وندىرىستىك جاراقات ازايماي تۇر

ەڭبەك جانە حالىقتى الەۋمەتتىك قورعاۋ مينيسترلىگىنىڭ مالىمەتى بويىنشا، 2022 جىلى وندىرىستىك جاراقاتتانۋ كوەففيتسيەنتى (1000 جۇمىسكەرگە شاققانداعى جازاتا­يىم وقيعالاردىڭ جيىلىگى) 0،22-نى قۇرادى. رەسپۋبليكانىڭ وندىرىستىك ايماقتارىندا جاراقات الۋدىڭ ەڭ جوعارى دەڭگەيى ساقتالىپ تۇر. ماسەلەن، قاراعاندى وبلىسىندا – 180 ادام، شقو-دا – 169 ادام، قوستاناي وبلىسىندا – 142 ادام، پاۆلودار وبلىسىندا – 112 ادام، اقتوبە وبلىسىندا – 103 ادام، الماتى قالاسىندا 114 ادام جۇمىس ورنىندا كەلەڭسىز جاعدايعا تاپ بولىپ، زارداپ شەكتى. ال ەكونوميكانىڭ سالالارى بويىنشا ەڭ كوپ زارداپ شەككەندەر تاۋ-كەن مەتاللۋرگيا كەشەنىنىڭ ونەركاسىپتەرىندە (16،2%) جانە قۇرىلىس سالاسىندا (15%) تىركەلدى.

جازاتايىم وقيعالاردىڭ نەگىزگى سە­بەپ­­­تەرىنە كەلسەك، مۇنداي وقىس جاع^­داي­دىڭ 33،9%-ى جابىرلەنۋشىنىڭ ءوزىنىڭ ورەس­كەل ابايسىزدىعىنان، 29%-ى وندىرىس­تەگى جۇ­مىستىڭ ءتيىستى دەڭگەيدە ۇيىم­داس­تى­رىلماۋىنان، 9،4%-ى جول قوزعالىسى ەرە­جە­لەرىن بۇزۋدان جانە قاۋىپسىزدىك جانە ەڭبەكتى قورعاۋ ەرەجەلەرىن ساقتاماۋدان ورىن الادى ەكەن.

قاۋىپسىز ەڭبەك جاعدايىن جاساۋ مەن وندىرىستىك جاراقاتتانۋدى ازايتۋ – ۇكىمەتتىڭ نەگىزگى مىندەتتەرىنىڭ ءبىرى. سوندىقتان ماسەلەنىڭ ورشۋىنە جول بەرمەۋگە باسا ءمان بەرىلۋ كەرەك. كەيىنگى بەس جىلدىڭ ىشىندە مەملەكەتتىك ورگاندار مەن جۇمىس بەرۋشىلەردىڭ ەڭبەكتى قورعاۋ سالاسى بو­يىنشا قابىلداعان كەشەندى شارالارىنىڭ ناتيجەسىندە وندىرىستىك جاراقاتتانۋ دەڭگەيى 6،5%-عا ءتۇستى. ساقتاندىرۋ مەن ەرەجە بۇزۋدىڭ الدىن الۋ ماقساتىندا 2 800 كاسىپورىن قا­ۋىپ­سىزدىك پەن ەڭبەكتى قورعاۋ ستاندارتتارىن ەنگىزدى.

سونىمەن قاتار كاسىپوداقتار فەدەراتسيا­سىمەن بىرلەسىپ، مۇگەدەكتىگى بار ادامداردى حالىقتىق باقىلاۋشى رەتىندە تارتۋدى كوزدەيتىن «حالىقتىق باقىلاۋ» الەۋمەتتىك ماڭىزدى جوباسى ەنگىزىلىپ جاتىر. بۇگىندە جوبانى جۇزەگە اسىرۋعا رەسپۋبليكانىڭ 240 كاسىپورنى قوسىلىپ، وندا 600-دەن اسا جۇمىسكەر ىشكى باقىلاۋدى ورىنداپ وتىر.

بۇعان قوسا 2019 جىلدان باستاپ ەڭبەك جانە حالىقتى الەۋمەتتىك قورعاۋ مينيسترلىگى تاراپىنان «نولدىك جاراقات – Vision Zero» تۇجىرىمداماسىن جەتىلدىرۋ بويىنشا بەل­سەن­دى جۇمىس اتقارىلىپ جاتىر. وعان بۇگىندە 332 كاسىپورىن قوسىلدى.

سونداي-اق «ونلاين ەڭبەك كونسۋلتانتى» ەلەكتروندى سەرۆيسى ىسكە قوسىلدى. بۇل جۇمىسكەر مەن جۇمىس بەرۋشىنىڭ اراسىندا قاشىقتىقتان ءوزارا ارەكەتتەسۋدى قامتاماسىز ەتۋ ءۇشىن ەڭبەك زاڭناماسىنىڭ ساقتالۋىنىڭ تيىمدىلىگىن ارتتىرۋعا مۇمكىندىك بەرەدى. سەرۆيستە جۇمىس بەرۋشىنىڭ ەڭبەكتى قورعاۋ تالاپتارىن ساقتاۋى بويىنشا تەكسەرۋدەن ءوتۋىن قاراستىرادى. بۇل سەرۆيس ىسكە قوسىلعالى بەرى 13 854 جۇمىس بەرۋشى پايدالاندى.