ۇمىتكەرلەردى تىركەۋ باستالدى

«اۋىل» پارتياسى ءماجىلىس سايلاۋىنا 25 كانديدات ۇسىنىپ وتىر. كو­ميس­سيا قىزمەتكەرلەرىنىڭ ايتۋىنشا، ونداعى جاستاردىڭ ۇلەسى تالاپقا ساي كەلەدى. بۇعان دەيىن پارتيانىڭ ەكى كاندي­داتى وتكەن جىلى پرەزيدەنت ساي­لاۋىنا، سونداي-اق 7 مۇشەسى 2021 جىلى پارلامەنت ءماجىلىسىنىڭ سايلاۋىنا قاتىسقان. وسى جولى ۇسىنىلعان 25 كان­دي­داتتىڭ 15-ءنىڭ اگرارلىق ءبىلىمى بار.

– كانديداتتار ءتىزىمى پارتيامىزدىڭ سەزىندە بەكىتىلدى. 25 ۇمىتكەردىڭ 6-ى ايەل، 3 جاس كانديدات جانە ينكليۋزيۆتى قو­عامنىڭ ءبىر وكىلى بار. زاڭدىق تۇرعىدان العاندا بارلىق تالاپتارعا ساي كەلىپ تۇرمىز، كۆوتا 36 پايىزعا ورىندالدى. كان­دي­داتتارىمىزدىڭ ورتا جاسى 43 جاستى قۇ­رايدى، ەڭ جاس كانديداتىمىز 25 جاستا. الداعى سايلاۋعا ءۇمىتىمىز زور، تالابى­مىز دا جاقسى. ءبىزدىڭ پارتيادان 237 ادام ءماجىلىس دەپۋتاتى بولدى، – دەدى «اۋىل» حدپ توراعاسىنىڭ ورىنباسارى اناس باققوجاەۆ.

سونداي-اق بۇعان دەيىن ورتالىق «قازاقستان حالىق پارتياسى»، «اق جول»، «جالپىۇلتتىق سوتسيال-دەموكراتيالىق پارتيا» جانە «بايتاق» پارتيالارىنىڭ قۇجاتىن قابىلداعان ەدى. «اق جول» پارتيا­سىنىڭ كوشباسشىسى ازات پەرۋا­شەۆتىڭ ايتۋىنشا، پارتيادان پارتيالىق ءتىزىم بويىنشا – 54، ءبىر مانداتتىق وكرۋگ بويىنشا 24 كانديدات ۇسىنىلعان.

– ساياسي پارتيالار نەگىزى كەلەسى سايلاۋعا دايىندىقتى وتكەن سايلاۋدىڭ ەرتەڭىنەن باستاۋلارى كەرەك. ءبىز وسى قاعيدانى ۇستانىپ، قاجەتتى جۇمىستى باستاپ كەتتىك، ەندىگى سايلاۋعا دايىنبىز، – دەدى ازات پەرۋاشەۆ.

ازات پەرۋاشەۆتىڭ ءوزى پارتيالىق ءتىزىم بويىنشا كانديداتتىققا ۇسىنىلىپ وتىر جانە ءار پارتيا جەتەكشىسى ءدال وسىلاي ارەكەت ەتۋى ءتيىس دەپ ەسەپتەيدى. ءبىر مانداتتى وكرۋگ بويىنشا «اق جولدان» ۇمىتكەرلەر اراسىندا اقمولا وبلىسىنان مەرۋەرت قازبەكوۆا جانە پاۆلودار وبلىسىنان فۋات ساتىباەۆ سەكىلدى باق وكىلدەرى دە بار. پارتيالىق تىزىمدە جاس كاسىپكەرلەر دە تابىلدى، ەڭ جاسى 25-تەن ەندى اسقان.

– ارينە، ءبىز تاجىريبەلى دەپۋتات رەتىندە ساياسي ارەنادا ءوزىن تانىتىپ ۇلگەرگەندەردى عانا ۇسىنبايمىز. مىن­دەتىمىز – جاڭا كوشباسشىلاردى جەتەلەۋ، سوندىقتان جاڭا تۇلعالاردىڭ سانى ايتارلىقتاي كوپ بولادى. جالپى، جاستاردى دارىپتەپ جاتقانىمىز – جەكە قالاۋىم عانا ەمەس، زاڭ تالاپتارىنا دا ساي كەلىپ تۇر. ءبىز جاستارعا، ايەلدەرگە جانە مۇگەدەكتەرگە ارنالعان 30 پايىزدىق كۆوتانى تولىق ورىنداپ تۇرمىز. ايتا كەتۋ كەرەك، بۇل كۆوتا 5 جانە 6-شاقىرىلىمداردا ەنگىزىلگەنگە دەيىن ماجىلىستەگى «اق جول» فراكتسياسىنىڭ 40 پايىزعا جۋىعىن ايەلدەر قۇرادى، – دەدى پارتيا جەتەكشىسى.

سونىمەن قاتار «جالپىۇلتتىق سوتسيال-دەموكراتيالىق پارتيا» اتىنان قۇجاتتاردى ورتالىق سايلاۋ كوميسسياسىنا پارتيانىڭ ساياسي بىرلەستىگى ورتالىق اپپاراتىنىڭ جەتەكشىسى تالعات وماروۆ تاپسىردى.

