ەسكە سالساق, بىلتىر اتالعان ونەر ۇجىمىندا «ارت-سپورت» پورتالىنىڭ قىزمەتى شەڭبەرىندە «كەسكىندەمە», «قۇراق قۇراۋ», «كيىم ۇلگىلەۋ, ءپىشۋ جانە تىگۋ», «اعاشقا ورنەك سالۋ» سەكىلدى ءتۇرلى باعىتتاردا بالالارعا ارنالعان شىعارماشىلىق ۇيىرمەلەر اشىلعان بولاتىن. ءارتۇرلى جاستاعى وقۋشىلار بىلىكتى ۇستازدار وتكىزەتىن ساباقتارعا قۋانا قاتىسىپ, تەاتردىڭ اتموسفەراسىن سەزىنىپ ءجۇر. ءتىپتى كەيبىرەۋى قولونەرشى-ۇستازدارىنىڭ ءىسىن جالعاستىرۋدى ۇيعارعان. وسىناۋ ۋاقىت ىشىندە بالالار ءوز جۇمىستارى قويىلعان بىرنەشە كورمەگە قاتىستى.
– قىزىم «ارت-سپورت» باعدارلاماسى اياسىندا «كيىم ۇلگىلەۋ, ءپىشۋ جانە تىگۋ» سەكتسياسىنا ءبىر جىلدان استام ۋاقىت بارىپ ءجۇر. ول ساباقتارعا ۇيىرمە اشىلعان بويدا قاتىسا باستادى, سوندىقتان ءبىز وقۋدى باستاۋ ءۇشىن ۇجىمنىڭ, ماتەريالدىق بازانىڭ قالاي دايىندالعانىن بىلەمىز. بارلىعى جوعارى دەڭگەيدە بولدى. بالالار جاڭا تىگىن قۇرالىمەن جابدىقتالعان كەڭ ءارى جارىق كابينەتتە دايىندالادى. ءپىشۋ مەن تىگۋگە قاجەتتى زاتتارمەن تەاتر قامتاماسىز ەتەدى. بالالار تىگىن ماشيناسىمەن, تورلاعىشپەن جۇمىس ىستەۋدى, قولمەن تىگۋ تەحنيكاسىن مەڭگەردى. ۇيدە وزدەرى جاساعان ويىنشىقتار, بۇيىمدار توپتاماسى كوبەيىپ كەلەدى, ازداپ كيىم-كەشەك تە تىگەدى, – دەدى ءۇمىت ماعزۇموۆا.
بۇدان بولەك ۇيىرمەگە قاتىسۋشىلار وپەرا مەن بالەت سپەكتاكلدەرىنە دايىندىق بارىسىن, ارتىستەردىڭ گريم جاسايتىن, كيىنەتىن بولمەلەرىن كورىپ, كوستيۋمدەردىڭ تاريحىمەن تانىسادى.
بىلتىر مەملەكەتتىك شىعارماشىلىق جانە سپورتتىق تاپسىرىستاردى جان باسىنا قارجىلاندىرۋ پلاتفورماسى تەاتردا بالالارمەن جۇمىستى ايتارلىقتاي كەڭەيتۋگە مۇمكىندىك بەردى.
– بۇرىن «استانا وپەرادا» بالەت جانە حور ستۋدياسى بولاتىن, قازىر تەاترلىق قولونەر بەلسەندى دامىپ كەلەدى. بۇل ۇيىرمەلەر بالالارعا وتە قىزىقتى. وسى ورايدا ءبىز توپتاردىڭ سانىن كوبەيتىپ جاتىرمىز. كوممەرتسيالىق توپتار قوسىپ, ەرەسەكتەرگە ارنالعان ساندىك-قولدانبالى ونەر سەكتسيالارىن اشۋدامىز, – دەدى ستۋديا جەتەكشىسى نازىم جاي- لاۋباەۆا. – شىعارماشىلىق تۇرعىدا ءوزىن-ءوزى تانىتۋ بالالار مەن جاسوسپىرىمدەرگە عانا ماڭىزدى ەمەس, بۇل ەرەسەكتەرگە دە قاجەت. سوندىقتان ءبىز ءوز الەۋەتتەرىن جۇزەگە اسىرۋعا, كۇندەلىكتى شارۋالاردان باسقا دۇنيەگە كوڭىل ءبولىپ, بوس ۋاقىتتى قىزىقتى ءارى پايدالى ەتىپ وتكىزۋگە مۇمكىندىك بەرۋگە دايىنبىز.
«كيىم ۇلگىلەۋ, ءپىشۋ جانە تىگۋ» سەكتسياسىندا ساباقتاردى «استانا وپەرانىڭ» تىگىن تسەحىندا جۇمىس ىستەيتىن تاجىريبەلى تەاتر كوستيۋمدەرىن ءپىشۋشى-سانگەر ايگۇل رىسپاەۆا جۇرگىزەدى. اعاشقا ورنەك سالۋدى جيىرما جىلدىق تاجىريبەسى بار سۋرەتشى-بۋتافور ەرزات ەلشىباەۆ ۇيرەتەدى.
– اعاشقا ورنەك سالۋ – ساندىك-قولدانبالى ونەر ءتۇرى, ول اعاشتى كوركەمدىك وڭدەۋدىڭ سان الۋان تۇرلەرىن, ونىڭ ىشىندە ارامەن كەسۋدى, جونۋ ءىسىن, كۇيدىرۋدى قامتيدى, – دەيدى ەرزات ەلشىباەۆ. – بۇل داعدىلاردى ۇيرەنۋ اسا قيىن ەمەس. ءبىزدىڭ يەلىگىمىزدە بىلدەكتەر, ارنايى قۇرال-سايماندار بار, ولاردىڭ كومەگىمەن ءۇيدىڭ ءىشىن بەزەندىرۋگە ارنالعان زەرگەرلىك ەلەمەنتتەردى جاساۋعا, شىعارماشىلىق شابىتتى جۇزەگە اسىرۋعا جانە قىزىقتى جۇمىس بارىسىنان راحات الۋعا بولادى.
ايتا كەتەيىك, ەرەسەكتەرگە ارنالعان قولونەردى ۇيرەنۋ مۇمكىندىگى ءۇشىن بارلىق بايلانىس مالىمەتى تەاتر سايتىندا كورسەتىلگەن.
