باق وكىلدەرىنە ارنالعان ءباسپاسوز بريفينگىندە شتاب باسشىسى سەرىك اقىلباي كەزەكتەن تىس سايلاۋعا دايىندىق جانە ونى وتكىزۋ جونىندەگى نەگىزگى ءىس-شارالاردىڭ كۇنتىزبەلىك جوسپارىنا جان-جاقتى توقتالدى.
– 18 اقپان كۇنى ساعات 18:00-دە كانديداتتار مەن پارتيالىق تىزىمدەردى تىركەۋ اياقتالادى. دەپۋتاتتىققا كانديدات ەڭ الدىمەن سايلاۋ قۇقىعىنا يە بولۋى كەرەك. سوت ارەكەتكە قابىلەتسىز دەپ تانىعان, سونداي-اق سوت ۇكىمى بويىنشا باس بوستاندىعىنان ايىرۋ ورىندارىنداعى ازاماتتاردىڭ سايلانۋعا قۇقىعى جوق. پارلامەنت ءماجىلىسىنىڭ دەپۋتاتتىعىنا كانديدات سوڭعى 10 جىلدا ەلىمىزدە تۇراقتى تۇراتىن, 25 جاسقا تولعان قازاقستان ازاماتى بولا الادى, – دەپ شتاب باسشىسى كانديداتقا قويىلاتىن تالاپتاردى ءتۇسىندىرىپ ءوتتى.
س.اقىلباي جۇرگىزىلگەن مونيتورينگ ناتيجەلەرى بويىنشا وكرۋگتىك سايلاۋ كوميسسياسىنا كانديداتتىڭ قازاقستان اۋماعىندا سوڭعى 10 جىل بويى تۇراقتى تۇرۋ سايكەستىگىن انىقتاۋ قيىنعا سوققانىن مالىمدەدى. ونىڭ ايتۋىنشا, مۇنداي دەرەكتەر كوشى-قون قىزمەتىنىڭ تاراپىنان راستالماعان. ال زاڭناما بويىنشا سايلاۋ كوميسسيالارى وكىلەتتى ورگانداردان الىنعان مالىمەتتەردى قايتا تەكسەرۋگە قۇقىلى ەمەس.
«قۇقىقتىق نەگىزدە تۇراقتى تۇرۋدىڭ زاڭدى فاكتىسىن راستاۋ جانە انىقتاۋ تەك سوت تارتىبىمەن انىقتالادى. وسىعان وراي سوت شەشىمىنىڭ نەگىزىندە وكرۋگتىك سايلاۋ كوميسسياسى شەشىمىن قايتا قاراپ, كانديداتتىڭ پارلامەنت ءماجىلىسىنىڭ دەپۋتاتتىعىنا كانديداتتارعا قويىلاتىن تالاپتارعا سايكەستىگىن انىقتادى», دەپ اتاپ ءوتتى س.اقىلباي.
سونداي-اق شتاب مۇشەسى ابدىكارىم اقجانوۆ پارتيالىق تىزىمدەر بويىنشا دا, ءبىر مانداتتى وكرۋگتەر بويىنشا دا دەپۋتاتتىققا كانديداتتار زاڭ ەرەجەلەرىن باسشىلىققا الۋعا مىندەتتى ەكەنىن, ويتكەنى دەپۋتاتتار زاڭ شىعارۋ جانە مەملەكەتتىك شەشىمدەر قابىلداۋ سالاسىندا جاۋاپكەرشىلىك جۇكتەمەسىن كوتەرەتىنىن العا تارتتى. زاڭگەر دۋمان جانپەيىسوۆ سايلاۋ زاڭناماسىنىڭ ىقتيمال بۇزۋشىلىقتاردىڭ تۇرلەرىن, ونىڭ ىشىندە ۇگىت-ناسيحات كەزەڭىنىڭ باستالۋىنا دەيىن ۇگىت ماتەريالدارىن ورنالاستىرۋ, سايلاۋ كۇنى جانە ونىڭ الدىندا ۇگىت ماتەريالدارىن ورنالاستىرۋ تۋرالى ايتتى.
ءىس-شارا سوڭىندا «ادال سايلاۋ ءۇشىن» شتابىنىڭ باسشىسى سەرىك اقىلباي دەپۋتاتتىققا كانديداتتار مەن پارتيالاردى سايلاۋ ناۋقانىن زاڭ شەڭبەرىندە جۇرگىزۋگە شاقىردى.
