وسى تەكسەرۋ بارىسىندا 427 نىساندا تەحنيكالىق رەتتەۋ, اككرەديتتەۋ جانە ولشەم بىرلىگىن قامتاماسىز ەتۋ سالاسىنداعى زاڭنامانىڭ ورەسكەل بۇزىلعانى انىقتالدى. ياعني نىساندارداعى زاڭسىزدىق ۇلەسى 85 پايىزدى قۇراعان.
«پروفيلاكتيكالىق باقىلاۋ جۇرگىزۋ بارىسىندا ءونىمدى وتكىزۋ ساتىسىندا تەحنيكالىق رەتتەۋ سالاسىنداعى زاڭ بۇزۋشىلىقتار انىقتالدى. اتاپ ايتقاندا, كەيبىر كاسىپكەرلىك سۋبەكتىلەرى تەحنيكالىق رەگلامەنتتەردىڭ تالاپتارىنا سايكەس كەلمەيتىن ونىمدەردى ساتىپ كەلگەن. زاڭدا كورسەتىلگەن تالاپقا باعىنباۋ نەگىزىنەن ءونىمدى تاڭبالاۋ جونىندەگى تالاپتاردى ساقتاماۋ, قازاق جانە ورىس تىلدەرىندە اقپاراتتىڭ بولماۋى, ەاس بەلگىسىنىڭ بولماۋى, سونداي-اق سايكەستىكتى باعالاۋ تۋرالى قۇجاتسىز جۇرگىزىلگەن. مۇنداي كەلەڭسىزدىكتەر «Sulpak» ساۋدا ءۇيى, «تەحنودوم», «مەچتا» ساۋدا ۇيلەرىنە, «ارەنا S», «كومپاس», «نوۆايا ازس», «دين», «كومفورت», «ستيك», «كازترانسكارگو», «اريماكس» جاۋاپكەرشىلىگى شەكتەۋلى سەرىكتەستىكتەرى مەن باسقا دا نىساندارعا قاتىستى بولىپ وتىر», دەيدى تەحنيكالىق رەتتەۋ جانە مەترولوگيا كوميتەتىنىڭ الماتى قالالىق دەپارتامەنتىنىڭ باسشىسى ساۋىقبەك قاپاەۆ.
سونداي-اق وتكەن جىلى دەپارتامەنت اتىنا ءونىمنىڭ تر جانە نقا تالاپتارىنا سايكەستىگىنە قاتىستى كوپتەگەن حات پەن ءوتىنىش كەلىپ تۇسكەن. مىسالى, «قازاقستان اۆتوحيمياسىن وندىرۋشىلەر مەن تۇتىنۋشىلار قاۋىمداستىعىنىڭ ءوتىنىشى بويىنشا تەحنيكالىق رەگلامەنتتەر مەن نورماتيۆتىك-قۇقىقتىق اكتىلەردە بەلگىلەنگەن تالاپتارعا سايكەس كەلمەيتىن كولىك قۇرالدارىنا قاجەتتى سالقىنداتقىش سۇيىقتىقتاردى اينالىمعا شىعارعانى ءۇشىن 7 اكىمشىلىك ءىس قوزعالدى.
بۇدان بولەك, جانار-جاعارماي قۇيۋ ستانسالارىندا بەنزين قۇياتىن قۇرىلعىلاردىڭ اقاۋىن انىقتاۋ بويىنشا تالاپ بۇزۋ فاكتىلەرى انىقتالدى, ياعني اقاۋلى قۇرىلعىلار ءار 20 ليترگە 170-تەن 250 مل-گە دەيىن جانارمايدى جەتكىزبەي قۇيىپ كەلگەن. تاعى ءبىر مىسال, ءىرى ءسۇت ونىمدەرىن ساتۋشىنىڭ ءبىرى ساۋدا نۇكتەسىندەگى تاۋاردى بەلگىلەنگەن تارتىپپەن سالىستىرىپ-تەكسەرىلمەگەن تارازىلاردا ولشەپ ساتقانى انىقتالدى. ساتۋشىعا 1600 اەك مولشەرىندە اكىمشىلىك ايىپپۇل سالىنعان, بۇل – 4 900 000 تەڭگە.
الماتى
