋىنە جول اشادى دەگەن پىكىرلەر وسىعان دەيىن ايتىلعان. مۇنداي جاعداي ۇب-نىڭ سىرتقى بەدەلىنە كەرى اسەر ەتەتىنى بەلگىلى. دەمەك بۇل ۇب ءۇشىن شىنداپ ويلاناتىن ماسەلە. الايدا IT ماماندارى تست-نىڭ سىرتقا كەتۋىن تەجەيتىن تەتىكتەر قازىردىڭ وزىندە قولجەتىمدى ەكەنىن ايتىپ وتىر.
قارجى سەگمەنتىندە ۇلكەن وزگەرىستەر كەڭىستىكتەگى جاڭا ويىنشىلار – فينتەح كومپانيالارىنىڭ بەتالىسىنا قاراپ انىقتالادى. قازىر بانكتەردەگى تسيفرلانۋ دەڭگەيى – شامامەن 90 پايىز. حالىقارالىق تاجىريبەدە 90 پايىزدىق كورسەتكىش عانا تست-ءنى ءۇشىنشى تولەم ءتۇرى رەتىندە قولدانۋعا مۇمكىندىك بەرەدى.
جالپى, ورتالىق بانكتەر ءۇشىن تسيفرلىق ورتا قارجى نارىعىن دامىتۋ مەن باقىلاۋدىڭ نەگىزگى قۇرالىنا اينالۋدا. بۇكىل الەم بويىنشا ورتالىق بانكتەردىڭ قىزىعۋشىلىقتارى تەوريالىق تالقىلاۋدان قاناتقاقتى جوبالاردى جۇزەگە اسىرۋعا جىلدام ءوتىپ جاتىر. دەمەك مۇنىڭ ءبارى قارجى سەكتورىنىڭ دامۋىن تست-مەن بايلانىستىرىپ قاراۋدىڭ دۇرىستىعىن نەگىزدەيدى.
الماتى
