ءماجىلىس سايلاۋىنا جالپىۇلتتىق سوتسيال-دەموكراتيالىق پارتياسى 19 كانديدات ۇسىندى. ونىڭ 31,6 پايىزىن ايەلدەر, جاستار جانە مۇگەدەكتىگى بار ادامدار (6 ادام) قۇرايدى. وسىلايشا, پارتيا زاڭ بويىنشا بەلگىلەنگەن كۆوتانى ساقتاپ وتىر.
«ورتالىق سايلاۋ كوميسسياسى مەملەكەتتىك ورگاندارمەن بىرلەسىپ, تىزىمگە ەنگەن كانديداتتاردىڭ كونستيتۋتسيا مەن «سايلاۋ تۋرالى» كونستيتۋتسيالىق زاڭنىڭ تالاپتارىنا سايكەستىگىن تەكسەردى. پارتيالىق تىزىمدە كورسەتىلگەن بارلىق ادام كونستيتۋتسيانىڭ جانە «سايلاۋ تۋرالى» كونستيتۋتسيالىق زاڭنىڭ تالاپتارىنا تولىقتاي سايكەس كەلەدى», دەپ مالىمدەدى وسك مۇشەسى اناستاسيا ششەگورتسوۆا.
سونداي-اق ول اتالعان پارتيانىڭ پارلامەنت ءماجىلىسى دەپۋتاتتارىنىڭ 6-شاقىرىلىمداعى سايلاۋىنا قاتىسپاعانىن ايتتى. سول ءۇشىن جسدپ-عا جارنا تولەۋ مىندەتتەلدى. ايتا كەتەيىك, ەڭ تومەنگى جالاقىنىڭ 15 ەسەلەنگەن مولشەرى 1 050 000 (15ح70 000) تەڭگەنى قۇرايدى.
«جسدپ «سايلاۋ تۋرالى» زاڭنىڭ 88-بابىنا سايكەس پارتيا ءتىزىمىن تىركەۋ ءۇشىن وسك شوتىنا سايلاۋ جارناسىن تولەۋى قاجەت. جارنا سوماسى ەڭ تومەنگى جالاقىنىڭ 15 ەسەلەنگەن مولشەرىن قۇرايدى. ول پارتيالىق تىزىمگە ەنگىزىلگەن ءاربىر ادام ءۇشىن جەكە ەنگىزىلۋگە ءتيىس. قازىر جسدپ سايلاۋ جارناسىن تولىق كولەمدە تولەدى», دەدى اناستاسيا ششەگورتسوۆا.
جالپىۇلتتىق سوتسيال-دەموكراتيالىق پارتياسى ءوزىن وپپوزيتسيالىق پارتيا رەتىندە تانىتىپ, بۇعان دەيىن وتكىزىلگەن ءماجىلىس سايلاۋىنا قاتىسۋدان باس تارتقان ەدى. دەسە دە, «بۇل ۋاقىت ارالىعىندا ەل نازارىنان تىس قالىپ, تاراپ كەتكەن جوقپىز», دەيدى پارتيا وكىلدەرى.
ء«بىز وسى جولى سايلاۋعا قاتىسامىز دەپ شەشىم قابىلدادىق. سەنىمىمىز زور. 19 كانديداتىمىزدىڭ بارلىعى دەپۋتات بولۋعا لايىقتى. حالىققا دا جاقسى تانىس. وسىعان دەيىنگى سايلاۋعا قاتىسپاعانىمىزدىڭ بىرنەشە سەبەبى بار. ءبىز سايلاۋ زاڭىنا وزگەرىس ەنگىزۋ قاجەتىن ايتقان ەدىك. قازىرگى ماجوريتارلىق جۇيەنى ەنگىزۋ, پارتيالىق تىركەۋ مولشەرلەمەسىن ازايتۋ, كانديداتتار ۇلەسىندەگى ايەلدەر سانىنىڭ باسىم بولۋى سەكىلدى ماسەلەنى ايتىپ, كوتەرگەن ەدىك. حالىقارالىق ۇيىمنىڭ مۇشەسىمىز, سايلاۋدا بەكىتىلگەن 30 پايىزدىق ۇلەستى ءبىز بۇرىننان ايتىپ كەلە جاتىرمىز. ايتقان ماسەلەمىز, تالابىمىز ءجۇز پايىز بولماسا دا ورىندالىپ كەلەدى», دەدى جسدپ ءتىزىمى بويىنشا دەپۋتاتتىققا كانديدات ماقسۇت ناسيبۋلوۆ.
