ءاموز-دەگى اقاۋ: زاۋىت باس ديرەكتورىنىڭ ورىنباسارى قىزمەتىنەن كەتتى

1 اقپاندا اتىراۋ مۇناي وڭدەۋ زاۋىتى رەگەنەراتورلاردا تەمپەراتۋرانىڭ كوتەرىلۋىنە بايلانىستى كاتاليتيكالىق كرەكينگ قوندىرعىسىن توقتاتتى.

م.مىرزاعاليەۆ 3 اقپان كۇنى اتىراۋ مۇناي وڭدەۋ زاۋىتىنا جۇمىس ساپارىمەن بارىپ، كاسىپورىن باسشىلىعىمەن كەڭەس وتكىزدى. «قازمۇنايگاز» باسشىسى قمگ باسقارما توراعاسىنىڭ مۇناي وڭدەۋ جانە مۇناي حيمياسى جونىندەگى ورىنباسارى ارمان قايردەنوۆتىڭ جەتەكشىلىگىمەن جەدەل شتاب قۇرۋدى تاپسىردى. جەدەل شتاب ءاموز جابدىقتارىنداعى اقاۋ تولىق جويىلعانعا دەيىن جۇمىس ىستەيدى.

«شتابتىڭ نەگىزگى مىندەتى – ورىن العان اقاۋدى، سونداي-اق ءاموز جۇمىسىندا جۇيەلى سيپات العان ماسەلەلەردى جەدەل ءارى ساپالى شەشۋ. ورىنباسارىم ارمان قايردەنوۆ بۇل داعدارىستان تولىق شىققانعا دەيىن وسىندا بولادى»، دەپ اتاپ ءوتتى م.مىرزاعاليەۆ.

كەڭەس بارىسىندا ء«اموز» جشس باس ديرەكتورىنىڭ ءبىرىنشى ورىنباسارى راحىمجان جانعابىلوۆ قىزمەتىنەن بوساتىلدى، كاسىپورىننىڭ باس ديرەكتورى مۇرات دوسمۇراتوۆقا قاتاڭ سوگىس جاريالاندى. م.مىرزاعاليەۆ سونداي-اق قۇرىلعان شتابتىڭ باسشىسى ا.قايردەنوۆكە وقيعاعا قاتىستى قىزمەتتىك تەرگەۋ جۇرگىزۋدى جانە ونىڭ قورىتىندىسى بويىنشا قوسىمشا كادرلىق شەشىمدەر قابىلداۋدى تاپسىردى.

«قازمۇنايگاز» باسقارما توراعاسى ەل بويىنشا وتىن تاپشىلىعىنا جول بەرمەۋ ماقساتىندا اشىق ءتۇستى مۇناي ونىمدەرىن كوبىرەك ءوندىرۋ ءۇشىن بارلىق ءۇش مۇناي وڭدەۋ زاۋىتىنىڭ جۇكتەمەسىن وڭتايلاندىرۋدى تاپسىردى.

«ەل باسشىلىعىنىڭ ءاموز-گە قاتىستى بىرنەشە رەت ايتقان ەسكەرتۋلەرىن، سونداي-اق زاۋىت جۇمىسىنداعى ءجيى ۇزىلىستەردى ەسكەرە وتىرىپ، بارىنشا قاتاڭ شارالار قابىلدايتىن بولامىز. ەلدە ىشكى نارىقتى مۇناي ونىمدەرىمەن قامتاماسىز ەتۋ ماسەلەسى اسا وزەكتى بولىپ تۇرعاندا مۇنداي جاعدايعا جول بەرۋگە بولمايدى»، دەپ تۇيىندەدى م.مىرزاعاليەۆ.