قۇرمانعازى قازاق مۋزىكاسىنىڭ تاريحىنا اڭىزعا اينالعان تۇلعا رەتىندە ەندى. كۇيشى بالا كەزىنەن العىرلىعىمەن, وتكىر تىلىمەن ەرەكشەلەنىپ, قوس ىشەكتى دومبىرانى جانىنان تاستامادى. ونىڭ كۇيلەرىندە تۋعان جەرگە دەگەن سۇيىسپەنشىلىك, زامانىنىڭ بەينەسى سۋرەتتەلەدى. سونداي-اق شىعارمالارى ارقىلى ەلىنىڭ ازاتتىعىن, ەركىندىگىن اڭسايدى. بۇگىندە قازاق ونەرىنە ۇلتىنىڭ ءۇنىن قالدىرعان كۇيشى-كومپوزيتوردىڭ ەسىمىن ۇلىقتاۋ – ەلگە امانات.
قازاقستاننىڭ ەڭبەك سىڭىرگەن قايراتكەرى, پروفەسسور ايتقالي جايىموۆ جەتەكشىلىك ەتەتىن قازاق وركەسترى دە قۇرمانعازىنىڭ شىعارمالارىن كەزەكتى رەت ورىنداپ, كورەرمەندى ءتانتى ەتتى. جالپى, كۇيدىڭ قۇدىرەتى سول, دۇرىلدەتە اسپانعا شاپشىپ ويناعان كەزدە تىڭداعان ادامنىڭ دەلەبەسىن قوزدىرادى ەمەس پە؟..
اتالعان كەشتى اشقان مەملەكەت جانە قوعام قايراتكەرى دارحان مىڭباي ۇلت رۋحانياتىنىڭ دامۋىنداعى كۇيشىلىك ونەردىڭ جانە قۇرمانعازى تۇلعاسىنىڭ ماڭىزىنا توقتالدى. اسىرەسە قازىرگى تاڭدا دومبىرا مەن كۇي قۇندىلىعىنا دەگەن قوعامنىڭ كوزقاراسى تۇزەلۋ كەرەك ەكەنىن اتاپ ءوتتى.
كۇي كەشىندە قۇرمانعازىنىڭ «اقباي», «كىشكەنتاي», «سەرپەر», «سارىارقا», «بالبىراۋىن», «كوبىك شاشقان», «الاتاۋ», «كوك الا ات», باسقا دا كۇيلەرى ورىندالدى. سونىمەن قاتار كونتسەرتكە قازاقستاننىڭ ەڭبەك سىڭىرگەن قايراتكەرى انار مۇزداحانوۆا, مادەنيەت سالاسىنىڭ ۇزدىگى ءامينا بوشىموۆا, رەسپۋبليكالىق بايقاۋلاردىڭ لاۋرەاتتارى مۇحيت سالىبەكوۆ, ايىم بەكباەۆا, سۇلتان ساركەنوۆ, قايرات جۇماعاليەۆ قاتىستى. ديريجەر – مادەنيەت قايراتكەرى نۇرلان بەكەنوۆ. ءبىرتۋار كومپوزيتوردىڭ ولمەس كۇيلەرىن قازاق وركەسترىنىڭ مۋزىكانتتارى مەن سوليستەرى جوعارى دەڭگەيدە ورىندادى.
