جالپى, «Respublica» پارتياسى الداعى ءماجىلىس سايلاۋىنا 29 ادامنىڭ كانديداتۋراسىن ۇسىنعان ەدى. الايدا تىزىمنەن 6 ادام شىعارىلدى. وسك سايلاۋعا اتالعان پارتيانىڭ 23 كانديداتىن تىركەدى. ونىڭ 8-ءى – ايەلدەر, جاستار جانە مۇمكىندىگى شەكتەۋلى جاندار. وسىلايشا, پارتيالىق تىزىمگە مىندەتتەلگەن توپتىڭ تالاپتارىن «Respublica» 34,8 پايىز كورسەتكىشپەن ورىنداپ وتىر.
– ورتالىق سايلاۋ كوميسسياسى وكىلەتتى مەملەكەتتىك ورگاندارمەن بىرلەسىپ, ءماجىلىس دەپۋتاتى بولىپ سايلانۋ ءۇشىن پارتيالىق تىزىمگە ەنگىزىلگەن ادامداردىڭ كونستيتۋتسيا مەن «سايلاۋ تۋرالى» كونستيتۋتسيالىق زاڭنىڭ تالاپتارىنا سايكەستىگىنە تەكسەرۋ جۇرگىزدى. سونىمەن قاتار ورتالىق سايلاۋ كوميسسياسىندا ەكى كانديداتتىڭ پارتيالىق تىزىمىنەن ءوز ەركىمەن شىعارۋ تۋرالى ءوتىنىشى رەسمي تۇردە تىركەلدى. دارحان سەرىك ۇلى يماناشەۆتىڭ 2023 جىلى 10 اقپانداعى ءوتىنىشى 14 اقپاندا كەلىپ ءتۇستى. سونداي-اق ولجاس اباز ۇلى سۇلتانوۆتىڭ 11 اقپانداعى ءوتىنىشى ورتالىق سايلاۋ كوميسسياسىنا 14 اقپاندا ءتۇستى. «سايلاۋ تۋرالى» كونستيتۋتسيالىق زاڭنىڭ 90-بابىنىڭ 1-تارماعىنا سايكەس «Respublica» پارتياسى قوعامدىق بىرلەستىگىنىڭ پارتيالىق تىزىمىنەن ولاردىڭ وتىنىشىمەن دارحان سەرىك ۇلى يماناشەۆتى, ولجاس اباز ۇلى سۇلتانوۆتى شىعارۋ بويىنشا وسك ءوز قۇزىرەتى شەڭبەرىندە ءتيىستى شەشىمدەر جوباسىن دايىندادى. وسىنى ەسكەرە وتىرىپ پارتيالىق تىزىمگە 23 ادام تىركەلدى», – دەدى وسك مۇشەسى شاۆكات وتەمىسوۆ.
ەسكە سالساق, وسىعان دەيىن «Respublica» پارتياسى تىزىمنەن 4 ادامدى الىپ تاستاعان ەدى. ولاردىڭ اراسىندا ءبىر مانداتتى جۇيە بويىنشا ۇسىنىلعان كانديدات, پارتيانىڭ تەڭ توراعالارىنىڭ ءبىرى سىرىمبەك تاۋ بار. كانديداتتاردىڭ سايلاۋعا قاتىسۋدان باس تارتۋلارى ەشقانداي دا ساياسي جاعداي ەمەس, ولاردىڭ جەكە باسىنىڭ ماسەلەلەرىنە بايلانىستى ەكەنىن اتاپ ءوتتى «Respublica» پارتياسىنىڭ توراعاسى ايداربەك حوجانازاروۆ. ال پارتيا مۇشەسى, كاسىپكەر سىرىمبەك تاۋ «اعايىن, بارلىق جىلى لەبىز بەن قولداۋعا العىس ايتامىن. ماعان كەزدەسكەن ءاربىر قولايسىزدىق مەنى كەلەسى قادامعا قامشىلايدى! مەن سايلاۋدان شەتتەتىلسەم دە, «Respublica» پارتياسىنان كەتپەيمىن», دەپ مالىمدەدى.
سونداي-اق «Respublica» پارتياسى ءاربىر كانديداتى ءۇشىن سايلاۋ جارناسىن تولەۋگە مىندەتتەلدى.
– «Respublica» پارتياسى وسىعان دەيىن وتكەن ءماجىلىس سايلاۋىنا قاتىسپادى, وسىعان وراي «سايلاۋ تۋرالى» كونستيتۋتسيالىق زاڭنىڭ 89-بابىنا سايكەس پارتيا ءتىزىمىن تىركەۋ ءۇشىن وسك شوتىنا سايلاۋ جارناسىن ەنگىزۋگە ءتيىس. جارنا سوماسى تىزىمدەگى ءاربىر ازامات ءۇشىن ەڭ تومەنگى جالاقىنىڭ 15 ەسەلەگەن مولشەرىن قۇرايدى. قازىر «Respublica» پارتياسى سايلاۋ جارناسىن تولىق كولەمدە تولەدى, – دەدى شاۆكات وتەمىسوۆ.
