7 اقپاندا الماتى قالالىق قىلمىستىق ىستەر جونىندەگى مامانداندىرىلعان اۋدانارالىق سوتى قاڭتار وقيعاسى كەزىندە اقشا ايىرباستاۋ پۋنكتتەرىنىڭ ءبىرىنىڭ جانىندا كىسى ءولتىردى دەگەن كۇدىككە ىلىنگەن ءىلياس بايدۋاليەۆكە قاتىستى ۇكىم شىعاردى. ول 8 جىلعا باس بوستاندىعىنان ايىرىلدى، دەپ حابارلايدى Egemen.kz.
بۇعان دەيىن ءىلياس بايدۋاليەۆكە قاساقانا كىسى ءولتىردى دەگەن ايىپ تاعىلعان ەدى.
ايىپتالۋشىنىڭ قورعاۋشىسى الما مۋسينانىڭ ايتۋىنشا، ينكاسساتورلار توناۋشىلاردى ءوز بەتىنشە ۇستاۋعا تىرىسقان. ولار پوليتسياعا حابارلاسۋ مۇمكىن بولماعان سوڭ، ۇستالعانداردىڭ قۇجاتتارى مەن تەلەفوندارىن الىپ، قۇقىق قورعاۋ ورگاندارىنا مۇمكىندىگىنشە تەزىرەك بەرۋ ءۇشىن كولىگىن بازاعا شىعارۋ تۋرالى شەشىم قابىلداعان. ءبىر ساتتە ۇرىلاردىڭ ءبىرى ءارى جابىرلەنۋشى نىعمەتجانوۆ قاشىپ كەتۋگە تىرىسىپ، ءسۇرىنىپ قۇلاعان. بايدۋاليەۆ ونى قۇلاعان ورنىنان تۇرعىزباق بولعان كەزدە ابايسىزدا وق اتىلعان. كەيىن قالەجان نىعمەتجانوۆ 6 قاڭتاردا اۋرۋحانادا قايتىس بولعانى انىقتالدى.
سوتتالۋشىعا قر قىلمىستىق كودەكسىنىڭ 106-بابى 3-تارماعى «دەنساۋلىققا قاساقانا اۋىر زيان كەلتىرۋ» بويىنشا ايىپ تاعىلدى.
«قىلمىستى زەرتتەۋ كەزىندە سوتقا دەيىنگى تەرگەۋ بارىسىندا دا، سوتتا دا بارلىق دالەلدەر ەسكەرىلدى. سوت قر قىلمىستىق كودەكسىنىڭ 99-بابى 15-تارماعىنىڭ 2-بولىگى (كىسى ءولتىرۋ) بويىنشا پروكۋروردىڭ ۇستانىمىمەن كەلىسپەدى. ايىپتاۋ قورىتىندىسىندا بايدۋاليەۆ ونى اتىپ ولتىرۋگە ادەيى شەشىم قابىلداعانى جانە جابىرلەنۋشى قىلمىس ورنىندا قايتىس بولعاندىعى ناقتى كورسەتىلگەن. بۇل كۋاگەرلەردىڭ ايعاقتارىمەن جانە دارىگەرلەردىڭ قورىتىندىسىمەن دالەلدەندى. سوت كىسى ءولتىرۋ ابايسىزدا بولعانىن جوققا شىعاردى»، دەدى الماتى قالاسى قىلمىستىق ىستەر جونىندەگى مامانداندىرىلعان اۋدانارالىق سوتىنىڭ سۋدياسى ەرلان بولاتوۆ.
سوت كىنانى ءىشىنارا مويىنداۋ تۇرىندەگى كىنانى جەڭىلدەتەتىن ءمان-جايلاردىڭ بولۋىن، بايدۋاليەۆتىڭ اسىراۋىندا جاس بالالاردىڭ بولۋىن جانە نىعمەتجانوۆتىڭ زاڭعا قايشى مىنەز-قۇلقىن ەسكەردى. ينكاسساتور 8 جىلعا باس بوستاندىعىنان ايىرىلدى.
ايتولعان ءجۇنىسحان،
ل.ن.گۋميلەۆ اتىنداعى ەۇۋ ستۋدەنتى
قوعام • بۇگىن، 21:22
سپورت • بۇگىن، 21:21
اسكەر • بۇگىن، 21:20
اسكەريلەردىڭ الەۋمەتتىك الەۋەتى
اسكەر • بۇگىن، 21:19
ايماقتار • بۇگىن، 21:17
قوعام • بۇگىن، 21:16
ۇقساس جاڭالىقتار
