رومان گولوۆچەنكو ەاەو ءۇشىن جابدىقتالعان قاۋىپسىز جەلى قۇرۋدى ۇسىندى

بۇل تۋرالى ول  Digital Almaty 2023 حالىقارالىق تسيفرلىق فورۋمى اياسىندا ەاەو ەلدەرى ۇكىمەت باسشىلارىنىڭ قاتىسۋىمەن وتكەن پلەنارلىق وتىرىستا ايتتى. 

«ەاەو ينتەگراتسيالانعان اقپاراتتىق جۇيەسىنىڭ جالپى پروتسەستەرىنىڭ دايىندىعى جانە وداققا مۇشە مەملەكەتتەردىڭ ارنايى جابدىقتالعان قورعالعان جەلىسىن قۇرۋ بويىنشا بارلىق جوسپارلانعان جۇمىستاردى اياقتاۋ – كەزەك كۇتتىرمەيتىن مىندەت»،  دەدى گولوۆچەنكو.

بەلارۋس پرەمەر-ءمينيسترى ەاەو-داعى ارىپتەستەرىن وسى جىلدىڭ ماۋسىم ايىندا ەۋرازيالىق ەكونوميكالىق فورۋمدا وسى جۇمىستىڭ ناتيجەلەرىن تالقىلاۋعا شاقىردى.

«قاشىقتان مەملەكەتتىك قىزمەتتەردى كورسەتۋ تەك ءبىزدىڭ ەلدە عانا ەمەس، ءبىزدىڭ وداقتاعى مەملەكەتتەردىڭ بارلىق ازاماتتارى ءۇشىن دە دامۋى كەرەك»،  دەدى گولوۆچەنكو.

سونداي-اق ول ەاەو اياسىندا ترانسشەكارالىق سەنىم كەڭىستىگىن قۇرۋ ماڭىزدى قادام بولۋى مۇمكىن ەكەنىن دە ايتىپ ءوتتى. 

گولوۆچەنكو بۇل ءۇشىن ەاەو مەملەكەتتەرىنىڭ ەلەكتروندىق تسيفرلىق قولتاڭبانى تانۋ پروتسەسىن جەدەلدەتۋ قاجەت ەكەنىن، ونسىز حالىقتى ساپالى مەملەكەتتىك قىزمەتتەرمەن قامتاماسىز ەتۋ جانە مەملەكەتتىك ورگاندار مەن مەملەكەتتىك ينستيتۋتتاردىڭ ءتيىمدى جۇمىسىن قامتاماسىز ەتۋ مۇمكىن ەمەس ەكەنىن ءتۇسىندىردى. 

«ۇكىمەت باسشىلارى جاۋاپتى ورگاندارعا وسىنداي تاپسىرمالار بەرۋگە قۇقىلى دەپ ەسەپتەيمىن - بۇل باعىتتاعى قاجەتتى جۇمىستاردىڭ اياقتالۋىن جەدەلدەتۋ كەرەك»، دەدى ول ارىپتەستەرىنە.

ول سونداي-اق تسيفرلىق ەكونوميكا ءۇشىن كادرلار دايارلاۋدىڭ ماڭىزدىلىعىن، وسى ماقساتتا ءبىلىم بەرۋ قۇرىلىمىن ۇدايى جاڭارتۋ، حالىقتىڭ بارلىق توپتارىن تسيفرلىق الەمدە ءومىر سۇرۋگە بەيىمدەۋ جۇمىستارىن جۇرگىزۋ قاجەتتىگىن اتاپ ءوتتى.

«مەن ارىپتەستەرىمدى، ەاەو ەلدەرىنىڭ ۇكىمەت باسشىلارىن وداقتىڭ تسيفرلىق كۇن ءتارتىبىن دامىتۋ بويىنشا جۇمىستى جانداندىرۋعا شاقىرامىن»، دەدى گولوۆچەنكو.