استانا شەتەلدەن ينۆەستيتسيا تارتۋ بويىنشا كوش باستاپ تۇر

«Astana Invest» ارنايى ەكونوميكالىق ايماقتاردى دامىتۋ دەپارتامەنتىنىڭ ديرەكتورى ديار اسقاروۆ ونلاين-بريفينگتە اەا-نىڭ جۇرگىزىلىپ جاتقان ينۆەستيتسيالىق ساياساتى مەن دامۋى تۋرالى ايتتى.

نەگىزگى كاپيتالعا سالىنعان ينۆەستيتسيالار كولەمى 2022 جىلى 1،4 ترلن تەڭگەنى قۇرادى (101،2%).

«جان باسىنا شاققانداعى نەگىزگى كاپيتالعا سالىنعان ينۆەستيتسيالار 3،2% وسىممەن 1 ملن تەڭگەنى قۇرادى. ەلوردا شەتەلدىك ينۆەستيتسيالاردى تارتۋ بويىنشا 7-ورىندا. بۇگىنگى تاڭدا استانانىڭ ينۆەستيتسيالىق جوبالارىنىڭ بىرىڭعاي پۋلى قۇرىلدى، وعان ينۆەستيتسيالاردىڭ جالپى سوماسى شامامەن 2،3 ترلن تەڭگەنى قۇرايتىن 262 جوبا، 26 مىڭعا جۋىق جاڭا جۇمىس ورنى قۇرىلدى، ونىڭ ىشىندە وڭدەۋ ونەركاسىبى سالاسىندا – جالپى سوماسى 249،9 ملرد تەڭگەگە 82 جوبا، 7 مىڭنان استام جاڭا جۇمىس ورنى قۇرىلدى»، دەدى سپيكەر.

وڭدەۋ كاسىپورىندارىن قولداۋدا ارنايى ەكونوميكالىق ايماقتار وزدەرىنىڭ تيىمدىلىگىن دالەلدەدى. استاناداعى ءبىرىنشى يندۋستريالدى پاركتىڭ تولىپ كەتكەندىگى، ەكىنشىسىنىڭ قۇرىلىسى جۇرگىزىلىپ جاتقاندىعى ايقىن مىسال بولا الادى.

مەملەكەت باسشىسىنىڭ تاپسىرماسى بويىنشا ۇكىمەت اەا دامىتۋ بويىنشا تۇبەگەيلى باسقا ساياساتقا كوشۋ بويىنشا جۇمىس جۇرگىزىپ جاتىر.

«استانا – جاڭا قالا» اەا اۋماعىندا 5 871 تۇراقتى جۇمىس ورنىن قۇرا وتىرىپ، 166 ملرد تەڭگەگە 50 جوبا جۇمىس ىستەيدى. ىسكە اسىرۋ ساتىسىندا 2 484 تۇراقتى جۇمىس ورنىن قۇرۋمەن 63،5 ملرد تەڭگە سوماسىنا 40 جوبا بار.

«استانا-تەحنوپوليس» اەا اۋماعىندا 32 تۇراقتى جۇمىس ورنىن قۇرا وتىرىپ، 1 ملرد تەڭگە سوماسىنا 3 جوبا جۇمىس ىستەيدى. ىسكە اسىرۋ ساتىسىندا 10 جوبا بار»، دەدى اسقاروۆ.

ەنگىزىلگەن 50 جوبانىڭ 11-ءى ەكسپورتقا باعدارلانعان. وتكەن جىلدىڭ توعىز ايىندا قالا كاسىپورىندارى 15 ملرد تەڭگەگە ءونىم ەكسپورتتادى. نەگىزگى تاۋارلاردىڭ قاتارىنا ەلەكتروۆوزدار، ارنايى كيىمدەر، لوكوموتيۆتەر، ت.ب. ونىمدەر رەسەيگە، وزبەكستانعا، ازەربايجانعا، تۇركياعا جەتكىزىلەدى.

بۇگىنگى تاڭدا №1 يندۋستريالىق پاركتىڭ ينفراقۇرىلىمى بويىنشا قولدانىستاعى 49 جوبانىڭ 21-ءى ورتالىق جىلۋمەن جابدىقتاۋعا قوسىلعان. اكىمدىك 100% ورتالىقتاندىرىلعان جىلۋمەن قامتاماسىز ەتتى.

«№2 يندۋستريالىق پارك بويىنشا ماستەر-جوسپار ازىرلەندى. ونى ازىرلەۋ ءۇشىن «Jurong» حالىقارالىق سينگاپۋرلىق كومپانياسى تارتىلدى. ينجەنەرلىك جەلىلەردىڭ جۇكتەمەلەرى بويىنشا سوڭعى جۇمىستار جۇرگىزىلۋدە، ىقتيمال جۇكتەمەلەردى انىقتاۋ ءۇشىن قالانىڭ كوممۋنالدىق كاسىپورىندارىمەن كەزدەسۋلەر وتكىزىلدى. ەلەكتر، سۋ-كارىز، گازبەن جابدىقتاۋ جەلىلەرى بويىنشا تەحنيكالىق شارتتار الىندى. ەكىنشى پاركتىڭ ءبىرىنشى ىسكە قوسۋ كەشەنىنىڭ ءبىرىنشى كەزەگىنىڭ قۇرىلىسى 2023 جىلى جوسپارلانىپ وتىر، قۇرىلىستىڭ تولىق اياقتالۋى 2030 جىلعا جوسپارلانىپ وتىر»، دەپ قورىتىندىلادى سپيكەر.