«AMANAT»-تىڭ ماسليحاتتارعا پارتيالىق تىزىمدەرى 75%-عا جاڭاردى

بۇل تۋرالى «AMANAT» پارتياسىنىڭ توراعاسى ەرلان قوشانوۆ Facebook جەلىسىندەگى پاراقشاسىندا مالىمدەدى.

جالپى «AMANAT» پارتياسى ءوز كانديداتتارىن بارلىق دەپۋتاتتىق مانداتقا، ياعني بارلىق دەڭگەيدەگى 223 ماسليحاتقا ۇسىنادى. وسىلايشا، جاڭا سايلاۋ زاڭناماسىنا سايكەس پارتيالىق تىزىمدەر بويىنشا 740 ادام جانە ءبىرمانداتتى سايلاۋ وكرۋگتەرى بويىنشا 3081 ادام ۇسىنىلدى. بارلىعى 3821 ۇمىتكەر.

پارتيالىق تىزىمدەردە 20 وڭىرلىك ءماسليحاتتا «جاڭا ەسىمدەردىڭ» ۇلەسى – 75%-دى قۇرايدى. ونىڭ ىشىندە ايەلدەر – 31%، 29 جاسقا دەيىنگى جاستار – 23%. ۇمىتكەرلەردىڭ ورتاشا جاسى – 46. ولاردىڭ اراسىندا كاسىپكەرلىك، ءبىلىم جانە عىلىم، ازاماتتىق سەكتور، اۋىل شارۋاشىلىعى، مادەنيەت، دەنساۋلىق ساقتاۋ جانە باق سالاسىنىڭ وكىلدەرى باسىم.

اۋداندىق جانە قالالىق ماسليحاتتارعا ءبىرمانداتتى سايلاۋ وكرۋگتەرى بويىنشا پارتيادان 2747 كانديدات ۇسىنىلادى. تالداۋعا سايكەس، كانديداتتاردىڭ ىشىندە ايەلدەردىڭ ۇلەسى – 28%-دى، 29 جاسقا دەيىنگى جاستار 23%-دى قۇرايدى. ولاردىڭ ورتاشا جاسى – 48. سونىمەن قاتار پارتيادان ەرەكشە قاجەتتىلىگى بار 56 ادام سايلاۋعا تۇسەدى. پارتيا ۇسىنعان كانديداتتاردىڭ جارتىسىنان كوبى بۇعان دەيىن قالالىق جانە اۋداندىق ءماسليحاتتاردا دەپۋتات بولماعان.

«مەملەكەت باسشىسى ءماسليحاتتار جەرگىلىكتى ءوزىن-ءوزى باسقارۋدىڭ نەگىزگى بۋىنى بولۋى ءتيىس ەكەنىن ايتقان بولاتىن. پارتيالىق ءتىزىم بويىنشا دا، ءبىرمانداتتى وكرۋگتەردە دە ءبىز ۇسىنعان كانديداتتار – ءوز ءىسىنىڭ مامانى، حالىقتىڭ يگىلىگى ءۇشىن جۇمىس ىستەۋگە دايىن پاتريوتتار. بۇل رەتتە «AMANAT» پارتيالىق تىزىمدەرىنىڭ جاڭارۋى بىلتىر باستالعان پارتيانى تەرەڭ ترانسفورماتسيالاۋدىڭ ناتيجەسى دەۋگە تولىق نەگىز بار. الداعى سايلاۋ ناۋقانىنا «AMANAT» جاڭا ماقسات-مۇددەنى كوزدەپ بارماق. ونىڭ باستى ميسسياسى – مەملەكەت باسشىسىنىڭ قوعامدىق تىرەگى بولۋ جانە ادىلەتتى قازاقستاندى قۇرۋ. ءبىز اشىق ساياسي باسەكەگە دايىنبىز! حالىق اشىق داۋىس بەرۋ ارقىلى ەڭ لايىقتىنى تاڭدايدى»، دەپ جازدى پارتيا توراعاسى.