ەلىمىزدىڭ بىرقاتار ءوڭىرى سەيسميكالىق قاۋىپتى ايماقتا تۇر

سەيسمولوگيا ينستيتۋتى ديرەكتورىنىڭ عىلىم جونىندەگى ورىنباسارى نۇرسارسەن وزبەكوۆتىڭ ايتۋىنشا، ەلىمىزدىڭ بىرقاتار ءوڭىرى سەيسميكالىق قاۋىپتى ايماقتا تۇر. 

«شىعىس قازاقستان وبلىسىنان باستاپ، قىزىلوردا وبلىسىنا دەيىن جەراستى دۇمپۋلەرى 7-9 باللعا دەيىن جەتۋى مۇمكىن سەيسميكالىق قاۋىپتى جەرلەر بار. اسىرەسە الماتى وبلىسى بۇل جاعىنان ورتالىق ازياداعى وتە قاۋىپتى ايماقتا ورنالاسقان. بۇرىن بۇل جەردە كۇشتى جويقىن جەر سىلكىنىسى بىرنەشە رەت بولعان. ماسەلەن، 1887 جىلعى ۆەرنىي جەر سىلكىنىسىن جانە 1911 جىلعى كەمين جەر سىلكىنىسىن ايتۋعا بولادى»، دەدى ول. 

سونداي-اق ينستيتۋت ماماندارى قازىر ەلىمىزدىڭ سەيسميكالىق قاۋىپتىلىك كارتاسىن ازىرلەپ جاتىر. سەيسميكالىق اۋدانداۋ، ايماقتارعا ءبولۋ دەپ اتالاتىن كارتالاردا مۇندا سەيسميكالىق قاۋىپتى، سەيسميكالىق بەلسەندى ايماقتاردىڭ سەيسميكالىق الەۋەتىنىڭ كورسەتكىشى  دە كورسەتىلەدى. سونىمەن قاتار باسقا كارتالار دا قۇراستىرىلعان، ونىڭ ىشىندە ەلدى مەكەندەر ءۇشىن جاسالعان كارتالار بار.   بۇل رەتتە، الماتى قالاسى ء ۇشىن  سەيسميكالىق ميكروايماقتاندىرۋ كارتاسى ازىرلەندى.

نۇرسارسەن وزبەكوۆتىڭ ايتۋىنشا، سوڭعى بەس جىلدا قازاقستان اۋماعىندا سەيسميكالىق اسپاپتارمەن 40 مىڭعا جۋىق جەر سىلكىنىسى تىركەلدى. بۇل - گەولوگيالىق ايماقتىڭ سەيسميكالىق كورىنىستەگى ءومىرى.

ايتا كەتەيىك، سوڭعى بەس جىلدا قازاقستان اۋماعىندا 66 سەيسميكالىق وقيعا تىركەلدى. 2018 جىلى – 20، 2019 جىلى – 11، 2020 جىلى – 15، 2021 جىلى – 11، 2022 جىلى – 9. الماتىدا ايقىن سەزىلگەن سوڭعى جەر سىلكىنىسى 2022 جىلدىڭ 28 جەلتوقسانىندا الماتىدان 190 شاقىرىم جەردە قىرعىزستان مەن قىتايدىڭ شەكارالاس جەرىندە بولدى.