تۇركيانىڭ وڭتۇستىك-شىعىسىنداعى كاحرامانماراش قالاسى – ءزىلزالانىڭ ەپيدورتالىعى, جەرمەن جەكسەن بولعان ءوڭىردىڭ ءبىرى. تۇرىك اعايىندارعا جالاۋ بولىپ, ەلدەن جىلۋ جيناعان جۋرناليست نۇربەك بەكباۋ قازىر كاحرامانماراشتا كيىز ۇيلەردىڭ العاشقى لەگىن جەتكىزىپ, يگى ءىستىڭ بەل ورتاسىندا ءجۇر. قازاق ۇيلەرىن وزىمەن بارعان 12 ادام قۇرىپ, تىگەدى. بەلسەندىنىڭ ايتۋىنشا, كيىز ۇيلەر قالاداعى پارك, ورمانعا ورناتىلىپ جاتىر. بۇل جەر ەتنوكەنتكە اينالماق.
«بۇل قالاشىقتى ءزىلزالادان جۇرەگى شايلىعىپ, قورقىپ قالعان تۇرعىنداردى تىنىقتىرىپ, رۋحاني سەرپىن بەرۋ ماقساتىندا پايدالانامىز», دەپ جاتىر تۇرىك بيلىگى. «كيىز ۇيلەر شاتىرلارعا قاراعاندا جىلى ءارى جايلى. ءبىز ءوزىمىز تىككەن بويدا ەكسپەريمەنت جاساپ, وسىندا تۇنەدىك. 30 كيىز ءۇي تىگىلدى. بۇل – قاراعاندىلىق اعايىننىڭ بوز ۇيلەرى. وشاقتارىمىز كەلىپ ۇلگەرمەدى, سول سەبەپتى سۋىقتاۋ بولدى. كاحرامانماراش قالاسى تاۋدا ورنالاسقان, سوندىقتان كۇن سالقىنداپ, تۇندە 17-20 گرادۋسقا دەيىن تومەندەدى. ال بۇل دالادا قالعان ادام ءۇشىن ءتىپتى اۋىر. ءبىز مەيلىنشە بارلىق كيىز ۇيلەردى تەز ارادا قۇرىپ, ادامداردى ورنالاستىرۋعا تىرىسىپ جاتىرمىز. 8 جانە 12 قانات ءبىر كيىز ۇيگە 20 شاقتى ادام سىيادى», دەدى نۇربەك بەكباۋ.
ال قۇتقارۋشىلار تۇركياعا تابان تىرەگەن كۇننەن باستاپ 7 ادامدى قۇتقاردى. قايتىس بولعان 67 ادامنىڭ, ونىڭ ىشىندە 6 بالانىڭ دەنەسىن ءۇيىندى استىنان شىعاردى. قازىرگى ۋاقىتتا گازيانتەپ قالاسىندا ءبىرىنشى ەشەلونمەن بارعان قۇتقارۋشىلار تاۋلىك بويى ەكى اۋىسىمدا جۇمىس ىستەپ جاتىر. تجم تارتقان رەسمي مالىمەت بويىنشا قۇتقارۋشىلاردىڭ ءبىرىنشى توبى تولىعىمەن قيراعان توعىز قاباتتى عيماراتتى نىساناعا العان. بۇل جەردە ۇيىندىلەردىڭ استىنان 4 ادام قۇتقارىلىپ, 8 قازا تاپقان ادامنىڭ دەنەسى شىعارىلعان. قۇتقارۋشىلاردىڭ ەكىنشى توبى التىقاباتتى عيماراتتا جۇمىس جۇرگىزىپ جاتىر. عيمارات ءىشىنارا قيراعان, الايدا وعان توتەپ كىرۋ مۇمكىن ەمەس, ونىڭ تولىق قيراۋ قاۋپى بار. سوندىقتان ماماندار عيماراتتىڭ 2-قاباتىنا دەيىن ينجەنەرلىك تەحنيكامەن دەمونتاج جۇرگىزگەن. ۇيىندىلەردىڭ اراسىنان قايتىس بولعان 19 ادامنىڭ دەنەسى تابىلعان. ءۇشىنشى توپ تا التى قاباتتى عيماراتتا جۇمىس جاساپ جاتىر. ءۇي تولىعىمەن قيراعان, ودان قايتىس بولعان 18 ادامنىڭ دەنەسى شىعارىلعان. سونىمەن قاتار ەكىنشى ەشەلونمەن بارعان ەل قۇتقارۋشىلارى نۋرداگى قالاسىنداعى تولىعىمەن قيراعان عيماراتتا ادامداردىڭ ورنالاسقان جەرى مەن جاي-كۇيىن انىقتاۋ, ۇيىندىلەر استىندا زارداپ شەككەندەرمەن اۋديوبايلانىس ورناتۋ, قاجەتتى كومەكتىڭ كولەمى مەن سيپاتىن انىقتاۋ بويىنشا جۇمىستار جۇرگىزىپ جاتىر. ولار جەدەل ءارى ستراتەگيالىق ءىس-قيمىلدارىنىڭ ناتيجەسىندە كولەمى 18 مىڭ تەكشە مەتردەن استام ءۇيىندىنىڭ استىنان ءۇش ادامدى قۇتقارىپ العان. سونداي-اق قايتىس بولعان 4 ادامنىڭ دەنەسى شىعارىلعان.
