«اتامەكەن» كاسىپكەرلەر پالاتاسىنىڭ جەرگىلىكتى فيليالى بۇگىندە زامانعا ساي ترانسفورماتسيانى باستان كەشىرۋدە. جۋىردا مۇندا بيزنەس وكىلدەرىنىڭ ماسەلەلەرىن شەشۋگە ارنالعان بەس بىردەي كوميتەت قۇرىلدى. سونىڭ ءبىرى – اگروونەركاسىپتىك كەشەن كوميتەتى.
– فيليال كوميتەتتەرى كاسىپكەرلىكتەردىڭ جەكە جانە جۇيەلىك ماسەلەلەرىن شەشۋگە, ولاردىڭ ونىمدەرىن سىرتقى نارىققا شىعارۋعا, بىلىكتىلىگى مەن باسەكەگە قابىلەتتىلىگىن ارتتىرۋعا جاردەمدەسەدى. پاۆلودار وبلىسىنىڭ كاسىپكەرلەر پالاتاسىندا بۇگىندە بەس كوميتەت قۇرىلدى. ولار ءتۇرلى باعىت بويىنشا بەكىتىلگەن جۇمىس جوسپارى مەن ەرەجە نەگىزىندە جۇمىس ىستەيدى. اتاپ ايتقاندا, اگروونەركاسىپتىك كەشەن, ونەركاسىپ, قۇرىلىس جانە تكش, تۋريزم جانە قوناقۇي بيزنەسى, ءبىلىم بەرۋ, ساۋدا جانە قىزمەت كورسەتۋ سالالارى, – دەدى پاۆلودار وبلىسى كاسىپكەرلەر پالاتاسىنىڭ ديرەكتورى سەرىك سادۋاقاسوۆ.
بارلىق كوميتەتتىڭ جۇمىسى بيزنەس-قاۋىمداستىقتاردىڭ, كاسىپكەرلەردىڭ مىندەتتەرى مەن ماسەلەلەرىن شەشۋ ءۇشىن مەملەكەتتىك بيلىك ورگاندارىمەن ءتيىمدى ءوزارا ءىس-قيمىلىنا باعىتتالعان. ءار كوميتەتتىڭ ءوز توراعاسى جانە مۇشەلەرى بار.
اگروونەركاسىپتىك كەشەن كوميتەتىنىڭ وتىرىسىندا جەرگىلىكتى شارۋالار مەن بيزنەسمەندەر ەت باعىتىنداعى ءىرى قارا مال مەن جىلقى ساتىپ الۋعا جۇمسالعان شىعىنداردى وتەۋ سوماسىن ۇلعايتۋ, اسىل تۇقىمدى مال ساتىپ الۋعا جۇمسالعان قاراجاتتى جانە «Agroexportpavlodar» جشس-نىڭ سىياقى مولشەرلەمەسىن وتەۋ, «پاۆلودار» اكك» اق-مەن ىنتىماقتاستىق شارتتارىن وزگەرتۋ, بالىق شارۋاشىلىعىن وركەندەتۋ ءۇشىن سۋ ايدىندارىنىڭ اينالاسىنان جەر بەرۋ ماسەلەلەرىن كوتەردى.
سالادا ۇزاق جىلدان بەرى ەڭبەك ەتىپ كەلە جاتقانداردىڭ ايتۋىنشا, وڭىردەگى وزەن-كولدەردى بالىقتاندىرۋ بۇگىندە ۇلكەن ماسەلەگە اينالىپ تۇر. بۇعان قوسا رۇقسات ەتىلمەگەن مال جايىلىمدارى مەن مال سۋارۋ ورىندارىنا باقىلاۋدى كۇشەيتۋ قاجەت. رەسەيدىڭ شەكارالاس ايماقتارىنان بالىق شاباقتارىن ساتىپ الۋعا بولادى. تەك بۇل جەردە سۋبسيديالاردىڭ تولەمىن ماكسيمالدى تۇردە ارتتىرسا دەگەن وتىنىشتەرىن جەتكىزدى كاسىپكەرلەر. ونىڭ ۇستىنە سۋ ايدىندارى اينالاسىنا ءتيىستى ينفراقۇرىلىم تارتۋ, ايلاقتار سالۋ, پيرستەر تۇرعىزۋ سەكىلدى ماسەلەلەردى قارجى ۇيىمدارىنىڭ كومەگىنسىز شەشۋ مۇمكىن ەمەس. كوميتەت مۇشەلەرى كوتەرىلگەن ماسەلەلەردى نازارعا الاتىندارىن ۋادە ەتتى.
پاۆلودار
