اگەنتتىكتىڭ مالىمەتىنشە, الدىمەن 6,4 جانە 6,6 ماگنيتۋدالى ەكى جەر سىلكىنىسى نۋرداگى جانە يسلاحيە اۋدانىندا تىركەلگەن. ودان سوڭ جەراستى ءدۇمپۋى ادانا, انكارا, انتاليا, گازيانتەپ, كايسەري, مەرسين, ترابزون, ۋرفا, حاتاي, وسمانيە, شانلىۋرفا, ديارباكىر, مالاتيادا جارتى ساعات بويى تولاستاماعان. سونداي-اق مىسىر, ليۆان, سيريا, يراكتا دا سەزىلگەن. جەر سىلكىنىسىنەن كەيىن 32 افتەر سىلكىنىس تىركەلگەن. ەڭ كۇشتىسىنىڭ ماگنيتۋداسى – 6,6.
قازىر ەلدە ەڭ جوعارى توتەنشە جاعداي جاريالاندى. بيلىك حالىقارالىق كومەككە جۇگىندى. بارلىق جەردە ىزدەستىرۋ-قۇتقارۋ جۇمىستارى مەن زالالدى باعالاۋ جۇمىستارى جۇرگىزىلىپ جاتىر. «ەلدە دابىلدىڭ ەڭ جوعارى دەڭگەيى جاريالاندى. ءبىز توتەنشە جاعدايلار باسقارماسىمەن بىرگە وڭىرگە قۇتقارۋشىلار جىبەردىك», دەدى تۇرىك ەلىنىڭ ءىىم.
وسى ۋاقىتقا دەيىن مالاتيا پروۆينتسياسىندا 23 ادام قازا تاۋىپ, 420 ادام جارالانعان, ديارباكىر پروۆينتسياسىندا 6 ادام ءولىپ, 79 ادام جاراقات الدى, ونداعان عيمارات قيراعان. شانلىۋرفا پروۆينتسياسىنىڭ گۋبەرناتورى ساليح ايحان 15 ادام قازا تاۋىپ, 30 ادام جارالانعانىن حابارلادى. انادولى اگەنتتىگىنىڭ سوڭعى اقپاراتىنا سۇيەنسەك, الاپات جەر سىلكىنىسى سالدارىنان ەلدىڭ 10 پروۆينتسياسىندا كوز جۇمعاندار سانى 1000-عا جۋىقتاعان. بۇعان قوسا, تۇركياعا ىرگەلەس جاتقان سيريا ەلى دە ءزىلزالادان قاتتى زارداپ شەككەن, جەرگىلىكتى دەنساۋلىق ساقتاۋ مينيسترلىگىنىڭ مالىمەتىنشە, 500-دەن اسا ادام قازا تاپقان.
سيريانىڭ الەپپو, يدليب, لاتاكيا, حاما قالالارىندا ونداعان ادام عيمارات قيراندىلارىنىڭ استىندا قالدى. سيريا ۇكىمەتى الەپپو, حاما, لاتاكيا وڭىرلەرى ەڭ كوپ زارداپ شەككەنىن ايتادى. سيريا قورعانىس مينيسترلىگى بۇل ايماقتارعا ارميا تارتۋ جوسپارلانىپ وتىرعانىن حابارلادى. سيريا مۇراجايلار دەپارتامەنتىنىڭ مالىمەتىنشە, جەر سىلكىنىسى كەزىندە بۇۇ-نىڭ دۇنيەجۇزىلىك مۇراسى الەپپو تسيتادەلى زاقىمدانعان. ال تۇركيانىڭ وزىندە تابيعي اپات سالدارىنان گازيانتەپتەگى XVII عاسىرعا تيەسىلى تاريحي قامال زارداپ شەككەن. سونىمەن قاتار تۇركيانىڭ وڭتۇستىك-شىعىسىنداعى حانتاي پروۆينتسياسىنداعى جالعىز اۋەجايدىڭ ۇشۋ-قونۋ الاڭى تولىق قيراعان. سوڭعى ساناق بويىنشا 140 عيمارات قيراعان. سونداي-اق كاحرامانماراش پەن حانتاي پروۆينتسيالارىندا گاز قۇبىرلارىندا جارىلىس بولعان.
جالپى, تۇركيا بيلىگىنىڭ مالىمەتىنشە, ەلدە كەم دەگەندە 22 جەراستى ءدۇمپۋى بولىپ, 10 پروۆينتسيا زارداپ شەككەن. بيلىك تۇرعىنداردى كولىكتى پايدالانباۋعا, ۇيلەرگە كىرمەۋگە, توتەنشە جاعدايلار قىزمەتىنە ورىنسىز حابارلاسپاۋعا شاقىرادى.
تۇركيادا ورىن العان جويقىن جەر سىلكىنىسى سالدارىنان زارداپ شەككەندەر مەن قازا تاپقانداردىڭ اراسىندا قازاقستان ازاماتتارى جوق, دەپ حابارلادى سىرتقى ىستەر مينيسترلىگىنىڭ رەسمي وكىلى ايبەك سمادياروۆ.
«تۇركيا رەسپۋبليكاسىنداعى ەلشىلىگىمىزدىڭ اقپاراتىنا سايكەس, تۇركيانىڭ وڭتۇستىك-شىعىسىنداعى قۋاتتى جەر سىلكىنىسىنەن كەيىن قازاقستان ازاماتتارىنان ءوتىنىش تۇسكەن جوق. كونسۋل تۇركيانىڭ توتەنشە جاعدايلار جونىندەگى باسقارماسىمەن ۇنەمى بايلانىستا وتىر. قازىرگى ۋاقىتتا زارداپ شەككەندەر نەمەسە قازا تاپقاندار تىزىمىندە قازاقستان ازاماتتارى جوق. سونىمەن قاتار قيراندىلاردىڭ وتە كوپ بولۋىنا بايلانىستى قۇتقارۋ جۇمىستارىنىڭ جالعاسىپ جاتقانىن ەسكەرگەن ءجون», دەدى ايبەك سمادياروۆ ۆەدومستۆودا وتكەن بريفينگتە.
تۇركياداعى سۋىق حاباردى ەستي سالا مەملەكەت باسشىسى قاسىم-جومارت توقاەۆ تۇركيا پرەزيدەنتى رەجەپ تايپ ەردوعانعا كوڭىل ايتۋ جەدەلحاتىن جولداپ, ۇكىمەتكە تۇركيانىڭ وڭتۇستىك-شىعىسىندا بولعان جويقىن جەر سىلكىنىسىنىڭ سالدارىن ەڭسەرۋدە شۇعىل كومەك كورسەتۋدى تاپسىردى. وسىعان وراي سىرتقى ىستەر مينيسترلىگى مەن توتەنشە جاعدايلار مينيسترلىگى تۇرىك بيلىگىمەن بايلانىس ورناتتى. جاقىن ارادا تۇركيا ۇكىمەتىنىڭ ءوتىنىشى بويىنشا زارداپ شەككەن وڭىرلەرگە قازاقستاننىڭ قۇتقارۋشىلارى مەن دارىگەرلەرى اتتانادى.
