وليمپيادا ء«بىر قاتىسۋشى – ءبىر كومپيۋتەر – ءبىر كامەرا» قاعيداسىمەن پروكتورينگ جۇيەسىن قولدانۋ ارقىلى رەسپۋبليكا بويىنشا ءبىر مەزەتتە باستالدى. ونىڭ اۋداندىق كەزەڭى 30 قاڭتار – 3 اقپان ارالىعىندا ءوتتى.
استانا قالاسى بويىنشا 3 205 بالا قاتىستى. قالالىق كەزەڭگە ەڭ كوپ ۇپاي جيناپ, جۇلدەلى ورىندارعا يە بولعان 1 220 بالا ءوتتى. وعان دارىندى بالالارعا ارنالعان مامانداندىرىلعان مەكتەپتەرمەن, رەسپۋبليكالىق جانە حالىقارالىق وليمپيادالارىنىڭ جەڭىمپازدارى قوسىلعاندا بارلىعى 1 582 وقۋشى قالالىق كەزەڭگە قاتىسىپ جاتىر.
«مەكتەپ وقۋشىلارىنىڭ ينتەللەكتۋالدىق دامۋىنا باعىتتالعان كوپتەگەن جۇمىس ادىستەرىنىڭ ىشىندە پاندىك وليمپيادالار ەرەكشە ورىن الادى. مۇنداي پاندىك وليمپيادالاردى وتكىزۋدەگى نەگىزگى ماقساتىمىز جاس زياتكەرلەردى انىقتاپ, ولارعا قولداۋ كورسەتۋ. سونىمەن قاتار, ءتۇرلى دەڭگەيدەگى زياتكەرلىك سايىستاردا جوعارى ساپالى ونەر كورسەتۋ ءۇشىن وليمپيادالىق رەزەرۆتى قالىپتاستىرۋ. رەسپۋبليكالىق وليمپيادانىڭ قالالىق كەزەڭىندە باقتارىن سىنايتىن ەلوردالىق وقۋشىلارعا ساتتىلىك تىلەيمىن!», دەدى قالالىق ءبىلىم باسقارماسىنىڭ باسشىسى قاسىمحان سەنعازىەۆ.
ۇيىمداستىرۋشىلاردىڭ ايتۋىنشا شارا سوڭىندا قاتىسۋشىلاردىڭ جۇمىسى شيفرلانادى جانە تەكسەرۋ ءۇشىن قازىلار القاسىنىڭ مۇشەلەرىنە جىبەرىلەدى. ءار كەزەڭ اياقتالعاننان كەيىن قاتىسۋشىلاردىڭ جۇمىستارى «دارىن» رەسپۋبليكالىق عىلىمي-پراكتيكالىق ورتالىعى, «استانا دارىنى» دارىندى بالالار مەن تالانتتى جاستاردى انىقتاۋ جانە قولداۋ ورتالىعىنىڭ سايتىندا ورنالاستىرىلادى.
وليمپيادا 13-18 اقپان ارالىعىندا وتەدى.
