سوڭعى جارىس كۇنى ارالاس كوماندالىق سىندا (2 قىز بەن 2 ۇل) الماتى قالاسىنىڭ ءبىرىنشى كومانداسى ايتارلىقتاي باسىمدىقپەن جەڭىسكە جەتتى. ودان كەيىنگى ورىنعا الماتى-2 كومانداسى مەن شقو سپورتشىلارى تۇراقتادى.
جالپى ەسەپتە الماتى قالاسى جەكە-دارا توپ جاردى. شىعىس قازاقستان وبلىسى 2-ورىن السا, الماتى وبلىسى ۇزدىك ۇشتىكتى تۇيىندەدى.
بارلىعى «سۇڭقار» حالىقارالىق شاڭعى ترامپليندەر كەشەنىندە 4 ءوڭىردىڭ (الماتى قالاسى, شقو, جەتىسۋ جانە الماتى وبلىسى) 100-دەن استام سپورتشىسى 5 جاس ساناتىنا ءبولىنىپ, سىنعا ءتۇستى. ولار جەكەلەي سىندا ك-20 (12 جاس), ك-40 (13-15 جاس), ك-60 (14-16 جاس), ك-95 (17-20 جاس) تۇعىرىنان سەكىرسە, كوماندالىق باسەكە ك-90 ترامپلينىندە ءوتتى.
«جارىس وزىمە قاتتى ۇنادى. قيىن بولدى دەپ ايتا المايمىن. دەسە دە تارتىس سوڭىنا دەيىن سوزىلدى. شاڭعىمەن تۇعىردان سەكىرۋگە 6 جاسىمدا كەلگەنمىن. بيىل وسى سپورتپەن اينالىسقانىما 10 جىل بولادى. كۋميرىم – دانيل ۆاسيلەۆ. جاقىن ارادا ونىمەن بىرگە جاتتىعىپ, بىرگە ونەر كورسەتۋدى قالايمىن», دەدى 3 التىن مەدال (جەكەلەي جانە كوماندالىق) جەڭىپ العان الماتىلىق يليا ميزەرنىح.
قازىر ەندى الماتىدا كيورلينگشىلەر شەبەرلىك بايقاسىپ جاتىر. 2 قالا مەن 8 وبلىستان كەلگەن كوماندا (200-گە تارتا جاس سپورتشى) 2 توپقا بولىنگەن. جەڭىمپاز بەن جۇلدەگەرلەر 12 اقپاندا بەلگىلى بولادى.
جالپى بيىلعى كەشەندى جارىس بارىسىندا 11 سپورت تۇرىنەن ۇزدىكتەر انىقتالادى. بارلىق باسەكەدەن سوڭ ءار سپورت تۇرىنەن ەلىمىزدىڭ جاستار قۇراماسى جاساقتالىپ, الداعى حالىقارالىق رەسمي جارىستارعا, ونىڭ ىشىندە 2024 جىلى وڭتۇستىك كورەيانىڭ كانۆوندو قالاسىندا وتەتىن قىسقى جاسوسپىرىمدەر وليمپياداسىنا باراتىن سپورتشىلار انىقتالادى. سونداي-اق 2026 جىلعى ميلانداعى (يتاليا) وليمپيا ويىندارىنا ساپالى دايىندىق جۇرگىزۋگە قاتىساتىن مىقتى سپورتشىلار ىرىكتەلەدى.
ويىنداردىڭ سالتاناتتى اشىلۋى 23 اقپاندا, ساعات 14:00-دە پاۆلودار قالاسىندا, ال جابىلۋى 8 ءساۋىر, ساعات 14:00-دە استانا قالاسىندا وتەدى.
