قازاقستان اۆتوپاركى قارتايىپ تۇر

اقش-تا ساتىلىم – 7,8 پايىزعا, 13,7 ملن اۆتوكولىككە, باتىس ەۋروپادا 6,2 پايىزعا, 11,6 ملن كولىككە قىسقارعان. جا­پو­نيادا بىلتىر 1977 جىلدان بەرگى ەڭ تو­مەن ساتىلىم كولەمى تىركەلدى: نەبارى 4,2 ملن اۆتوكولىك ساۋدالانىپتى. بۇل 2021 جىلدان 5,2 پايىزعا از. ال كولىك سا­تىلىمىنىڭ قىسقارۋى ءتورتىنشى جىل قاتارىنان بايقالىپ وتىر.

ايتارلىقتاي قۇلدىراۋ شىعىس ەۋ­رو­پادا بايقالدى دەيدى ساراپشىلار. ءبىر جىلدا 26,8 پايىزعا, 2,9 ملن كولىككە تومەندەگەن. بۇعان ۋكرايناداعى سوعىستىڭ اسەر ەتكەنى انىق. ال رەسەيدىڭ وزىندەگى ساتىلىم بىردەن 60 پايىزعا كەرى كەتكەن.

قازاقستاندا جاڭا جەڭىل كولىكتەر مەن جەڭىل كوممەرتسيالىق تەحنيكا ساتى­لىمى 5,3 پايىزعا ءوسىپ, 2022 جىلدىڭ قاڭتار-جەلتوقسانىندا 123,8 مىڭ بىرلىك تەحنيكانى قۇرادى. ەڭ كوپ ساتىلعان ۇلەسى Chevrolet (34,3 مىڭ) پەن Hyundai (28,9 مىڭ) ەنشىلەيدى. بىلتىرمەن سالىستىرعاندا Chevrolet ساتىلىمى 17,8 پايىزعا, Hyundai ساتىلىمى 27 پايىزعا وسكەن. توپ-5 قاتارىنا Kia (14,4 مىڭ), Toyota (9,6 مىڭ) جانە Lada (7,4 مىڭ) كىرەدى. ۇزدىك وندىق قاتارىندا ءتورت بىردەي قىتاي كولىگى بار, ولار – Chery (4,5 مىڭ), Jac (3,4 مىڭ), Exeed (1,9 مىڭ) جانە Haval (1,5 مىڭ).

«مودەل ءبولىنىسى بويىنشا, ساتىلىم­نىڭ كوش باسىندا Chevrolet Cobalt (23,2 مىڭ), Hyundai Tucson (8,9 مىڭ) جانە Chevrolet Nexia (7,1 مىڭ) تۇر. توپ-10 قاتارىنا Tucson-نان بولەك Hyundai-دىڭ 4 مودەلى (Elantra, Sonata, Accent جانە Santa Fe), سونداي-اق Toyota (LC Prado), Kia (Sportage) جانە Lada-نىڭ (Granta) ءبىر-ءبىر مودەلى كىرەدى», دەپ جازادى Energyprom.

2022 جىلدىڭ سوڭعى ايىندا الەمدىك ساتىلىم قايتادان ءوسىم كورسەتكەن. بۇل ايدا جاھان بويىنشا 7,4 ملن كولىك ساتىلىپ كەتكەن. 2021 جىلدىڭ جەل­توق­سا­نىمەن سالىستىرعاندا 0,1 پا­يىز­عا ارتىق. ءوسىم باتىس ەۋروپادا (12,8 پا­يىز, 1,1 ملن كولىك), اقش پەن كانادادا, لاتىن امەريكاسى, جاپونيا جانە كورەيادا دا بايقالعان. قازاقستان دا بۇل وسىمگە ىلەستى. بىلتىر جەلتوقساندا ەلى­مىز­دە 13,8 مىڭ كولىك ساتىلىمعا شى­عا­رىلعان.

ارينە, جوعارىدا ءجيى ساتىلىم جاتىر دەگەن كولىكتىڭ كوبى بىزدە نەسيە ارقىلى بەرىلەدى. بۇل حالىق ءال-اۋقاتىنىڭ اسا جوعارى ەمەس ەكەنىن اڭعارتسا كەرەك.

قازىر وتاندىق اۆتونارىقتىڭ جاي-كۇيى كوڭىل تولارلىقتاي ەمەس. ەلدەگى اۆتوپارك ابدەن ەسكىردى. 1990-2000 جىلدار ارالىعىنداعى توزعان كولىكتەردىڭ ءوزى 2 ملن تەڭگەدەن كەم سۇرامايدى. سا­راپ­شىلار قازاقستانداعى ءاربىر ەكىنشى كولىكتىڭ جاسى 20-دان اسىپ كەتكەنىن ايتادى. ەلىمىزدە تىركەلگەن 3,9 ملن اۆتوكولىكتىڭ 2,8 ملن-ى جۇرىلگەنىنە 10 جىلدان اسقان تەحنيكا قۇرالى بولىپ سانالادى. ولاردىڭ ۇشتەن ءبىرى ءۇش وڭىرگە تيەسىلى – الماتى وبلىسى (406,6 مىڭ دانا), الماتى (310,6 مىڭ) جانە شىعىس قازاقستان وبلىسى (211,8 مىڭ). بۇل رەتتە وڭىرلىك اۆتوپاركتەگى 10 جىلدان اسقان اۆتوكولىكتەردىڭ ەڭ كوپ ۇلەسى جامبىل (86,7 پايىز), جەتىسۋ (85,9 پايىز) جانە الماتى (84,1 پايىز) وبلىستارىندا.

20 جاستان اسقان, ادبەن ەسكى كولىك­تەر­دىڭ سانى 2 ملن-عا جۋىقتايدى. ولاردىڭ جار­تىسىنا جۋىعى بەس وبلىستا ەكەن: الماتى وبلىسىندا (317,8 مىڭ دانا), ال­ماتىدا (177,2 مىڭ), قاراعاندى (157,3 مىڭ), شىعىس قازاقستان (154,9 مىڭ) جانە جامبىل (145 مىڭ) وبلىس­تارىندا.