مينيستر ءوزى باسقارىپ وتىرعان ۆەدومستۆو الدىندا تۇرعان ءبىلىم بەرۋدىڭ قولجەتىمدىلىگى, جوعارى وقۋ ورىندارىنىڭ ينفراقۇرىلىمى, ينكليۋزيۆتى ءبىلىم بەرۋ, تسيفرلاندىرۋ سەكىلدى نەگىزگى تاقىرىپتارعا توقتالدى.
– مينيسترلىكتىڭ باستى باعىتتارىنىڭ ءبىرى – جوعارى بىلىمگە دەگەن قولجەتىمدىلىكتى ساقتاۋ. بۇل ماسەلە نەگە وزەكتى؟ ويتكەنى ەلىمىزدەگى دەموگرافيالىق ءوسىمنىڭ قارقىنى جوعارى. ماسەلەن, ستۋدەنتتەر سانى 2025 جىلعا قاراي 626 مىڭنان 800 مىڭعا دەيىن وسسە, 2030 جىلى ولاردىڭ سانى 1 ملن-نان اسادى. گرانت سانى جىل سايىن 10 مىڭعا ارتىپ كەلەدى. 2030 جىلعا قاراي شاكىرتاقى مولشەرى 100 پايىزعا ۇلعايادى. سونداي-اق دەموگرافيالىق وسىمگە بايلانىستى قوسىمشا قولداۋ تەتىكتەرىن قاراستىرۋ كوزدەلىپ وتىر. بۇگىندە ستۋدەنتتىك جاتاقحانالاردىڭ جەتىسپەۋشىلىگى دە وزەكتى ماسەلەنىڭ ءبىرى. جوعارى وقۋ ورىندارىندا 87 مىڭ توسەكتىك ورىن تاپشىلىعى بايقالادى. بىلتىر ءبىز بۇل كورسەتكىشتى 75 مىڭعا دەيىن تومەندەتە الدىق. قازىر قۇرىلىس سالۋشىلار ءۇشىن مەملەكەتتىك تاپسىرىس شارتتارىن قايتا قارادىق. ەندى ءبىلىم بەرۋدەگى ۇلكەن قۇرىلىس ءداۋىرى باستالادى, – دەدى س.نۇربەك.
سونىمەن قاتار مينيستر ينكليۋزيۆتى ءبىلىم بەرۋدى دامىتۋ جونىندەگى تۇجىرىمداما مەن جول كارتاسىن دايىنداۋ تۋرالى ايتا كەلىپ, جوعارى وقۋ ورىندارى مەن عىلىمي-زەرتتەۋ ينستيتۋتتارىندا ينكليۋزيۆتى ءبىلىم بەرۋدىڭ قولجەتىمدىلىگى تومەن ەكەنىن ايتتى.
– جوعارى وقۋ ورىندارىنىڭ ينفراقۇرىلىمىن كەڭەيتۋ قاجەت. وسى باعىتتا شەتەلدىك ۋنيۆەرسيتەتتەر, ەلدەگى كامپۋس فيليالدارىن سالۋ ءۇشىن ينۆەستورلار تارتىلۋدا. مۇنداي جوعارى وقۋ ورىندارىنىڭ وڭىرلەردەگى فيليالدارى ەلىمىزدىڭ تۇكپىر-تۇكپىرىنەن عانا ەمەس, سونىمەن بىرگە رەسەيدىڭ جاقىن ايماقتارىنان دا ستۋدەنتتەر تارتادى. الداعى جەتى جىل ىشىندە قازاقستاندا شەتەلدىك جوعارى وقۋ ورىندارىنىڭ 12-13 فيليالى اشىلادى, – دەدى مينيستر.
ۆەدومستۆو باسشىسى وڭىرلەردە جاڭا كاسىپتەر اتلاسىن ەنگىزۋ تۋرالى دا ءسوز قوزعادى. ء«بىز قازىر اتلاستاردى وڭىرلىك ەتىپ جاتىرمىز, ويتكەنى وڭىرلىك ەكونوميكانىڭ وزىندىك ەرەكشەلىكتەرى بار. بەس وبلىستا مۇنداي اتلاستار ىسكە قوسىلدى. ءبىز ايماقتىق ۋنيۆەرسيتەتتەردىڭ قىزمەتكەرلەرىن سەرتيفيكاتتاۋعا ۇيرەتەمىز», دەپ ناقتىلادى ول.
مينيسترلىك عىلىمنىڭ دامۋىنا ەرەكشە نازار اۋدارىپ وتىر. س.نۇربەكتىڭ ايتۋىنشا, الداعى ءۇش جىلدا عىلىمدى قارجىلاندىرۋ 3,5 ەسە ارتپاق.
فورۋم اياسىندا عىلىم جانە جوعارى ءبىلىم ءمينيسترىنىڭ ينكليۋزيۆتى ءبىلىم بەرۋ ماسەلەلەرى جونىندەگى كەڭەسشىسى تاڭساۋلە سەرىكوۆ ينكليۋزيۆتى ءبىلىم بەرۋدىڭ ەرەكشەلىكتەرىنە توقتالسا, باتىرحان بەيسەمبەكوۆ, ولەگ شيشاتسكي سەكىلدى ستۋدەنتتەر وزدەرىن تولعاندىرعان وي-پىكىرلەرىن ورتاعا سالدى. دەنساۋلىق ساقتاۋ مينيسترلىگى رەسپۋبليكالىق پسيحيكالىق دەنساۋلىق عىلىمي-پراكتيكالىق ورتالىعىنىڭ باسقارما باسشىسى ايگ ۇلىم ابەتوۆا ستۋدەنتتەردىڭ پسيحيكالىق دەنساۋلىعىن ساقتاۋ جانە ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ الەۋمەتتىك-مادەني دامۋ جونىندەگى پرورەكتورى ءلاززات نۇرقاتوۆا ستۋدەنتتەردىڭ دارىندىلىعىن باسقارۋدىڭ ۇلتتىق مودەلى تاقىرىبىندا بايانداما جاسادى. ءىس-شارادا ستۋدەنتتىك ستارتاپتار, جوعارى وقۋ ورىندارىندا ناشاقورلىقتىڭ الدىن الۋ جانە جاستار اراسىندا سالاماتتى ءومىر سالتىن دامىتۋ سەكىلدى ماسەلەلەر دە ءسوز بولدى.
