بۇل ءۇندىستاننىڭ تۋريزم سالاسىنداعى جىل سايىنعى ءىرى ءىس-شارالارىنىڭ ءبىرى, وندا سالانىڭ دامۋىندا ايتارلىقتاي ءوسىم كورسەتكەن ۇزدىك كومپانيالار مەن تۋريستىك ورىندار اتاپ وتىلەدى.
Travelscapes - ۇكىمەتتىك مەكەمەلەر, ءبىرىنشى دارەجەلى قوناقۇيلەر, تۋريزم يندۋسترياسى, ەلشىلىكتەر جانە كورپوراتيۆتىك سەكتورلار اراسىندا تانىمال ۇندىلىك كاسىبي b2b باسىلىمى.
ماراپاتتاۋ راسىمىنە مادەنيەت جانە سپورت مينيسترلىگى تۋريزم يندۋسترياسى كوميتەتىنىڭ توراعاسى داستان رىسپەكوۆ قاتىستى.
ء«ۇندىستان ازاماتتارى ءۇشىن 14 كۇندىك ۆيزاسىز رەجيم ەنگىزىلگەننەن بەرى ءبىز قازاقستانعا ءۇندى ساياحاتشىلارى سانىنىڭ ايتارلىقتاي وسكەنىن كورىپ وتىرمىز جانە ءبىز تانىمال تۋريستىك باعىت رەتىندە تانىلعانىمىزدى ماقتان تۇتامىز. بۇل جەتىستىك قازاقستاندى قالالىق, ەكولوگيالىق, قىزىقتى وقيعالى, مادەني جانە MICE تۋريزم باعىتى رەتىندە ىلگەرىلەتۋدە بىرلەسكەن كۇش-جىگەردىڭ ناتيجەسى», دەپ اتاپ ءوتتى داستان رىسپەكوۆ.
ايتا كەتەيىك, وتكەن جىلى ەلىمىزگە 28 300 ءۇندىستان ازاماتى كەلگەن.
بۇگىنگى تاڭدا Eqonaq اقپاراتتىق جۇيەسىنىڭ دەرەكتەرى بويىنشا قازاقستاننىڭ قوناق ۇيلەرىندە ءۇندىستاننان 2000-نان استام قوناق توقتاعان. ءۇندىستان ازاماتتارى قازاقستاننىڭ الماتى, استانا جانە شىمكەنت سياقتى ءىرى قالالارىندا دەمالۋدى ءجون كورەدى.
سونداي-اق قازاقستان بيىل دەليدە ءوتىپ جاتقان وڭتۇستىك ازياداعى ەڭ ءىرى ساياحات جانە تۋريزم كورمەسى-SATTE-گە قاتىسادى, ءۇندىستان رەسپۋبليكاسى تۋريزم مينيسترلىگىنىڭ قولداۋىمەن قازاقستان شانحاي ىنتىماقتاستىق ۇيىمى ەلدەرىنىڭ ستەندىندە وتەۋسىز نەگىزدە ۇسىنىلعان.
قازاقستاندىق دەلەگاتسيا قۇرامىندا قر مادەنيەت جانە سپورت مينيسترلىگى تۋريزم يندۋسترياسى كوميتەتىنىڭ, Kazakh Tourism, ءتورت وتاندىق تۋروپەراتور جانە اۋە كومپانيالارىنىڭ وكىلدەرى بار
