استانا. 17 ماۋسىم. برازيليانىڭ سالۆادور قالاسىندا چەمپيوناتتىڭ G توبىنداعى گەرمانيا جانە پورتۋگاليا قۇرامالارى اراسىنداعى وينالعان ويىن نەمىستەردىڭ ايقىن باسىمدىلىعىمەن اياقتالدى. ەسەپ – 4:0. بۇل تۋرالى egemen.kz حابارلادى.
«نەمىس ماشينەسى» شەشۋشى شاقتاردا ءاردايىم ءتاستۇيىن قالىپقا ءتۇسىپ, ىڭعايى كەلىپ جاتسا, الدىنا كەلگەن كىم-كىمدى دە تاپتاپ وتە شىعاتىنىن وسى جولى تاعى دا انىق تانىتتى. ونىڭ ديىرمەنىنە ءتۇسىپ كەتكەن كريشتيانۋ رونالدۋ مەن ونىڭ ارىپتەستەرى ءۇشىن بۇل بارىنشا ءساتسىز كۇن بولدى. ولاردىڭ ءىرى ەسەپپەن جەڭىلگەندەرى ءوز الدىنا, ونىڭ سىرتىندا جەتەكشى قورعاۋشىسى الاڭنان قۋىلىپ, تاعى ەكى ويىنشىسى جاراقات الىپ قالدى. پورتۋگالدار قارسىلاستارىنا بارلىق جاعىنان ۇتىلدى. ولار وزدەرىنە ءتان ويىننىڭ ەشبىرىن كورسەتە المادى. ولار نەمىستەردىڭ الدىندا فۋتبولدى جاڭا ۇيرەنىپ جۇرگەن تالىپتەردىڭ كەيپىن كورسەتتى.
ماتچتىڭ باسىنان يواحيم ليوۆ فۋتبول قاۋىمداستىعىن ءوزىنىڭ ستارتتىق قۇرامىمەن قاتتى تاڭ قالدىردى. ويىننىڭ قارساڭىندا نەمىس جۋرناليستەرى العاشقى مينۋتتاردان الاڭعا لۋكاس پودولسكي مەن اندرە شيۋررلەنىڭ شىعاتىندارىن ءبىر اۋىزدان جاريا ەتكەن ەدى. بىراق جەمە-جەمگە كەلگەندە, نەگىزگى قۇرامدا بۇلاردىڭ ەكەۋى دە بولماي شىقتى. ولاردىڭ الاڭ تورىندە ورىندارىنا ماريو گەتتسە مەن مەسۋت وزيل جايلاستى. ال پاۋلۋ بەنتۋگە كەلسەك, ونىڭ رونالدۋگە وڭتايلى ورىن قاراستىرىلعان سحەماسىندا ەشقانداي ءبىر قۇپيا بولعان جوق.
كەزدەسۋدىڭ باسىن «بۋندەستيم» ءوز اكتيۆىنە جازدى. بۇكىل الاڭنىڭ بيلىگىن بىردەن ءوز قولىنا الىپ العان گەرمانيا قۇراماسى بىرنەشە شابۋىل ۇيىمداستىرىپ ۇلگەردى. ولاردىڭ بىرىندە ءتىپتى بۇرىشتامادان دوپ تا بەردى. بۇدان كەيىن پورتۋگالدار العا ۇمتىلدى. وسى شابۋىلدىڭ وتىندە جۇرگەن رونالدۋ بىرەر سوققى جاساپ تا كوردى. بۇدان ارى ەكى جاقتىڭ الما-كەزەك شابۋىلىنا كەزەك كەلدى. سونىڭ ءبىر ساتىندە پورتۋگال قاقپاشىسى رۋي پاتريسيۋ ءوز قاقپاسىنا دوپ كىرىپ كەتۋىنە سەبەپشى بولا جازدادى. ونىڭ لاقتىرعان دوبى تاياۋ ماڭداعى حەديرەنىڭ اياعىنا بارىپ سارت ەتتى. ونى العان سامي بىردەن احۋالدى پايىمداپ, داربازاعا قاراي زۋىلداتتى. قۇداي ساقتاعاندا, ونىڭ اتقان سناريادى باعاننىڭ ءدال جانىنان زۋ ەتە ءتۇستى. بىراق بۇل ساتتىلىك ەكى مينۋتقا عانا سوزىلدى. سونىڭ ارتىنشا ايىپ الاڭىنا كىرگەن گەتتسەنى جواۋ پەرەيرا جەرگە الا جىعىلدى. سەرب تورەشىسى ميلوراد ماجيچ ويلانباستان 11 مەترلىك نۇكتەنى كورسەتتى. ونى توماس ميۋللەر مۇلتىكسىز ورىندادى – 1:0. ءسويتىپ, نەمىستەر 11-مينۋتتا العا شىقتى.
