«كەزدەسۋ ورنى بەلگىلى سەبەپتەرمەن بەيتاراپ اۋماق بولىپ بەلگىلەندى», دەدى قىرعىزستان پرەزيدەنتىنىڭ ءباسپاسوز حاتشىسى ەربول سۇلتانباەۆ. الدىمەن سادىر جاپاروۆ ءوزىنىڭ Facebook پاراقشاسىندا ۇندەۋ جاريالاپ, وندا جاھاندانۋ داۋىرىندە ىشكى تۇراقتىلىق پەن ۇلتتىق بىرلىككە ۇمتىلعان ەلدەر عانا دامىپ, قۋاتتى مەملەكەتكە اينالاتىنى جونىندە, جازبا قالدىردى.
«ەۋرازيا جەرىندە ۇلى دەرجاۆالار قۇرعان ەجەلگى قىرعىزداردىڭ بۇگىنگى قالى قانداي؟ بىرلىكتىڭ جوقتىعىنان, بيلىك ءۇشىن كۇرەستىڭ كەسىرىنەن ءبىز ەجەلگى يمپەريامىزدان ايىرىلىپ, ورتالىقتىڭ ءبىر بۇرىشىندا قالىپ بارا جاتقان سياقتىمىز. تاۋەلسiزدiگiمiزدi جاريالاساق تا, دامۋىمىز نەگە باسەڭدەپ بارادى؟ بىزدە قازىر سولتۇستىك-وڭتۇستىك دەپ, جەتى وبلىسقا ءبولىنىپ وتىرعان جايى بار. وسىلايشا وكىنىشكە وراي, قازىر قىرعىزستان حالقى ءوز وڭىرلەرىنەن شىققان پرەزيدەنتتەردى جاقتاپ, سول ارقىلى تاعى جەتىگە ءبولىنىپ وتىر. قىرعىزستاننىڭ بولاشاعى ءبىز ءۇشىن ماڭىزدى بولسا, «اقاەۆ», «باكيەۆ», «اتامباەۆ», «وتۋنباەۆا», «جەەنبەكوۆ», ء«ومىردىڭ اياقتالۋى» سەكىلدى ۇعىمداردى جويۋىمىز كەرەك. بارشانىڭ باسىن بىرىكتىرە وتىرىپ, حالىقتىڭ بولاشاعىن ويلاۋعا ءتيىسپىز. باستاپقىدا حالىق سايلاعان, سوڭى قايعىلى بولعان بارلىق پرەزيدەنتتەردى جيناساق, بالكىم, ءبىر جۇدىرىقتاي جۇمىلعان ءبىرتۇتاس ەل بولارمىز دەگەن وي مەنى كوپتەن بەرى قيناپ ءجۇردى», دەپ جازدى س.جاپاروۆ.
سونىمەن قاتار قىرعىز مەملەكەتىنىڭ باسشىسى ەل ەسىندە قالعان كەلەڭسىز داۋىرلەردى ەسكە الدى.
«بۇرىنعى پرەزيدەنتتەر رەنىشتەرىن ايتىپ, كەمشىلىكتەرىن مويىندادى. ەڭ باستىسى, ولار ءبىر-ءبىرىن كەشىرە ءبىلدى. مەنىڭ دە كوزدەگەن ماقساتىم سول ەدى. مەنىڭ ويىمشا تەك ءار پرەزيدەنتتىڭ جاقتاستارى, جەتى وبلىستىڭ حالقى ساياساتتى تاستاپ, ءبىر باعىتقا شوعىرلانىپ, ۇلتتىڭ, ەكونوميكانىڭ دامۋىن ويلاۋى كەرەك. حالقىمىزدىڭ كوزقاراسى بويىنشا قاراساڭىز, قاتەلىك اركىمدە كەزدەسەدى. قايعىلى وقيعالار, ءتىپتى قانتوگىس بولدى. اقاەۆتىڭ كەزىندە – اقسىي وقيعاسى, باكيەۆتىڭ كەزىندە – ءساۋىر وقيعاسى, ۋاقىتشا ۇكىمەت كەزىندە – ماۋسىم تراگەدياسى, جەەنبەكوۆتىڭ كەزىندە – قازان وقيعاسى. وكىنىشكە قاراي, قىرعىزستان تاريحىندا بۇل وقيعالاردىڭ ءبارى قارا تاڭبامەن جازىلعان. وسىلايشا, قىرعىز جاستارىنان – ۇلدارىمىزدان ايىرىلدىق. قازا بولعانداردىڭ تۋىستارى مەن جاقىندارىنىڭ نارازىلىعىن تۇسىنەمىن. ءار قىرعىزستاندىق بىرىگۋى كەرەك! 5-10 جىلدىق مۇددەنى ويلاماي, قىرعىزستاننىڭ مۇددەسىن ويلايىق. ماعان دەيىن كەلگەن مەملەكەت باسشىلارىنىڭ ارقايسىسىنا جەكە مۇددەم دە, جەكە قىزعانىشىم دا جوق. وسىنى باسا ايتۋىم كەرەك», دەپ اياقتادى جازباسىن قىرعىزستان پرەزيدەنتى.
ءوز ۇندەۋىن سادىر جاپاروۆ ءبىزدىڭ زامانىمىزدىڭ IX عاسىرىنداعى قىرعىز قاعاناتىنىڭ كارتاسىمەن ۇيلەستىرىپ, سۋرەتىن جاريالادى. ال ساراپشىلار سادىر جاپاروۆتىڭ باستاماسىن «باتىل قادام» دەپ باعالاپ, قىرعىزستاننىڭ بۇرىنعى پرەزيدەنتتەرىنىڭ بۇل باسقوسۋىنىڭ ءتۇپ ماقساتىن «جەر-جەرگە بولىنبەي, تۇتاس قىرعىز ەلىنىڭ مۇددەسى ءۇشىن بىرىگىپ جاتىر» دەپ تۇسىندىرگەن.