– ءبىز جسدپ-دان ماجىلىسكە كاندي­دات­تاردىڭ ءتىزىمىن سانالى تۇردە تۇزدىك، بار­لىعى – 19 ادام. ماجوريتارلىق جۇيە بويىنشا سايلاۋعا التى كانديدات – اتىراۋ، قوستاناي، قىزىلوردا، پاۆلو­دار، اقمولا وبلىستارى مەن الماتى قالا­سىنان قاتىسادى. ولار قۇجاتتاردى ۋچاس­كەلىك كوميسسيالارعا تاپسىردى، – دەدى ول.

تالعات وماروۆ جسدپ اۋىل تۇرعىن­دارى­نىڭ ماسەلەلەرىن كوتەرىپ، بۇل سۇراق­تاردى شەشۋگە بار كۇش-جىگەرىن سالىپ جات­قانىن اتاپ ءوتتى. ايتۋىنشا اۋىل تۇر­عىن­دارى پارلامەنت دەڭگەيىندە شەشۋدى قاجەت ەتەتىن ماسەلەلەر بار ەكەنىن تۇسىنەدى. سوندىقتان قۇرامىندا تانىمال تۇلعالارى بار پارتيا سايلاۋشىلاردىڭ قولداۋىنا ءۇمىت ارتادى. سونداي-اق ول وتكەن سايلاۋلارعا قاتىسپاۋىنىڭ سەبەبىن ايتىپ ءوتتى.

– پارتيانىڭ وتكەن سايلاۋعا قاتىسۋ­دان باس تارتۋىنىڭ باستى سەبەبى – سايلاۋ زاڭ­ناماسىنىڭ جەتىلدىرىل­مەگەن­دىگى. بىز­دە سەنىمسىزدىك بولدى، ويت­كەنى سايلاۋ ۋچاس­كەلەرىنىڭ بارلىق حات­تا­مالارىن جاريا­لاۋ تۋرالى ۇسىنى­سىمىز ەلەنبەدى. قازىر وزگەرىستەر ەنگىزىلدى، ارينە، ءبىز قالا­عانداي ەمەس. بىراق زاڭنامادا ءالى دە شي­كىلىك بار، ودان ءارى جەتىلەتىنىنە ۇمىت­تەنەمىز. ال ءبىز پارلامەنتتە وكىلدىك ەتسەك، بۇل ءۇشىن بار كۇشىمىزدى سالامىز. وندا ەلەكتوراتىمىزدىڭ مۇددەسىن ءبىلدىرۋ ءۇشىن كۇرەسەتىن بولامىز، – دەدى جسدپ وكىلى.

ال «بايتاق» جاسىلدار پارتياسىنىڭ ۇمىتكەرلەر ءتىزىمىن ۇيىم توراعاسى ازاماتحان ءامىرتاي تاپسىردى. ءماجىلىس سايلاۋىنا كانديداتتاردىڭ 18-ءى – پارتيالىق ءتىزىم، تورتەۋى ءبىر مانداتتى وكرۋگتەر بويىنشا قاتىسادى. «بايتاقتىڭ» ساياسي بىرلەستىك رەتىندە قۇرىلعانىنا ەكى اي عانا بولعانىمەن، «جاسىلدار» 2015 جىلدان بەرى بەلسەندى جۇمىس ىستەپ كەلەدى. ولار باستى نازاردى ارال، سەمەي، قازاقستاننىڭ باتىسىنداعى جەر قويناۋىن پايدالانۋ قالدىقتارى پروبلەماسىن شەشۋگە اۋدارىپ كەلەدى. «بايتاق» پارتياسى كومىرقىشقىل گازىنىڭ نولدىك شىعىندىلارىنا قول جەتكىزۋ ءۇشىن ۇلكەن كۇش سالۋدى جوسپارلاپ وتىر. ازاماتحان ءامىرتاي باستاپقىدا 43 پارتيا مۇشەسىنىڭ ءتىزىمى قارالعانىن ايتتى. بىراق سوڭىندا ولار تەك 18-ءىن قالدىرۋدى ۇيعارعان.

– نەگىزگى ماسەلە – قارجىلاندىرۋ، سوندىقتان شىعىنداردى ازايتۋ تۋرالى شەشىم قابىلداندى. سوڭعى جەتى جىلدا پارتيانى ءوز قاراجاتىمنان قارجى­لاندىردىم. وسى كۇنگە دەيىن دەمەۋشى تاپپادىق، مەملەكەت اقشاسىنا قول جەتكىزبەدىك. ءوزىم استانا قالاسىنداعى ءبىر مانداتتى وكرۋگتەن ءماجىلىس سايلاۋىنا قاتىسامىن، قۇجاتتارىمدى تاپسىرىپ قويدىم، – دەدى ازاماتحان ءامىرتاي.

ايتا كەتەيىك، پارتيانىڭ ۇمىتكەرلەرى قىزىلوردا، تۇركىستان وبلىستارى، الماتى جانە استانا قالالارىنداعى ءبىر مانداتتى سايلاۋ وكرۋگتەرى بويىنشا دا ۇسىنىلىپ جاتىر.