وڭىرلىك كوممۋنيكاتسيالار قىزمەتى الاڭىندا وتكەن بريفينگ بارىسىندا الماتى وبلىسى ەتنوسارالىق قاتىناستاردى دامىتۋ ءبولىمى – قازاقستان حالقى اسسامبلەياسى حاتشىلىعىنىڭ باسشىسى جاندار اسان جوسپارلانىپ وتىرعان ءىس-شارالارعا توقتالدى.
«مەرەكەلىك ونكۇندىك 20 اقپاندا «العىس ايتۋ كۇنىنىڭ باستى يدەياسى نە؟» تاقىرىبىندا ەسسە جازۋدان مەكتەپ وقۋشىلارى اراسىنداعى وبلىستىق بايقاۋدان باستالادى. العاش رەت ۇيىمداستىرىلىپ وتىرعان سايىستىڭ ماقساتى – جاستار اراسىندا اتاۋلى كۇننىڭ ءمان-ماڭىزىن كەڭىنەن ناسيحاتتاۋ, وسكەلەڭ ۇرپاققا مەرەكەنىڭ يدەولوگيالىق قۇندىلىعىن جەتكىزۋ», دەدى جاندار اسان.
ال «Almaty region PUBLIC LECTURE» اتتى تسيكلدى دارىستەر سەرياسىنىڭ باستى ماقساتى – وسكەلەڭ ۇرپاقتى مەيىرىمدى بولۋعا, ادامي قاسيەتتەردى ساقتاۋعا, ۇلتجاندىلىققا ۇندەۋ. ءىس-شارا اياسىندا بەلگىلى تۇلعالار, ءتۇرلى سالادا جەتىستىككە جەتكەن ازاماتتار, قازاقستان حالقى اسسامبلەياسىنىڭ مۇشەلەرى بىرلىك, قوعامدىق كەلىسىم, قازاقستاندىق پاتريوتيزم تاقىرىپتارى شەڭبەرىندە ءوڭىر جاستارىمەن تاعىلىمدى ويلارىن بولىسپەك.
مەرەكەلىك ءىس-شارالار شەڭبەرىندە الماتى وبلىستىق قازاقستان حالقى اسسامبلەياسى جانىنداعى ەتنومادەني بىرلەستىكتەردىڭ ۇيىتقى بولۋىمەن «جۇرەكتەن – جۇرەككە» قايىرىمدىلىق اكتسياسى دا وتپەك.
ال «بۇگىنگى كۇننىڭ باتىرلارى» جوباسىنىڭ باستى ماقساتى – ءتۇرلى سالالاردا ادال ەڭبەك ەتىپ جۇرگەن ازاماتتاردى جان-جاقتى دارىپتەۋ.
«العىس ايتۋ مەرەكەلىك ون كۇندىگى اياسىنداعى نەگىزگى ءىس-شارالار 1 ناۋرىزدا وبلىس ورتالىعى – قوناەۆ قالاسىندا ۇيىمداستىرىلادى. «راقمەت ساعان, Qazaqstan!» جالپى اتاۋىمەن وتەتىن ءىس-شارالار ء«بىر ۇلت. ءبىر ماقسات. ءبىر قۇندىلىق» ەتنوستاردىڭ مادەنيەت كورمەسىمەن اشىلادى. تولەرانتتىلىقتىڭ ايقىن كورىنىسى رەتىندە ايشىقتالاتىن ەتنوستاردىڭ مادەنيەت كورمەسى شەڭبەرىندە وڭىردەگى 10 ەتنومادەني بىرلەستىك وزدەرىنىڭ ۇلتتىق سالت-ءداستۇرى مەن مادەنيەتىنەن سىر شەرتەتىن جادىگەرلەردى كوپشىلىك نازارىنا ۇسىنباق», دەدى سپيكەر.
مەرەكەلىك ءىس-شارالار اياسىندا «The Spirit of Ethnos» اتاۋىمەن مادەني فەستيۆالى دە ۇيىمداستىرىلماق. سونىمەن قاتار ءوڭىردىڭ وركەندەۋى جولىنداعى قاجىرلى قىزمەتى مەن ۇلتارالىق تاتۋلىقتى دارىپتەۋگە سىڭىرگەن ولشەۋسىز ەڭبەگى ءۇشىن بىرقاتار ازامات الماتى وبلىسى اكىمىنىڭ «العىس حاتىمەن» ماراپاتتالادى.
