الاكولدەگى رەزيدەنتسيا بۇعان دەيىن وبلىس اكىمى مەن ءتۇرلى قوناقتاردى قابىلدايتىن قوناقۇي بولسا, ەندى بالالاردىڭ دەمالىس نەمەسە ساۋىقتىرۋ ورتالىعىنا اينالادى. جالپى, اتالعان نىسان اقشي اۋىلىندا ورنالاسقان. ال بالالار ورتالىعى بىلتىر ءۇشارال قالاسىندا اشىلعان ەدى. قۋانىشتى جاڭالىقتى ءوڭىر باسشىسى الاكولدىكتەرمەن كەزدەسكەندە ايتتى.
«بۇگىن «جانسايا» بالالاردى وڭالتۋ ورتالىعىنىڭ جۇمىسىمەن تانىستىق. اشىلعانىنا 6 اي بولعان, قازىر وعان 20-دان استام بالا بارىپ ءجۇر. مۇندا بالالارعا مەديتسينالىق كومەك تەگىن كورسەتىلەدى, ءتۇرلى كوررەكتسيالىق-وڭالتۋ ساباقتارى وتكىزىلەدى, بالالار سۋرەت سالادى, دەمالادى, ەمدىك دەنەشىنىقتىرۋمەن اينالىسادى. اتا-انالار بالالارىن ەش الاڭسىز كۇنى بويى قالدىرىپ, جۇمىستارىنا بارا بەرە الادى. ەگەر بالالار شالعاي اۋىلداردان كەلسە, وندا جاتىن ورىنمەن دە قامتىلادى. تاماعى دا, باسقا دا قاجەتتىلىكتەرى ۇيىمداستىرىلعان. بۇدان ءارى دە تيگىزەر پايداسى ەسەلەنە ءتۇسسىن دەگەن ماقساتتا «جانسايا» ورتالىعىنا اۋدان اكىمدىگىنىڭ رەزيدەنتسياسىن بەرۋدى ۇسىنىپ وتىرمىن. اقشي اۋىلىنداعى شاعىن كوتتەدج ۇيدە جازعى ۋاقىتتا بالالار الاكول سۋىنا شومىلىپ, دەنساۋلىقتارىن تۇزەي الادى», دەدى ب.يساباەۆ.
ودان كەيىن اۋدان اكىمدىگىنە جاڭا دەمالىس ماۋسىمى باستالعانعا دەيىن عيماراتتى جوندەۋ, وڭالتۋ ورتالىعىنىڭ بالانسىنا وتكىزىپ بەرۋ جۇمىستارىنا قاتىستى ءتيىستى شارالار قابىلداۋدى تاپسىردى. وبلىس اكىمىنىڭ ءباسپاسوز قىزمەتىنىڭ مالىمەتىنشە, الەۋمەتتىك ماڭىزى بار نىساندى اشۋعا جەرگىلىكتى بيۋدجەتتەن 230 ملن تەڭگە بولىنگەن. بۇل قاراجاتقا قاراۋسىز قالعان عيماراتتى رەتكە كەلتىرىپ, قاجەتتى جابدىقتار مەن جيھازدار ساتىپ الىندى, ىرگەلەس اۋماعى اباتتاندىرىلدى, بالالار ويىن الاڭى سالىندى. سونىڭ ناتيجەسىندە بىلتىر «جانسايا» بالالاردى وڭالتۋ ورتالىعى اشىلدى. ورتالىق 50 ورىنعا لايىقتالعان, ازىرگە وندا الاكول اۋدانىنىڭ ءار تۇكپىرىنەن 21 بالا بارىپ ءجۇر. «ينۆاتاكسي» قىزمەتتەرى دە ۇسىنىلادى.
عاجابى سول, مۇندا ەرەكشە قاجەتتىلىكتەرى بار بالالار وبلىستان تىس جەرلەرگە شىقپاي-اق اقىسىز, تەگىن تولىق ەمدەۋ كۋرسىنان وتەدى. ورتالىقتا تىرەك-قيمىل اپپاراتى بۇزىلعان, اۋتيزم, داۋن سيندرومى, تسەرەبرالدى سال اۋرۋى دياگنوزى بار بالالاردى وڭالتۋ شارالارى جۇرگىزىلەدى. وڭالتۋعا بارۋ ءۇشىن ۆتەك-تەن ءتيىستى جولداما مەن جەكە وڭالتۋ باعدارلاماسىن الۋ قاجەت. ورتالىقتا مونتەسسوري كابينەتى, فيزيوتەراپيا, ەمدىك دەنەشىنىقتىرۋ كابينەتتەرى, ماسساج جانە سەنسورلىق بولمەلەر جۇمىس ىستەيدى, تۇز شاحتاسى بار, پسيحولوگ, لوگوپەد, دەفەكتولوگ ماماندار ءتيىستى مەديتسينالىق قىزمەت كورسەتەدى.
وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ حابارلاۋىنشا, مۇنداي ورتالىقتار سارقان, پانفيلوۆ جانە قاراتال اۋداندارىندا جۇمىس ىستەيدى. كەربۇلاق اۋدانىندا دا بالالاردى وڭالتۋ ورتالىعىن اشۋ جوسپارلانعان.
جەتىسۋ وبلىسى
