قمدب-نىڭ پاۆلودار وبلىسى بويىنشا ءباسپاسوز قىزمەتىنىڭ مالىمەتىنشە, سالتاناتتى شاراعا پاۆلودار وبلىسىنىڭ باس يمامى جولداس بەرتىمۇراتوۆ جانە قالانىڭ قادىرلى اتا-اپالارى, ارداگەرلەر, مەشىت جاماعاتى قاتىستى. شارا اتالمىش مەشىتتىڭ باس يمامى ءابدىسامات ايتقازى ۇلىنىڭ قاسيەتتى قۇران اياتتارىن وقۋمەن باستالدى.
– كۇردەلى جوندەۋدەن ءوتىپ, ۇلعايتىلعان بيجان مەشىتى 200-گە جۋىق جاماعات ءبىر مەزگىلدە ناماز وقي الاتىن مۇمكىندىكپەن قامتىلعان. يمامدار بولمەسى, ايەلدەر ناماز وقيتىن جانە ءدارىس الاتىن, قىزمەتشىلەر بولمەلەرى, سونىمەن قاتار جاماعاتتىڭ سىرت كيىمدەرىن شەشىپ, ارنايى دارەت الىپ, جۋىناتىن ورىندار قاراستىرىلعان, – دەيدى ءباسپاسوز حاتشىسى امانتاي تويشىباي ۇلى.
بيجان – مەشىتى العاش وسى وڭىردەگى بيجان شوقىباس ۇلى ەسىمدى مەتساناتتىڭ ۇيىمداستىرۋىمەن 1923 جىلى قاراعاي اعاشىمەن سالىنىپ, 1991 جىلعا دەيىن كەڭەس ۇكىمەتى داۋىرىندە دە ءۇزىلىسسىز ءدىني قىزمەت اتقارىپ كەلگەن جالعىز مەشىت. مەشىتتىڭ نەگىزىن قالاۋشى بيجان شوقىباس ۇلى 1931 جىلى تۇتقىندالىپ, رەسەيدىڭ قاراسۋىق قالاسىندا تۇرمەدە قايتىس بولعان. كوپ ۋاقىتقا دەيىن بيجان ەسىمىنە تىيىم سالىنعان.
ال 2005 جىلى پاۆلودار قالاسىنىڭ تۋماسى راحات مارۋان ۇلى ءوز قاراجاتىمەن ەسكى بيجان مەشىتىن قايتا تۇرعىزىپ, جاڭعىرتىپ, ەلدىڭ العىسىنا بولەنگەن.
