جىلۋ ەنەرگياسىنىڭ تاريفتەرى 2023 جىلدىڭ 1 قاڭتارىنان باستاپ كەلەسىدەي دەڭگەيدە وسكەن. جىلۋ ەنەرگياسىن ەسەپكە الۋدىڭ جالپى ۇيىشىلىك اسپاپتارى ورناتىلعان تۇتىنۋشىلار ءۇشىن تاريف 30%-عا, ەسەپتەگىشى جوق تۇتىنۋشىلار ءۇشىن 10%-عا, وزگە تۇتىنۋشىلار ءۇشىن 10%-عا قىمباتتادى. ال بيۋدجەتتىك ۇيىمدار ءۇشىن ول بىردەن 24%-عا ۇلعايدى.
ءبىر قىزىعى, تۇتىنۋشىلاردىڭ ءبىر بولىگى ءتاريفتىڭ قوماقتى تۇردە كوتەرىلگەنىن بايقادىق دەسە, ەندى ءبىرى تولەماقى شوتىنداعى سومادان اسا ۇلكەن وزگەرىستى كورمەدىك دەپ وتىر. كەيبىر پاتەر يەلەرى اي سايىنعى تولەمنىڭ ارقيلى كەلەتىنىن دە تۇسىنبەي دال.
«پاۆلودارەنەرگوسبىت» جشس قوعاممەن بايلانىس جونىندەگى ءبولىم جەتەكشىسى ەكاتەرينا بايجۋمانوۆا ءتاريفتىڭ كوتەرىلۋى ۇلتتىق ەكونوميكا مينيسترلىگى تابيعي مونوپوليالاردى رەتتەۋ كوميتەتىنىڭ پاۆلودار وبلىسى بويىنشا دەپارتامەنتىنىڭ 2021 جىلدىڭ 23 شىلدەسىندەگى №69-ود بۇيرىعى نەگىزىندە جۇزەگە اسقانىن ايتادى.
– 1 قاڭتارعا دەيىن ۇيىشىلىك ەسەپتەگىش اسپاپتارى بار پاتەر يەلەرى 1 گكال جىلۋ ەنەرگياسى ءۇشىن 2 050 تەڭگە 57 تيىن تولەپ كەلسە, ەندى ولار ءۇشىن تاريف 2 672 تەڭگە 89 تيىن بولىپ بەكىتىلدى. ال ەسەپتەگىشتەرى جوق ۇيلەردەگى تاريف كوپ كوتەرىلگەن جوق, 1 گكال ەنەرگيا ءۇشىن بۇدان بىلاي 3 145,70 تەڭگەنىڭ ورنىنا 3 473,1 تەڭگە تولەيدى. بۇعان قوسا ەسەپكە الۋ قۇرالدارىن ورناتۋدىڭ تەحنيكالىق مۇمكىندىگى جوق, توزىعى جەتكەن, اپاتتىق جاعدايدا تۇرعان باسپانالار مەن باراق ۇلگىسىندەگى ۇيلەردەگى جەكە تۇلعالار ءۇشىن تاريف 2 621,42 تەڭگەدەن 2 894,93 تەڭگەگە قىمباتتادى. نەگىزى ءتاريفتىڭ كوتەرىلەتىنى تۋرالى كومپانيامىزدىڭ سايتىندا حابارلاندىرۋ بولعان. قىزمەت قۇنىن كوتەرۋ – ءماجبۇرلى تۇردە بولىپ وتىرعان شارا. وندىرىسكە قاجەت قوسىمشا قۇرال-جابدىقتاردىڭ باعاسى ءۇستى-ۇستىنە ءوسىپ جاتىر. ونىڭ ۇستىنە كاسىپورنىمىزدىڭ باسشىلىعى ۇجىمداعى قىزمەتكەرلەردىڭ جالاقىسىن كوتەرۋدى ۇيعارعان, دەپ ءتۇسىندىردى ە.بايجۋمانوۆا.
قازىرگى كۇنى پاۆلودار قالاسى بويىنشا ورتالىقتاندىرىلعان جىلۋعا 119 453 ابونەنت قوسىلعان (پاتەرلەر مەن جەكەمەنشىك ۇيلەر). شاھارداعى 1 307 كوپپاتەرلى تۇرعىن ءۇيدىڭ 1 025-ءى جالپى ۇيىشىلىك جىلۋ ەسەپتەگىشتەرمەن جابدىقتالعان. مۇنداي قۇرالدار ورناتىلماعان ۇيلەردە جىلۋ تولەماقىسى 1 شارشى مەترگە 0,2 گكال مولشەرىندە بەكىتىلگەن تۇتىنۋ نورماسى بويىنشا ەسەپتەلەدى. بۇل رەتتە تولەم مولشەرى ءبىر اي ىشىندەگى كۇندەر سانىنا بايلانىستى بەلگىلەنەتىنىن ەستە ۇستاعان ابزال. ماسەلەن, قاڭتار ايىندا 31 كۇن بولدى, بۇل ۋاقىت ىشىندە تاريف ءار شارشى مەترگە 97,90 تەڭگەدەن ەسەپتەلگەن. ال اقپان ايىندا كۇندەردىڭ ازدىعىنا بايلانىستى 88,43 تەڭگەدەن بەلگىلەنەدى, دەيدى جىلۋمەن قامتۋ مەكەمەسىنىڭ ماماندارى.
تابيعي مونوپوليالاردى رەتتەۋ كوميتەتىنىڭ وڭىردەگى دەپارتامەنتىنىڭ باسشىسى يبراگيم تانگيەۆتىڭ سوزىنە سۇيەنسەك, ءىرى مونوپوليستەرگە 2020-2025 جىلدار ارالىعىندا تاريفتەرىن كەزەڭ-كەزەڭمەن وسىرۋگە رۇقسات بەرىلگەن. بۇل الداعى ەكى جىلدا ءالى دە شامامەن 30 پايىزعا ۇلعايادى. جوسپارلى ءوسىم جازدا قولعا الىناتىنىن جوندەۋ جۇمىستارىنىڭ شىعىنىن جابۋعا جانە وندىرىستىك قىزمەتكەرلەردىڭ ەڭبەكاقىسىن كوتەرۋگە جۇمسالادى.
پاۆلودار
