«بۇگىن جەرگىلىكتى ۋاقىت بويىنشا ساعات 18:00-دە تىركەۋ كەزەڭى اياقتالادى. 15 اقپاندا پارلامەنت ماجىلىسىنە سايلاۋ بويىنشا ۇسىنىلعان بارلىق 7 ساياسي پارتيانىڭ پارتيالىق تىزىمدەرى بويىنشا تىركەۋ اياقتالدى. اۋماقتىق سايلاۋ كوميسسيالارىنىڭ اقپاراتىنا ساي, كەشە پروپورتسيونالدى نەگىزدە سايلاناتىن وبلىستار مەن رەسپۋبليكالىق ماڭىزى بار قالالار مەن استانا ءماسليحاتى دەپۋتاتتارىنىڭ جارتىسىن سايلاۋ جونىندەگى پارتيالىق تىزىمدەردى تىركەۋ ءوز مارەسىنە جەتتى. كانديداتتاردى ءبىر مانداتتى وكرۋگتەر بويىنشا تىركەۋ 20 ءوڭىردىڭ ارقايسىسىندا جەرگىلىكتى ۋاقىت بويىنشا 18:00-گە دەيىن جالعاسادى», دەدى قر وسك توراعاسىنىڭ ورىنباسارى كونستانتين پەتروۆ.
ايتا كەتسەك, پارتيالىق ءتىزىم نەگىزىندە 69 دەپۋتات سايلانادى.
كونستانتين پەتروۆتىڭ ايتۋىنشا, قازاقستان حالىق پارتياسىنان – 52, «اق جول» دەموكراتيالىق پارتياسىنان – 54, جالپىۇلتتىق سوتسيال-دەموكراتيالىق پارتياسىنان - 19, «بايتاق» جاسىلدار پارتياسىنان – 18, «اۋىل» حالىقتىق-دەموكراتيالىق پارتياسىنان – 25, «Amanat» پارتياسىنان – 90, «Respublica» پارتياسىنان – 23 كانديدات تىركەلدى. سونىمەن قاتار سوڭعىسىنان 2 كانديدات وزدەرى بەرگەن وتىنىشكە سايكەس, پارتيالىق تىزىمنەن شىعارىلدى.
