مينيستر 2022 جىلدىڭ قورىتىندىسى بويىنشا تالقىلاۋلاردان كەيىن قازاقستاننىڭ ۇلتتىق قورى تابىسى تەرىس ناتيجە كورسەتكەنىن ەسكەرە وتىرىپ, بىرنەشە جىل ىشىندە ينۆەستيتسيالىق تابىس بالالار الاتىن سومانىڭ نەگىزگى پارامەترى رەتىندە الىناتىنىن ايتتى.
«وكىنىشكە قاراي, 2022 جىل قازاقستاننىڭ ۇلتتىق قورىن قوسا العاندا, الەمدەگى بارلىق قورلار ءۇشىن ءساتتى بولعان جوق. وسى فاكتوردى ەسكەرە وتىرىپ, ءبىز ۇلتتىق بانك ساراپشىلارىمەن بىرنەشە جىل ىشىندە ينۆەستيتسيالاردىڭ ورتاشا كىرىستىلىگىن الامىز دەگەن شەشىمگە كەلدىك. ەگەر ءسىز ورتاشا جىلدىق كىرىستى الساڭىز, وندا ول ارقاشان وڭ بولعان. ءبىر جىل ىشىندە ول 7 پايىزعا ءوستى, ءبىر جەردە ودان دا جوعارى, ءبىر جەردە تومەن بولدى. بىراق نەگىزىنەن وڭ ناتيجە بەردى. سوندىقتان ءبىز لايىقتى جانە تۇراقتى تابىس بولادى دەپ كۇتەمىز. ءبىز ونى ورتا ەسەپپەن بىرنەشە جىلعا الاتىن بولامىز, ءدال وسىنداي وڭ كىرىستىلىك قامتاماسىز ەتىلەدى. ول جىل سايىن بالالاردىڭ شوتتارىنا اۋدارىلىپ تۇرادى», دەدى الىبەك قۋانتىروۆ.
ءمينيسترى بالالار 18 جاسقا تولعان كەزدە شوتتارىندا قانداي سوما جينالۋى مۇمكىن ەكەندىگىن دە ايتتى.
«ەگەر ءبىز 2024 جىلدان باستاپ وسى جۇيەگە كىرەتىن بولساق, بالالاردىڭ ءارتۇرلى جاسىنا بايلانىستى ءار ءتۇرلى كولەمدەگى كىرىس بولاتىنىن ءتۇسىنۋ كەرەك. ەگەر بالا جۇيەگە 17 جاستان باستاپ تىركەلسە, شامامەن 100-150 دوللار الادى. ەگەر بالانىڭ جاسى 5-تە بولسا, 18 جاسقا دەيىن ودان دا كوپ قارجى جيناقتالادى. كىشكەنتاي بالالار ءبىرىنشى جىلى ارقايسىسى 100-150 دوللار السا دا, ءدال وسىنداي سوما كەلەسى جىلى دا اۋدارىلادى, وعان قوسا وتكەن جىلداعى كىرىستىڭ تاعى 50 پايىزى قوسىلادى. بۇل جيىنتىق سومانىڭ بارلىعى قوسىمشا ينۆەستيتسيالانادى. ۇلتتىق بانكتىڭ باعالاۋى بويىنشا, 18 جىل ىشىندە شامامەن 3,5 مىڭ دوللار جيناقتالادى», دەپ ناقتىلادى مينيستر.
ونىڭ ايتۋىنشا, بالالارعا ارنالعان شوتتار اۆتوماتتى تۇردە اشىلادى, قاجەتتى دەرەكتەر ادىلەت مينيسترلىگىنەن الىنادى.
«ياعني, بۇل ءۇشىن ەشتەڭە ىستەۋدىڭ قاجەتى جوق. ءبىز بۇل ەسەپتىك جازبانى بەلگىلى ءبىر ۆەب-سايت نەمەسە قوسىمشا ارقىلى باقىلاۋدى جوسپارلاپ وتىرمىز. بالا وعان قانداي اقشا ەسەپتەلگەنىن كورە الادى, بىراق ول كامەلەتكە تولعانعا دەيىن بۇل اقشانى پايدالانا المايدى. 18 جاسقا تولعاننان كەيىن بالا بۇل قاراجاتتى ءبىلىم الۋ ءۇشىن نەمەسە جىلجىمايتىن م ۇلىك ساتىپ الۋ ءۇشىن پايدالانا الادى», دەپ قوستى مينيستر.
بالا قايتىس بولعان جاعدايدا جيناقتالعان قاراجاتتى وتباسىنداعى باسقا بالالار اراسىندا ءبولۋ نەمەسە قامقورشى تۋىستارى مەن اتا-انالارىنا بەرۋ جوسپارلانىپ وتىر. ال بالانىڭ ازاماتتىعى وزگەرگەن جاعدايدا اقشا ۇلتتىق قوردا قالادى.
ايتولعان ءجۇنىسحان,
ل.ن.گۋميلەۆ اتىنداعى ەۇۋ ستۋدەنتى
