اتالعان دوداعا قۇقىقتىق ءتارتىپ اسكەرىنىڭ «وڭتۇستىك» (الماتى ق.), «ورتالىق» (قاراعاندى ق.), «باتىس» (ورال ق.) جانە «شىعىس» (وسكەمەن ق.) وڭىرلىك قولباسشىلىقتارى مەن ۇلتتىق ۇلان اكادەمياسىنىڭ (پەتروپاۆل ق.), 5573 (استانا ق.) جانە 6654 (قاراكەمەر كەنتى) اسكەري بولىمدەرىنىڭ كوماندالارى قاتىسادى. بارلىعى جەتى كوماندا ءوزارا باق سىناۋدا.
ۇلتتىق ۇلان اسكەري قىزمەتشىلەرى اراسىندا وتەتىن چەمپيوناتتىڭ ماقساتى — اسكەري قىزمەتشىلەردىڭ دەنە شىنىقتىرۋ دايىندىعى مەن سپورتتىق شەبەرلىگىن ارتتىرۋ, سالاۋاتتى ءومىر سالتىن ناسيحاتتاۋ, وبلىستىق جانە رەسپۋبليكالىق چەمپيوناتتارعا, قۇقىق قورعاۋ ورگاندارى, ءىىم ارناۋلى جانە كۇشتىك قۇرىلىمدارى, قازاقستان رەسپۋبليكاسى قارۋلى كۇشتەرى مەن شەت ەلدەر اراسىنداعى جارىستارعا مىقتى سپورتشىلاردى ىرىكتەۋ.
سپورتتىق جارىستىڭ اشىلۋ سالتاناتىندا «باتىس» وڭىرلىك قولباسشىلىعىنىڭ قولباسشىسىنىڭ ورىنباسارى پولكوۆنيك پاۆەل سيتنيكوۆ ءسوز سويلەپ, قاتىسۋشىلارعا ساتتىلىك تىلەپ, سپورتپەن تۇراقتى اينالىسىپ, سالاۋاتتى ءومىر سالتىن ورنىقتىرۋدىڭ ماڭىزىن اتاپ ءوتتى.
ودان كەيىن مىنبەگە ورال قالاسى اكىمىنىڭ ورىنباسارى نۇرجانوۆ ميربولات ساعىنعالي ۇلى كوتەرىلىپ, اسكەري قىزمەتشىلەردىڭ اراسىنداعى سپورتشىلاردىڭ شەبەرلىگىن شىڭداۋ وتە ماڭىزدى ەكەنىن ايتتى
سونداي-اق ايتۋلى شارادا ۇلتتىق ۇلاننىڭ دەنە دايىندىعى جانە سپورت ءبولىمىنىڭ باستىعى پولكوۆنيك ابيشەۆ ساتجان جانە «دينامو» دەنە شىنىقتىرۋ سپورت قوعامى توراعاسىنىڭ ءبىرىنشى ورىنباسارى زاپاستاعى پولكوۆنيك پاۆەل ستاۆكين, باتىس قازاقستان وبلىسى دەنە شىنىقتىرۋ جانە سپورت ءبولىمىنىڭ باسشىسى داۋرەن مۇقانوۆتار دا ءسوز سويلەپ جارىسقا قاتىسۋشىلارعا ساتتىلىك تىلەدى.
ويىن الاڭىنا العاشقىلاردىڭ ءبىرى بولىپ, «باتىس» وڭىرلىك قولباسشىلىعىنىڭ كومانداسى مەن 5573 اسكەري ءبولىمىنىڭ ۆولەيبولشىلارى شىقتى.
جالپى جارىستىڭ فينالدىق ويىنى 23 اقپان كۇنى وتەدى.
تۋرنير جەڭىمپازىنا كۋبوك, مەدالدار جانە باعالى سىيلىقتار بەرىلەدى. جۇلدەگەرلەر مەن قاتىسۋشىلار دا ماراپاتتالادى.
