رەسپۋبليكالىق كونكۋرس ناتيجەسىندە 35 جاسقا دەيىنگى 50 تالانتتى جاس عالىم جانە 25 جەتەكشى عالىم مەملەكەتتىك عىلىمي ستيپەنديالارعا يە بولعانى بەلگىلى. مينيستر ۇزدىكتەردى ماراپاتتاۋ بارىسىندا عىلىمنىڭ الداعى دامۋ باعدارىنا قاتىستى مىندەتتەرمەن دە ءبولىستى.
ونىڭ ايتۋىنشا, پرەزيدەنتتىڭ عىلىم سالاسىنداعى قولداۋىنىڭ ناتيجەسىندە وڭ وزگەرىستەر ورىن الىپ جاتىر. زاڭناما جەتىلدىرىلىپ, عىلىم سالاسىنا بولىنگەن قارجىلاندىرۋ ەكى ەسەگە جۋىق ءوستى. جاس عالىمدارعا ايتارلىقتاي قولداۋ كورسەتىلىپ, عىلىمي-زەرتتەۋ ينستيتۋتتارىنىڭ بازاسى جاڭارتىلىپ جاتىر. عالىمدار جەتەكشى عىلىمي ورتالىقتاردا تاعىلىمدامادان ءوتىپ ءجۇر.
– مەملەكەت باسشىسىنىڭ تاپسىرماسى بويىنشا عىلىم جانە جوعارى ءبىلىم مينيسترلىگى عالىمدار مەن عىلىمي ۇيىمداردىڭ, جوعارى جانە جوعارى وقۋ ورنىنان كەيىنگى ءبىلىم بەرۋ ۇيىمدارىنىڭ قىزمەتكەرلەرىن جان-جاقتى قولداۋ ماسەلەلەرىنە نازار اۋدارىلىپ وتىر. وسى جىلدان باستاپ وتاندىق عىلىمنىڭ دامۋىنداعى جاڭا كەزەڭ باستالادى. گرانتقا يە بولعان 1 200-گە جۋىق عالىم جالاقىمەن قامتاماسىز ەتىلىپ, كەپىلدەندىرىلگەن قارجىلاندىرۋ اياسىنداعى زەرتتەۋلەر ۇزدىكسىز جالعاسادى. سونداي-اق گرانتتىق جانە ماقساتتى قارجىلاندىرۋ تەتىكتەرى وزگەرتىلىپ, كەيىنگى جىلدارى عىلىمدى قارجىلاندىرۋ ەكى ەسەگە جۋىق ءوستى. راسىمدەردىڭ اشىقتىعىن قامتاماسىز ەتە وتىرىپ, عىلىمدى دامىتۋ, عالىمدارعا قولداۋ كورسەتۋ جالعاسىن تابادى, – دەپ اتاپ ءوتتى مينيستر.
مينيسترلىكتىڭ مالىمەتىنە سۇيەنسەك, عىلىمي زەرتتەۋلەردى قولداۋ ءۇشىن الداعى 3 جىلدا 650 ملرد تەڭگە ءبولىنىپ, عىلىمدى كوممەرتسيالاندىرۋعا جانە قولدانبالى عىلىمعا باسىمدىق بەرىلمەك. تىڭ يدەيالار مەن ۇزدىك ونەرتابىستاردى جۇزەگە اسىرۋ ءۇشىن 75 ملرد تەڭگە قاراستىرىلعان. وتكەن جىلى عالىمداردىڭ جالاقىسى 2 ەسەگە دەيىن ءوستى.
عالىمداردىڭ مارتەبەسى وسسە, عىلىم دا داميدى. ال عىلىمى دامىعان ەلدىڭ ەكونوميكاسى دا قارىشتايتىنى انىق. عىلىمي قاۋىمداستىقتى جىگەرلى قادامدارعا ۇندەگەن مينيستر الداعى ۋاقىتتا عىلىم الدىنداعى تۇرعان كەلەلى مىندەتتەردىڭ ناتيجەسى ەل ومىرىنەن كورىنىس بەرەدى دەگەن سەنىم ءبىلدىردى.
الماتى
