قالالىق ينۆەستيتسيالار جانە كاسىپكەرلىكتى دامىتۋ باسقارماسى باسشىسىنىڭ ورىنباسارى قۋانىش ساپاروۆ ەلوردالىق كاسىپكەرلەرگە كورسەتىلىپ جاتقانى قولداۋ شارالارى تۋرالى تارقاتىپ ايتىپ بەردى.
بۇگىندە استانادا 209 مىڭعا جۋىق شوب سۋبەكتىسى جۇمىس ىستەيدى, وندا 458 مىڭ ادام ەڭبەك ەتەدى, بۇل قالانىڭ ەكونوميكالىق بەلسەندى تۇرعىندارىنىڭ 71%-ىن قۇرايدى.
2022 جىلدىڭ الدىن الا قورىتىندىسى بويىنشا ەلوردانىڭ ءجوو قۇرىلىمىنداعى شوب ۇلەسى 75%-دى قۇرادى. ەلوردا ءالى دە وسى كورسەتكىش بويىنشا كوشباسشىلى بولىپ وتىر.
سپيكەردىڭ ايتۋىنشا, وسى جانە باسقا دا كورسەتكىشتەرگە قول جەتكىزۋگە 2021-2025 جىلدارعا ارنالعان كاسىپكەرلىكتى دامىتۋ جونىندەگى ۇلتتىق جوبا اياسىندا قابىلدانىپ جاتقان شارالار ايتارلىقتاي ىقپال ەتتى.
وسىلايشا, بيزنەستى قولداۋ ماقساتىندا ەلوردادا نەسيەلەر بويىنشا سىياقى مولشەرلەمەلەرىن سۋبسيديالاۋ جۇرگىزىلەدى. اتالعان تەتىك بويىنشا 2022 جىلى كاسىپكەرلەردىڭ جوبالارىن قولداۋعا 19,5 ملرد تەڭگە ءبولىندى. 2022 جىلى 102,2 ملرد تەڭگە سوماسى بويىنشا 1 715 سۋبسيديالاۋ شارتىنا قول قويىلدى.
نەسيەلەرگە ءىشىنارا كەپىلدىك بەرۋ دە جۇزەگە اسىرىلادى. وتكەن جىلى كاسىپكەرلەردىڭ 1 526 كرەديتىنە كەپىلدىك بەرىلدى.
سونىمەن قاتار, جاڭا بيزنەس-يدەيالاردى ىسكە اسىرۋ ءۇشىن شاعىن بيزنەس سۋبەكتىلەرىنە كونكۋرستىق نەگىزدە 5 ملن تەڭگەگە دەيىن گرانتتار بەرىلەدى.
«2022 جىلى وتىنىمدەردى قابىلداۋ 1-15 ءساۋىر ارالىعىندا ءوتتى. ماسەلەن, 1,8 مىڭنان استام ءوتىنىم كەلىپ ءتۇستى, بۇل 2021 جىلمەن سالىستىرعاندا 5,4 ەسە كوپ (335 ءوتىنىم). تىڭداۋ قورىتىندىسى بويىنشا 135 كاسىپكەردىڭ جوباسى ماقۇلداندى, ونىڭ ىشىندە حالىقتىڭ الەۋمەتتىك وسال توپتارىنان 29 كاسىپكەر جانە 28 جاس كاسىپكەر بار», دەپ ءتۇسىندىردى قۋانىش ساپاروۆ.
قولداۋدىڭ تاعى ءبىر تەتىگى – ەكونوميكانىڭ باسىم سالالارىندا شوب وبەكتىسىنىڭ اۋماعىنا جەتىسپەيتىن ينفراقۇرىلىمدى جەتكىزۋ. بيىل وسى باعىتتا 1,9 ملرد تەڭگە سوماسىنا جەتىسپەيتىن ينفراقۇرىلىمدى جۇرگىزۋ بويىنشا 3 جوباعا قولداۋ كورسەتىلدى.
سونداي-اق شوب-تى, ونىڭ ىشىندە باسىم ەمەس سالالاردا (ساۋدا, قىزمەت كورسەتۋ, قوعامدىق تاماقتاندىرۋ) جۇمىس ىستەيتىندەردى مەملەكەتتىك قولداۋمەن بارىنشا قامتۋ ءۇشىن اكىمدىك «دامۋ» قورىمەن بىرلەسىپ «استانا بيزنەس 2» جەرگىلىكتى جەڭىلدىكتى كرەديتتەۋ باعدارلاماسىن ىسكە اسىرۋدا.
«بيىل اتالعان باعدارلاماعا بارلىعى 1,5 ملرد تەڭگە قاراستىرىلعان. بۇگىنگى تاڭدا 489 ملن تەڭگە سوماسىنا كاسىپكەرلەردىڭ 9 جوباسى ماقۇلداندى. سونداي-اق تۇراقتى نەگىزدە كاسىپكەرلەرمەن كەزدەسۋلەر وتكىزەمىز. كەزدەسۋ بارىسىندا كاسىپكەرلەردى تولعاندىراتىن وزەكتى جانە تۇيتكىلدى ماسەلەلەر تالقىلاندى», دەپ قورىتىندىلادى باسقارما باسشىسىنىڭ ورىنباسارى.
