ەكىباستۇزدا جىلۋمەن جابدىقتاۋ جۇيەسىنە اۋقىمدى جوندەۋ جۇرگىزىلەدى

ەنەرگەتيكا، يندۋستريا جانە ينفراقۇرىلىمدىق دامۋ مينيسترلىكتەرىنىڭ، «تكش قازورتالىعى» اق، اتوم جانە ەنەرگەتيكالىق قاداعالاۋ جانە باقىلاۋ كوميتەتىنىڭ وكىلدەرى ەكىباستۇزعا باردى. جوندەۋ جۇمىستارىنىڭ بارىسىمەن تانىسقاننان كەيىن جۇمىس توبىنىڭ مۇشەلەرى الەۋمەتتىك نىساندار مەن كوپپاتەرلى تۇرعىن ۇيلەردى ارالادى.

«بۇگىنگى تاڭدا ەكىباستۇز جەو-دا بەس قازاندىق – ەكى ەنەرگەتيكالىق جانە ءۇش سۋ جىلىتۋ قازاندىعى جۇمىس ىستەپ تۇر. تاعى 5 قازاندىقتا جوندەۋ جۇمىستارى جۇرگىزىلىپ جاتىر. سونىمەن قاتار جىلۋ جەلىسىنىڭ زاقىمدانۋىن جويۋ بويىنشا تاۋلىك بويى جۇمىس جۇرگىزىلىپ جاتىر. قازىرگى ۋاقىتتا جوندەۋمەن قامتىلعان ورامىشىلىك ۋچاسكەلەردە توعىز زاقىم بار»، دەپ جازادى ۇكىمەتتىڭ ءباسپاسوز قىزمەتى.

سونىمەن قاتار ەكىباستۇزدا جىلۋ بەرۋ تەمپەراتۋراسىن رەتتەۋ جۇمىستارى جالعاسىپ جاتىر. نورماتيۆكە سايكەس، ول 77/53وس (شىعۋ كەزىندە)، قازىرگى كەزدەگى ناقتى كورسەتكىش – 64/45وس (شىعۋ كەزىندە) بولۋى كەرەك.

«6 اقپاندا جىلۋدىڭ تەمپەراتۋرالىق پارامەترلەرىنىڭ تومەندەۋىنە بايلانىستى مەكتەپ وقۋشىلارىن قاشىقتان وقىتۋ فورماتىنا كوشىرۋ تۋرالى شەشىم قابىلداندى. جۇمىس اياقتالعاننان كەيىن وقىتۋ فورماتى شتاتتىق رەجيمدە قالپىنا كەلتىرىلەدى»، دەلىنگەن حابارلامادا.

قالادا جۇيەلى تۇردە جىلىنبايتىن 28 كوپپاتەرلى تۇرعىن ءۇي بار. وسىعان بايلانىستى جىلىتۋ ماۋسىمى كەزەڭىندە وسى ۇيلەردى جىلۋمەن جابدىقتاۋ جۇيەلەرىن نەعۇرلىم جوعارى پارامەترلەر بويىنشا باپتاۋ تۋرالى شەشىم قابىلداندى. بارلىق جۇمىستاردى ءتيىستى كوممۋنالدىق كاسىپورىندار جۇرگىزەدى.

«سونداي-اق قالادا جىلىتۋ ماۋسىمى اياقتالعاننان كەيىن باستالاتىن اۋقىمدى جوندەۋ ناۋقانىنا دايىندىق جۇرگىزىلە باستادى. بۇگىنگى تاڭدا قالالىق جىلۋمەن جابدىقتاۋ جۇيەسىنە تەحنيكالىق اۋديت جۇرگىزىلىپ جاتىر. بۇل رەتتە مەملەكەتتىك ساراپتامادان وتەتىن جالپى ۇزىندىعى شامامەن 5 كم بولاتىن ءتورت ماگيسترالدى رەكونسترۋكتسيالاۋ جوسپاردا بار»، دەپ جازادى ءباسپاسوز قىزمەتى.