وكىنىشكە قاراي, ءۇيىندى اراسىنان قازاقستان ازاماتتارىنىڭ دەنەسى دە تابىلدى. سىرتقى ىستەر مينيسترلىگى 10 اقپاندا تۇركيانىڭ وڭتۇستىك-شىعىسىنداعى كاحرامانماراش قالاسىندا قۇتقارۋ-ىزدەستىرۋ جۇمىستارى بارىسىندا قازاقستان ازاماتى جانار جاقسىبەكوۆانىڭ دەنەسى تابىلعانىن حابارلادى. ونى الماتىدان كەلگەن تۋىستارى تانىعان.
«قازاقستان ديپلوماتتارى قازا تاپقان وتانداسىمىزدىڭ دەنەسىن كاحرامانماراشتان انتالياعا جانە ودان ءارى الماتىعا جەتكىزۋگە, سونداي-اق قاجەتتى قۇجاتتاردى رەسىمدەۋگە بارىنشا جاردەم كورسەتتى. كەشە ءمايىت تالدىقورعان قالاسىنا جەتكىزىلدى. تاسىمالداۋ شىعىندارىنىڭ بارلىعىن مەملەكەت ءوز موينىنا الدى. سونىمەن قاتار Pegasus تۇرىك اۆياكومپانياسىمەن قازا تاپقان قازاقستان ازاماتىنىڭ بىرگە كەلگەن تۋىستارىنا 90 پايىزدىق جەڭىلدىك بەرۋ تۋرالى ۋاعدالاستىققا قول جەتكىزىلدى», دەلىنگەن ءسىم حابارلاماسىندا.
سونىمەن قاتار ءزىلزالا كەزىندە بەلگىلى سپورتشى, تاەكۆوندودان 6 دان قارا بەلبەۋ يەگەرى مۇستافا وزتۇرىكتىڭ تۋىستارى قايتىس بولدى. تۋىستارى اپات بولعان كەزدە ولارمەن بايلانىسقا شىعا الماي, نۇراي مەن بۋشرا قازاققا ىزدەۋ سالىپ, جان-جاققا حابارلاسقان.الەۋمەتتىك جەلىدە تاراعان اقپاراتتارعا سۇيەنسەك, قۇتقارۋشىلار حاتاي پروۆينتسياسىنداعى دەفنە اۋدانىندا قيراعان ءۇيدىڭ ۇيىندىسىنەن ەتنوستىق قازاقتار نۇراي مەن بۋشرا قازاقتىڭ ءمايىتىن تاپقان. مارقۇمدار مۇستافا وزتۇرىكتىڭ تۋىستارى ەكەنى بەلگىلى بولدى. 57 جاستاعى نۇراي قازاق – مۇستافا وزتۇرىكتىڭ تۋعان اعاسى رۋستام وزتۇرىكتىڭ قىزى. ۇزاق ۋاقىت بويى يوردانيادا تۇرعان ول حاتايعا كوشىپ بارعان. قىزى بۋشرا 31 جاستا بولعان. تابيعي اپاتتان اجال قۇشقان اناسى مەن قىزىن تۋىستارى ىستانبۇل قالاسىندا جەرلەيتىندەرىن ايتتى.
