– وتكەن جىلى ويىمدا جۇرگەن ءبىراز دۇنيەنى اق پاراققا ءتۇسىردىم. ەكى حيكايات جازدىم. ونىڭ بىرەۋىن مادەنيەت جانە سپورت مينيسترلىگى ساتىپ السا, بىرەۋى ءوزىمنىڭ تارتپامدا جاتىر. بۇگىنگى زامان تىنىسىن بەينەلەگەن بىرقاتار اڭگىمە تۋدى. «ديۋانانىڭ ءبيى» جازۋشى, قايراتكەر شەرحان مۇرتازانىڭ 90 جىلدىعىنا ارنالعان ادەبي بايقاۋدا ءبىرىنشى جۇلدەنى يەمدەندى. سونداي-اق «ەح, بوستاندىق» دەگەن اڭگىمەم «قازاق ادەبيەتى» گازەتىنىڭ جەلتوقسان ايىنداعى سانىندا جارىق كوردى.
جاس كۇنىمنەن قالامىم قاڭتارىلىپ كورگەن ەمەس. كوكەيدە سان پروبلەما قول بۇلعاپ تۇرادى ەمەس پە؟ ادەبيەت پەن تاۋەلسىزدىككە قاتىستى ويلارىمدى, شامام كەلگەنشە جازىپ ءجۇرمىن. مىسالى, «جاپون, جاپون دەگەنشە» اتتى ماقالامدى الەۋمەتتىك جەلىنىڭ قولدانۋشىلارى جاقسى تالقىلادى. بەلگىلى مەملەكەت جانە قوعام قايراتكەرى التىنبەك سارسەنباەۆ تۋرالى «التىنبەكتى نەگە ايتپايمىز؟» دەگەن تولعانىسىم دا كوپشىلىكتىڭ كوڭىلىنەن شىعىپ, وعان ءبىراز وقىرمان پىكىر جازدى.
جاڭا جىل باستالىسىمەن «قالامگەر» ادەبي-تانىمدىق پورتالىندا «اۋلا سىپىرۋشى», «ادەبيەت» پورتالىندا «كۇنانىڭ بەرگى بەتى» اتتى ىستىعى سۋىماعان ەكى اڭگىمەم جارىق كوردى. ەندى ء«تىل» تۋرالى ءبىر حيكايات جازسام دەگەن ويىم بار, ءازىر نوبايى كوكىرەگىمدە كۇمبىرلەپ تۇر.
