21 اقپان – حالىقارالىق انا ءتىلى كۇنى قارساڭىندا قازاقستاننىڭ ۇلىبريتانياداعى ەلشىلىگىنىڭ ۇيىمداستىرۋىمەن اسەرلى كەش ءوتتى. وعان «ديماش قۇدايبەرگەن. ۇلىبريتانيا جانە دۇنيەجۇزى» فان-كلۋبىنىڭ بەلسەندى مۇشەلەرى قاتىستى. ۇلتى باسقا, ءتىلى بولەك ءار جانكۇيەردى دارا داۋىستى ديماشتىڭ ونەر الەمىندەگى بەدەلى ءبىر اراعا توعىستىردى. انا تىلىمىزگە قۇرمەت ءبىلدىرىپ, ۇيرەنۋگە ىنتىققان اعىلشىنداردىڭ اراسىندا بۇرىن قازاقستانعا ساياحاتتاپ كەلگەندەرى دە بار. ولار ءبىزدىڭ باي مادەنيەتىمىزدەن, سالت-داستۇرلەرىمىزدەن جانە ۇلتتىق تاعامدارىمىزدان دا حاباردار ەكەن.
– مەن نەگىزى بالا كۇتىمى بويىنشا كوللەدج ستۋدەنتتەرىنە لەكتسيا وقيمىن. فان-كلۋبىمىزدى 2022 جىلدىڭ تامىزىندا اشتىق, بار بولعانى 6 اي ءوتتى. كۇنى كەشە 1 مىڭىنشى مۇشەمىز قاتارىمىزعا قوسىلىپ, قاتتى قۋاندىق, – دەيدى فان-كلۋب توراعاسى دجيلل بيچەم.
ەلشىلىكتىڭ ۇيىمداستىرۋىمەن وتكەن قازاقشا كۋرستى «حابار 24» ارناسىنىڭ لوندونداعى ءتىلشىسى عالىمجان قارامان ۇلىنىڭ قىزى كاۋسار جۇرگىزەدى. قازاق, اعىلشىن تىلدەرىنە جەتىك كاۋسار بۇعان دەيىن «بالاپان» تەلەارناسىندا بالالارعا اعىلشىنشا ۇيرەتىپ, تاجىريبە جيناقتاعان. ەندى, مىنە, ۇلتتىق كيىم كيىپ, بريتانيالىقتارعا قازاق ءتىلىنىڭ عاجاپتىعىن تانىتۋدا.
«قۇلاعىمداعى سىرعا مەن موينىمداعى القانى الماتىعا ديماشتىڭ كونتسەرتىنە بارعاندا ساتىپ الدىم. تەرەزا قۇربىم ەكەۋمىز كولگە باردىق, شاتقالداردى دا كوردىك. وتە تاماشا ۋاقىت وتكىزدىك», دەيدى فان-كلۋب مۇشەسى لۋاننا كيپينگ. «مەن قازاقشا سالەمدەسىپ, جاعداي سۇراي الامىن. ءوزىمدى تانىستىرا الامىن», دەيدى ءتىل ۇيرەنۋشى كريستينا برەين.
قازاق مادەنيەتىنە, تىلىنە ءتانتى بولعان اعىلشىندار وسىلاي اقجارما تىلەكتەرىن ءبىلدىرىپ, كىشكەنتاي جەتەكشىلەرىنە العىس ايتىپ جاتقانى ءبىز ءۇشىن ءسۇيىنىش. تەرەزا نەۆەس ەسىمدى قالا تۇرعىنى: ء«بىز وسى فان-كلۋبقا مۇشە بولعانىمىزعا قۋانامىز. ديماش بارلىعىمىزدى ۇلكەن شاڭىراق استىندا بىرىكتىردى. ءبىز ۇيىعان ءبىر وتباسىندايمىز», دەگەن ويىن جەتكىزدى.
اتالعان شارا اياسىندا حالىقارالىق فان-كلۋب مۇشەلەرى قايىرىمدىلىق شاراسىن دا وتكىزىپ, قازاقستانداعى «SOS بالالار اۋىلى» ۇكىمەتتىك ەمەس ۇيىمىنا قاراجات جيناپ بەردى. جينالعان اقشاعا جەتىم نەمەسە اتا-اناسىنىڭ قاراۋىنسىز قالعان بالالار مۋزىكالىق اسپاپتار ساتىپ الا الادى. قازاقتىڭ ءداستۇرلى دومبىراسىندا ويناپ ۇيرەنۋگە مۇمكىندىك الادى.
– ءبىز ازىرگە 1 ملن تەڭگە جينادىق. ناۋقان ءالى دە جالعاسىپ جاتىر. بۇل سوما ەسەلەنە تۇسەدى دەپ سەنەمىز. بىرقاتار جوسپارىمىز دا بار. الداعى ۋاقىتتا «SOS بالالار اۋىلىنىڭ» تاربيەلەنۋشىلەرىنە ونلاين پلاتفورما ارقىلى اعىلشىن ءتىلىن ۇيرەتكىمىز كەلەدى. سونداي-اق سول اۋىلعا بارىپ وقىتاتىن مۇعالىمدەرگە اقشا تولەۋ دە ويىمىزدا بار, – دەيدى دجيلل بيچەم.
حالىقارالىق انا ءتىلى كۇنى قارساڭىندا وتكەن كەشتە ءتۇرلى ۇلت وكىلدەرى ءوز تىلدەرىندە ولەڭدەر وقىدى. سوسىن ولار ءانشى ديماشتىڭ شىعارماشىلىعىنا قاتىستى تانىمدىق سۇراقتارعا جارىسا جاۋاپ بەرىپ, ونىڭ رەپەرتۋارىنداعى قازاقشا اندەردى ورىندادى.