تايمنىڭ ورتاسى اۋا گەرمانيالىقتار قارقىندى ەپتەپ باسەڭدەتتى. وسىنى پايدالانعان قارسى جاق تىزگىندى ءوز قولدارىنا الا باستادى. الايدا, ولاردى قاقپاعا تىكەلەي سوققى جاساپ, قاۋىپ شاقىراتىن وتكىرلىك جەتىسپەي جاتتى. «ەۋروپالىق برازيليالىقتار» كوبىنە الاڭ ورتاسىمەن شاپقىلاۋمەن بولدى. مۇنداي سىلبىر ويىندى بايقاعان نەمىستەر ءبىر كەزدە تاعى دا قاۋىرت قيمىلعا ەرىك بەردى. الدىمەن توني كرووس الاڭنىڭ تۇكپىر جاعىنان قارسىلاستار ايىپ الاڭىنداعى مەسۋت وزيلگە كەرەمەت پاس جەتكىزدى. ال وزيل ارىپتەستەرى جەتۋىن كۇتىپ تۇردى دا, جۇگىرىپ جەتكەن گەتتسەنىڭ الدىنا دوپتى كولبەي تاستاي سالدى. بىراق ونىڭ سوققىسى الدىنان شىعا كەلگەن پەرەيراعا تيگەن دوپ ارتقى اۋتقا كەتتى. وسىدان كەيىن بەرىلگەن بۇرىشتاما «بۋندەستيم» ءۇشىن كەزەكتى گولمەن اياقتالدى. بۇرىشتان كرووس جونەلتكەن دوپقا ماتس حۋممەلس بۇرىن جەتىپ, باسىمەن سولق ەتكىزدى. گول! ماتچتىڭ 32-مينۋتىندا ەسەپ وسىلاي 2:0-گە جەتتى.
كەزدەسۋدىڭ 37-مينۋتىندا پورتۋگالداردىڭ قارسىلاستارىنا الدەقانداي قارسىلىق كورسەتە الۋىنىڭ سوڭعى مۇمكىندىكتەرىن ج ۇلىپ اكەتكەندەي وقيعا ورىن الدى. ولاردىڭ پەپە اتتى ويىنشىسى ميۋللەردى تىيىم سالىنعان تاسىلمەن توقتاتتى. ونىمەن دە قويماي, قارسىلاسىنا جۇگىرىپ بارىپ, ونى باسىمەن ءبىر سوقتى. وسىدان كەيىن الاڭداعى اربيتردىڭ بۇزاقىنى الاڭنان قۋعاننان باسقا امالى قالمادى. بۇدان كەيىن ءماجيچتىڭ تاعى پورتۋگالدى – فابيۋ كونتراۋدى دا الاڭنان قۋىنا ابدەن بولاتىن ەدى. ول دوپقا تالاس كەزىندە حەديرانى شىنتاعىمەن قاساقانا بەتىنەن سوعىپ جىبەردى. ال ءۇزىلىستىڭ ءدال الدىندا يواحيم ءليوۆتىڭ شاكىرتتەرى ءۇشىنشى گولدى دا ءتۇسىرىپ, كەزدەسۋدىڭ قورىتىندىسىن تولىق شىعارىپ قويعانداي بولدى.
كەزدەسۋدىڭ ەكىنشى بولىگىندە ويىننىڭ كورىنىسى كوپ وزگەرگەن جوق. ال بۇدان دا كۇيرەي جەڭىلۋى مۇمكىن ەكەنىن سەزگەن پاۋلۋ بەنتۋ بۇل كەزەڭدە قورعانىستى كۇشەيتە تۇسۋگە كۇش سالدى. دەگەنمەن, ەكىنشى تايمنىڭ باسى بەي-جاي باستالدى. پورتۋگالدار وزدەرىنىڭ ۇرەي قۇشاعىندا جۇرگەندەرىن بىلدىرمەۋگە تىرىستى. نەمىستەر بولسا, بۇرىنعىسىنشا العا ورشەلەنە ۇمتىلۋدى قويدى. بىراق بۇل سالىستىرمالى تىنىشتىق تىم ۇزاققا بارمادى. 51-مينۋتتا وزيل ويىننان تىس قالۋ شەگىندە تۇرعان ساتىنەن العا اتىلىپ, پاتريسيۋمەن بەتپە-بەت كەلۋگە مۇمكىندىك الدى. بىراق بۇدان وڭدى ناتيجە بولا قويمادى.
ويىن سوڭعى ءتورتىنشى گول سوعىلعانعا دەيىن وسىنداي ىرعاقپەن ءجۇرىپ جاتتى. اقىرىندا, 78-مينۋتتا كرووستىڭ وڭ قاپتالعا اسىرعان دوبى كەزەكتى گولدىڭ نەگىزى بولدى. ول جاقتاعى شيۋررلە دوپتى سوسىن جەرلەتىپ قاقپاشى الاڭىنا جەتكىزدى. ونى پاتريسيۋ كەرى تەۋىپ قايتاردى. مىنە, سول قايتقان دوپ ميۋللەردىڭ اياعىنا توپ ەتە ءتۇستى. گول!
«نەمىس ماشينەسى» وسىلاي ءوزىنىڭ ءناتى مىقتى ەكەنىن تاعى تانىتتى.
دامير قوجامقۇل.
دەرەككوز: چەمپيونات.رۋ.
فوتو: Sportbox.ru.
