بيىل ءبىر مانداتتىق اۋماقتىق سايلاۋ وكرۋگتەرى بويىنشا ءوزىن-ءوزى ۇسىنىپ جاتقاندار دا, ساياسي پارتيادان ءتۇسىپ جاتقاندار دا كوپ. سونىڭ ىشىندە سولتۇستىك قازاقستان وبلىسىنىڭ №24 ءبىر مانداتتىق اۋماقتىق سايلاۋ وكرۋگىنەن ءماجىلىس دەپۋتاتتىعىنا سايلانۋعا 17 ادام ءۇمىت ءبىلدىرىپ وتىر ەكەن. ولاردىڭ اراسىندا زاڭگەر دە, ەكونوميست تە, جۋرناليست تە, ينفورماتيك تە, اۋىل شارۋاشىلىعى مامانى دا, مۇنايشى دا, ءتىپتى دەنەشىنىقتىرۋ مۇعالىمى دە بار. اۋماقتىق سايلاۋ وكرۋگىنىڭ توراعاسى اسقار ساقىپكەرەەۆتىڭ ايتۋىنا قاراعاندا, ازىرگە سونىڭ ۇشەۋى كانديدات رەتىندە تىركەلىپتى. قالعاندارى ءتۇرلى تەكسەرىستەردەن ءوتىپ, جارناسىن تولەۋ ۇستىندە.
ۇمىتكەرلەردىڭ اراسىندا بۇرىن ءماجىلىس دەپۋتاتى بولعان, ارىپتەسىمىز كارىباي مۇسىرمان, بەلگىلى ساياساتكەر اسىلبەك قوجاحمەتوۆ, «اسكەري عىلىمدار اكادەمياسى» رەسپۋبليكالىق قوعامدىق بىرلەستىگىنىڭ پرەزيدەنتى مۇحتار سەرىكپاەۆ, «Qaraqamus-2020» جشس ديرەكتورى ورىنباي اتىعاەۆ سياقتى ازاماتتار بار. بۇلاردىڭ سوڭعى مەكەنجايى سولتۇستىك قازاقستان وبلىسى بولماسا دا ءبىزدىڭ وڭىردەن سايلانۋعا ءۇمىتتى. كانديداتتار تىزىمىندە وبلىس ەكونوميكاسىنىڭ دامۋىنا بەلسەندى اتسالىسىپ جۇرگەن شارۋاقور, «مامبەتوۆ ي ك» كومانديتتىك سەرىكتەستىگىنىڭ باس ديرەكتورى ەركەبۇلان مامبەتوۆ, «سولتۇستىك قازاقستان ەلەكتر جۇيەسىن ءبولۋ كومپانياسى» اق باس ديرەكتورى اناتولي كازانوۆسكي, «اتامەكەن-قىزىلجار» ميكروقارجىلىق ۇيىمىنىڭ ديرەكتورى سەرىك احمەتبەكوۆ, «گورگاز-سەرۆيز» جشس ديرەكتورى ولەگ يۆانوۆ, قوعامدىق ۇيىمدار اراسىنان «قازاقستانداعى ورىس قاۋىمداستىعى» ۇيىمىنىڭ توراعاسى يۋري زاحاروۆ, «سقو بويىنشا ادام قۇقىن قورعاۋ جونىندەگى قوعامدىق كوميتەتتىڭ» توراعاسى سەرگەي يزمايلوۆ, مەملەكەتتىك قىزمەت سالاسىنان ەڭبەك جانە حالىقتى الەۋمەتتىك قولداۋ دەپارتامەنتىنىڭ ديرەكتورى مەرەكە مۇحامەدياروۆ سياقتى ەسىمدەر اتالادى. ءبىر قىزىعى, 17 ادامنىڭ ىشىندە بىردە-ءبىر ايەل ءوزىن ۇسىنباپتى. ال اۋىل تۇرعىندارى اراسىنان «ماجەنوۆ» شارۋا قوجالىعىنىڭ باسشىسى باۋىرجان ەسمۇقانوۆ ءوزىن-ءوزى ۇسىنعان ەكەن. ال ۇلتتىق قۇرامىنا قاراساق, ۇمىتكەرلەر قاتارىندا 10 قازاق, بەس ورىس, ءبىر پولياك, ءبىر گرۋزين بار ەكەن.
سولتۇستىك قازاقستان وبلىسى
