زياتكەرلەردىڭ شەتەلدە كەزدەسۋى

ءيا، NIS الەمدى باعىندىرۋدى كوزدەگەن جاستار ءۇشىن ناعىز الەۋ­مەتتىك ليفتكە ۇلاسىپ، ۇلكەن مۇمكىن­دىكتەر مەكەنىنە اينالدى. ونى قازاق بالالارىنىڭ تالابىنا تاڭداي قاق­قان ءاربىر شەتەل ازاماتى مويىندايدى. ماسەلەن، Hochschule Rhein-Waal ستۋدەنتى امينا باقتياروۆا شى­عىس قازاقستان وبلىسىنداعى قاسىم قايسەنوۆ اتىنداعى قاراپايىم اۋىل­دىق مەكتەپتەن قانات قاققان ءبىلىم يەسى. بۇگىن­دە نەمىس ءتى­لىن جەتىك مەڭگەرىپ، ءورى­سىن كەڭەيتىپ جاتىر.

– ءبىر شەت ءتىلىن مەڭگەرۋدىڭ ازدىق ەتەتىنىن ءتۇسىنىپ، نەمىس تىلىنە قىزىعا باستادىم، 12-سىنىپتا IELTS ەمتيحانىنان 8.0 بالل جيناپ، قاتارىنان بىرنەشە ۋنيۆەرسيتەتكە، سونىڭ ىشىندە ەكونوميكا جوعارى مەكتەبىنە گرانتقا شاقىرتۋ الدىم. مەن گەرمانياداعى رەين-ۆاال قولدانبالى عىلىمدار ۋنيۆەرسيتەتىن تاڭدادىم. ول سولتۇستىك رەين-ۆەستفالياداعى كلەۆە قالاسىندا ورنالاسقان. قازىرگى ۋاقىتتا بيوينجەنەريا سالاسىندا وقيمىن. قازاق­ستاندىق عىلىمدا، سونىڭ ىشىندە فارماتسەۆتيكادا ءوزىمنىڭ قولتاڭبامدى قالدىرۋدى ارماندايمىن. بوس ۋاقىتىمدا شىعار­ماشىلىقپەن اينالىسىپ، اعىلشىن تى­لىن­دە ولەڭدەر جازامىن، ەكى كىتاپ شى­عارىپ تا ۇلگەردىم، – دەيدى ا.باق­تياروۆا.

ونىڭ ايتۋىنشا، اۋىلداعى مەكتەپتە وقىپ جۇرگەن كەزىندە شەتەلدە ءبىلىم الىپ، بىرنەشە ءتىلدى جەتىك مەڭگەرەمىن دەگەن وي مۇلدە بولماعان. NIS اسقاق ارمانىنا باسپالداق بولدى. زياتكەرلىك مەكتەپكە تۇسكەننەن كەيىن وزىنە دەگەن سەنىمى ارتىپ، «وتان الدىنداعى جاۋاپكەرشىلىك»، «اكادەميالىق ادالدىق»، «قوعامعا قىز­مەت ەتۋ» ۇعىمىن بويىنا سىڭىرەدى.

مويىنداۋ كەرەك، نازارباەۆ زياتكەر­لىك مەكتەپتەرى ءوز وقۋشىلارىنا بىرەگەي ءۇمىت پەن مۇمكىندىك بەردى. كەزدەسۋگە قاتىسۋشىلار گەرمانياداعى بيوحيميا، تسيفرلىق تەحنولوگيا، ماشينا جاساۋ، ينجەنەريا، لوگيستيكا جانە ەكولوگيا سالالارىندا مامانداندىرىلعان ۇزدىك ۋنيۆەرسيتەتتەردە ءبىلىم الۋدا. سونىڭ ءبىرى – بەيبارىس ەسەنگەلدين. ول ەكى جىل بۇرىن شىمكەنتتەگى فيزيكا-ماتەماتيكا باعىتىنداعى NIS-ءتى تامامداعان. قازىر Szent Istvan University-دە وقيدى. جوعارى وقۋ ورنىندا بەيبارىستىڭ جاراتى­لىستانۋ-ماتەماتيكالىق باعىت­تاعى اكادەميالىق دايىندىعى عانا ەمەس، NIS-ءتىڭ جان-جاقتى ءبىلىمى مەن ماڭىزدى ادامي قابىلەتتەرگە باۋليتىنى تاڭعال­دىردى.

تالدىقورعانداعى زياتكەرلىك مەك­تەپ­تىڭ تۇلەگى، بۇگىندە Technische Hochschule Würzburg-Schweinfurt ستۋدەنتى نازيرا ومىربەكوۆاعا اتا-انا­سى وسى جيىننان قالماۋعا كەڭەس بەرگەن. ال الماتىداعى فيزيكا-ماتەما­تيكا باعىتىنداعى NIS تۇلەكتەرى ەلي­كاي اتاباەۆا ميۋنحەن تەحنيكالىق ۋنيۆەرسيتەتىندە، ءاديا بەكداۋلەتوۆا شۆاينفۋرت قولدانبالى عىلىمدار ۋنيۆەرسيتەتىندە، مادينا قاراقۇلوۆا ميۋنحەندەگى ليۋدۆيگ جانە ماكسيميليان ۋنيۆەرسيتەتىندە وقيدى. ولار دا وسى جيىندى اسىعا كۇتكەنىن جاسىرمادى.

