قۇجاتتا جازاسىن وتەۋشى جەكە تۇلعالاردى قوعامدىق جۇمىسقا تارتۋ ءتارتىبىن ايقىندايتىن 49-باپتى ەنگىزۋ كوزدەلگەن. جاڭا باپ بويىنشا, قوعامدىق جۇمىستاردى اكىمشىلىك جاۋاپكەرشىلىككە تارتىلعان تۇلعا تۇرعىلىقتى جەرى بويىنشا ورنالاسقان قوعامدىق ورىنداردا اتقارادى. تەگىن جۇمىستى جەرگىلىكتى اتقارۋشى ورگاندار ايقىندايدى.
«قوعامدىق جۇمىستارعا, ادەتتە, ەلدى مەكەندى اباتتاندىرۋ, كوشەلەردى قاردان, قوقىستاردان تازارتۋ, شەكارالاردى, اعاشتاردى اقتاۋ جانە تاعى باسقالارى جاتادى. بۇل ءوز كەزەگىندە پروفيلاكتيكالىق اسەر ەتەدى جانە مەملەكەتتىك بيۋدجەتتى ايتارلىقتاي ۇنەمدەيدى», دەپ جازىلعان قۇجاتتا.
قوعامدىق جۇمىستار ساعاتپەن ەسەپتەلەدى جانە 10-نان 150 ساعاتقا دەيىنگى مەرزىمگە بەلگىلەنەدى. جۇمىس ىستەيتىن نەمەسە وقيتىن ادام ءۇشىن ۇزدىكسىز نەگىزدە كۇنىنە 4 ساعاتتان اسپاۋعا ءتيىس. ال تۇراقتى جۇمىس ورنى جوق جانە وقىمايتىن ادامدار كۇنىنە 8 ساعاتقا دەيىن, بىراق اپتاسىنا 40 ساعاتتان اسپايتىن مەرزىمدە ورىندايدى.
زاڭ جوباسىندا قوعامدىق جۇمىستارعا تارتۋعا بولمايتىن ادامداردىڭ ساناتى انىقتالعان. ولار:
- جۇكتى ايەلدەر;
- 3 جاسقا دەيىنگى بالالاردى جالعىز تاربيەلەپ وتىرعان تۇلعالار;
- 18 جاسقا تولماعان تۇلعالار;
- ءى جانە ءىى توپتاعى مۇگەدەكتىگى بار تۇلعالار;
- 58 جانە ودان جوعارى جاستاعى ايەلدەر;
- 63 جانە ودان جوعارى جاستاعى ەر ادامدار;
- شەتەل ازاماتتارى جانە قازاقستاندا تۇراقتى تۇرمايتىن ازاماتتىعى جوق ادامدار.
قوعامدىق جۇمىستاردى ورىنداۋ كەزەڭىندە جوعارىدا اتالعان جاعدايلار ورىن العان جاعدايدا سوت مۇنداي ادامدى ىشكى ىستەر ورگاندارىنىڭ ءوتىنىشحاتى بويىنشا قوعامدىق جۇمىستاردان بوساتۋعا نەمەسە قوعامدىق جۇمىستاردىڭ مەرزىمىن قىسقارتۋعا نە ايىپپۇلعا اۋىستىرۋعا قۇقىلى. بۇل جاعدايدا سوت ايىپپۇل مولشەرىن ادامنىڭ جۇمىس ىستەگەن ساعاتتارىن ەسكەرە وتىرىپ ايقىندايدى.
سونىمەن قاتار قۇقىق بۇزۋشىنىڭ قوعامدىق جۇمىستارعا كەشىگىپ كەلۋىنە اۋىرۋ جانە باسقا دا قۇجاتتالعان جاعدايلار سەبەپ بولا الادى.
ال اكىمشىلىك قاماققا الۋ مەرزىمىن وتەگەننەن كەيىن قوعامدىق جۇمىستاردى ورىنداۋدان جالتارعانى ءۇشىن اكىمشىلىك قاماققا الىنعان ادام قوعامدىق جۇمىستاردى ورىنداۋدان بوساتىلمايدى. ولارعا 200 اەك (612 600 تەڭگە) مولشەرىندە ايىپپۇل سالىنادى.
ادامدى قوعامدىق جۇمىستاردى ورىنداۋدان جالتارعان دەپ تانۋ نەگىزدەرى 49-2-باپتا ايقىندالعان. ول بويىنشا:
- قوعامدىق جۇمىستاردى ورىنداۋعا كىرىسۋدەن باس تارتقاندار نە قوعامدىق جۇمىستاردى ورىنداۋ مەرزىمى ىشىندە دالەلدى سەبەپتەرسىز ەكى رەتتەن ارتىق كەلمەگەندەر;
- قوعامدىق جۇمىستاردى ورىنداۋ كەزەڭىندە قر زاڭناماسىندا بەلگىلەنگەن تارتىپپەن مەديتسينالىق كۋالاندىرۋمەن راستالعان ماساڭ كۇيدە بولعان جاعدايدا;
- قوعامدىق جۇمىستاردى ورىنداۋدان جالتارۋ ماقساتىندا جاسىرىنعان;
- دالەلسىز سەبەپتەرمەن قر اۋماعىنان تىس جەرلەرگە كەتكەندەر جالتارعان تۇلعا دەپ تانىلادى.
قوعامدىق جۇمىستاردى ورىنداۋ ءۇشىن جەرگىلىكتى اتقارۋشى ورگانعا ورنالاسقان جەرى بويىنشا 3 كۇننەن ارتىق كەلمەگەن ادام جالتاردى دەپ تانىلادى.
