قازاق ساندىك-قولدانبالى ونەرىندە قىرىق جىلدان اسا ەڭبەك ەتىپ, ءوز قولتاڭباسىن ايشىقتاعان شەبەردىڭ تۋىندىلارى – ۇلتتىق ناقىشقا باي اسەمدىگىمەن ەرەكشەلەنەدى. اسىرەسە اۆتوردىڭ كورمەگە ۇسىنىلعان وتىزدان اسا اعاش, شي, كيىز جانە كەراميكا قولدانا وتىرىپ جاساعان جۇمىستارىندا تىڭ ادىستەر مەن كومپوزيتسيالىق شەبەرلىك نازىك ۇيلەسىمىن تاپقان. ءاربىر تۋىندىسىنان تابيعيلىق پەن شىنايىلىقتى كورەسىز. ءبىر جاعىنان, كورمە يەسى – بۇرىن اتا-بابامىز قولدانىپ, كەيىن ۇمىتىلا باستاعان شي توقۋ ءداستۇرىن قايتا جاڭعىرتقان شەبەر. 1997 جىلى سۋرەتشىنىڭ مۇحتار اۋەزوۆتىڭ شيدەن توقىعان پورترەتى پاريج كونسەرۆاتورياسىنداعى كورمەگە قويىلعان.
كورمەنىڭ اشىلۋىندا تۇڭعىش پرەزيدەنت كىتاپحاناسىنىڭ ديرەكتورى باقىتجان تەمىربولات سۋرەتشىنىڭ شىعارماشىلىعىن ەرەكشە اتاپ ءوتتى.
– رايگۇل احمەتجانوۆا – حالىق اڭىزدارى مەن اندەرىنەن شابىت الىپ, ءوزىنىڭ قايتالانباس ءستيلىن قالىپتاستىردى. شەبەردىڭ شىعارماشىلىق تالانتى مەن فيلوسوفيالىق تۇرعىدا ەرەكشە ويلاۋىنىڭ ارقاسىندا كيىز بەن شيدەن جاسالعان ءداستۇرلى ماتەريالدار زاماناۋي كوركەم وبرازدار مەن يدەيالار تۋدىردى, – دەپ باعالادى
سونداي-اق بەلگىلى جازۋشى, مەملەكەتتىك سىيلىقتىڭ لاۋرەاتى الىبەك اسقاروۆ تا جىلى لەبىزىن ءبىلدىردى. ء«ار سۋرەتشى ءوزىنىڭ جولىمەن ءجۇرىپ, شىعارماشىلىقتا ەشكىمگە ۇقسامايتىن ءستيلىن تاپقاندا عانا ونەردە ءوز ءىزىن قالدىرادى. بۇگىنگى كورمەنىڭ يەسى وسىنداي ەرەكشە ستيلگە يە, ونىڭ جۇمىسى اتا-بابا ءداستۇرىن جالعاستىرۋدا», دەدى قالامگەر.
ايتا كەتەيىك, جوعارى شىعارماشىلىق جەتىستىگى ءۇشىن ء«ابىلحان قاستەەۆ» مەدالىن يەلەنگەن رايگۇل احمەتجانوۆانىڭ ەڭبەكتەرى قازاقستاندا عانا ەمەس, اقش, ۇلىبريتانيا, گەرمانيا, شۆەتسيا, فرانتسيا, پاكىستان سەكىلدى ەلدەردەگى جەكە جيناقتاردا ساقتالعان.