باسقوسۋ بارىسىندا كريستينا مۋ­ليار پاۆلودارداعى NIS تۇلەكتەرىنىڭ العاشقى لەگىن تانىستىردى. بۇگىندە ول گامبۋرگتە جۇمىس ىستەيدى. مەكتەپتەگى اكادە­ميالىق دايىندىعىنىڭ ناتيجە­سىندە ۋنيۆەرسيتەتتەگى زامانداستارى­نان ەرەكشەلەنگەنىن مويىندادى. پەترو­پاۆل­داعى NIS-ءتىڭ وكىلى انگەلي­نا بەندەر Technische Universität Munchen-دە تسيفرلىق تەحنولوگيالار سالا­سىن مەڭگەرگەن مامان. بۇگىندە ول گەرما­نياداعى ەڭ ءىرى ساقتاندىرۋ كومپا­نيا­لارىنىڭ بىرىندە جۇمىس ىستەيدى جانە سۇيىكتى مەكتەبىنەن مۇمكىندىكتەر مەن ۇلكەن قولداۋ العانىن جاسىرمايدى. ورالداعى NIS تۇلەگى دانەل بەگاليەۆ براندەنبۋرگ قالاسىنان كەلگەن. ول كوتبۋس-زەنفتەنبەرگ تەحنيكالىق ۋني­ۆەر­سيتەتىندە قورشاعان ورتانى باسقارۋ ماماندىعى بويىنشا وقيدى. ال ءاليحان نۇرداۋلەت ەلورداداعى فيزيكا-ماتەماتيكا زياتكەرلىك مەك­تەبىن بىتىرگەن. قازىر Karlsruher Institut fur Technologie-دە ماشينا جاساۋ ماماندىعىندا ءبىلىم الۋدا.

ابدۋللاكيم زاميربەكۋلۋ كەزدەسۋ­دىڭ كۇتپەگەن ءارى ەرەكشە قوناعىنا اينالدى. ول – بولاشاق داتا-اناليتيك، The University of Messina-دا ءبىلىم الۋدا. بىشكەك حالىقارالىق مەكتەبىنىڭ تۇلەگى ابدۋللاكيم نازارباەۆ زياتكەر­لىك مەكتەپتەرىنىڭ تۇلەكتەرىنە ءتان قاسيەتتەردىڭ ارقاسىندا تابىسقا جەتۋ­دىڭ جولىن ءتۇسىنۋ ءۇشىن يتاليادان فرانك­فۋرتقا ارنايى ات باسىن بۇرعان.

كەزدەسۋدىڭ شىرايىن كەلتىرگەن ەۋروپانىڭ وزىق ۋنيۆەرسيتەتتەرىنىڭ ۇزدىك ستۋدەنتتەرى زياتكەرلىك مەكتەپتىڭ تۇلەكتەرى. ولار NIS باۋىرلاستىعىن ماقتان تۇتادى. قيىن ۋاقىتتا ءبىر-بىرىنە قولداۋ كورسەتىپ، جەكە وقيعالارىمەن شابىتتاندىرۋعا ارقاشان دايىن. «زيات­كەرلىك مەكتەپتەر تۇلەكتەرىنىڭ باستى ارتىقشىلىعى – اكادەميالىق جەتىس­تىكتەر ەمەس، ادامي قاسيەتتەر»، دەيدى ا.زاميربەكۋلۋ.

گەرمانيانىڭ ءار جەرىندە تۇرىپ، ءبىلىم الىپ جاتقان كەزدەسۋ قاتىسۋشىلارى العاش رەت فرانكفۋرتتەگى قازاقستان رەسپۋبليكاسىنىڭ باس كونسۋلدىعىندا جينالىپ وتىر. ديپلوماتتار تاراپىنان جاسالعان جايلى ءارى وتباسىلىق اتموسفەرا، شىنايى ديالوگ پەن ءدامدى داستارقان ۇيلەرىنەن جىراقتا جۇرگەن بالالاردىڭ كوڭىلىنەن شىقتى.

– بۇگىندە گەرمانيادا ءبىلىم الىپ جاتقان ءاربىر قازاقستاندىق ستۋدەنت – ءوز ەلىنىڭ وكىلەتتى وكىلى، ولار اباي، احمەت بايتۇرسىن ۇلى، ءاليحان بوكەيحان، مىرجاقىپ دۋلات ۇلى جانە قازاقتىڭ باسقا دا ءبىرتۋار پەرزەنتتەرىنىڭ رۋحاني مۇراسىن الەمگە تانىتۋدا، – دەپ اتاپ ءوتتى فرانكفۋرت قالاسىنداعى باس كونسۋل تاۋبولدى ۇمبەتباەۆ.

جيىن سوڭىندا «نازارباەۆ زياتكەر­لىك مەكتەپتەرى» دەربەس ءبىلىم بەرۋ ۇيىمىنىڭ باسقارما توراعاسى كۇلاش ءشامشيدينوۆا ءاربىر تۇلەك ەلگە قىزمەت ەتۋ كەرەكتىگىن ايتتى. «گەرمانياداعى كەزدەسۋ جەلتوقسان-قاڭتار ايلارىندا NIS تۇلەكتەرىنىڭ تۋعان جەرىندە باسىن قوسقان ءبىرىنشى «Samgau» فورۋمىنىڭ زاڭدى جالعاسى. زياتكەرلىك مەكتەپتىڭ ءاربىر وقۋشىسى، مۇعالىمى، اتا-اناسى ءبىزدىڭ تۇلەكتەرىمىزدىڭ قازاقستاندى الەمگە لايىقتى تانىتىپ، «Alumni NIS» قاعيدالارىنا اينالعان «وتاندى ءسۇيۋ»، «الەمدى وزگەرتۋ»، «ناعىز تۇلعا» بولۋدى ناسيحاتتايتىنىن ماقتان تۇتادى»، دەدى ك.ءشامشيدينوۆا.

كەلەلى كەزدەسۋ قورىتىندىسىندا تۇلەكتەر ەستەلىك سۋرەتكە ءتۇسىپ، تار­قادى.