قازاقستاندا ايىپپۇلدىڭ جاڭا تۇرلەرى پايدا بولادى

اتاپ ايتقاندا, «بەلگىلەنگەن قوزعالىس جىلدامدىعىنان اسىپ كەتۋ» دەپ اتالاتىن 592-باپقا وزگەرىستەر مەن تولىقتىرۋلار ەنگىزىلدى.

ماسەلەن, كولىك قۇرالىنىڭ بەلگىلەنگەن قوزعالىس جىلدامدىعىن ساعاتىنا 40-تان 80 كيلومەترگە دەيىن ارتتىرعانى ءۇشىن 20 اەك (69 000 تەڭگە) ايىپپۇل قاراستىرىلعان.

ال قوزعالىس جىلدامدىعىن ساعاتىنا 80 جانە ودان دا كوپ كم-گە ارتتىرعان جۇرگىزۋشىگە 40 اەك (138 000 تەڭگە) ايىپپۇل سالىنادى.

ءبىر جىل ىشىندە جىلدامدىقتى 80 كم/ساع جانە ودان ارتىق ارتتىرعان جۇرگىزۋشىلەر 60 اەك (207 000 تەڭگە) مولشەرىندە ايىپپۇل تولەيدى.

سونداي-اق «جولاۋشىلار مەن جۇكتەردى تاسىمالداۋ, جول قوزعالىسى ەرەجەلەرىندە كوزدەلگەن قاۋىپسىزدىك بەلدىكتەرىن نەمەسە موتوشلەمدەردى پايدالانۋ جونىندەگى تالاپتاردى ساقتاماۋ» بويىنشا 593-باپقا دا وزگەرىستەر ەنگىزىلدى.

وندا جولاۋشىلاردى اۆتوكولىك كابيناسىنان تىس جەردە تاسىمالداعانى ءۇشىن, سونداي-اق ولاردى كولىك قۇرالىنىڭ تەرەزە ويىقتارى مەن ليۋكتەرىنە ءىلىپ قويۋعا, ەسىكتەردى اشىپ قويۋعا, قوزعالىس كەزىندە باسقا دا وسىنداي ارەكەتتەر جاساعانى ءۇشىن جازالاۋدى كوزدەيتىن جاڭا تارماق پايدا بولدى.

بۇل ارەكەتتەر ءۇشىن 10 اەك (34 500 تەڭگە) كولەمىندە ايىپپۇل سالىندى.

زاڭ جوباسىنا ەنگەن بارلىق تولىقتىرۋلار 13 ناۋرىزعا دەيىن اشىق نقا سايتىندا ورنالاستىرىلعان.