ەلوردادا ە.راحماديەۆ اتىنداعى مەملەكەتتىك اكادەميالىق فيلارمونيا 100-دەن استام كونتسەرت وتكىزۋدى جوسپارلاپ وتىر، دەپ حابارلايدى Egemen.kz قالا اكىمدىگىنىڭ ءباسپاسوز قىزمەتىنە سىلتەمە جاساپ.
ەلوردادا وتكەن ونلاين-بريفينگ بارىسىندا فيلارمونيانىڭ باس ديرەكتورى ەرلان داكەنوۆ مادەنيەت مەكەمەسىنىڭ قىزمەتى مەن الداعى جوسپارلارى تۋرالى ايتىپ بەردى. ونىڭ ايتۋىنشا، بيىل كورەرمەندەردى جاڭا جوبالار مەن كونتسەرتتىك باعدارلامالار كۇتىپ وتىر.
«قاڭتار ايىندا ۆوكال ءبولىمى ەركەعالي راحماديەۆكە ارنالعان «تاڭ سامالى» كونتسەرتىن ۇسىنعان ەدى. قازاق وركەسترى ءوزىنىڭ كۇنتىزبەلىك جىلىن «كۇي اتاسى – قۇرمانعازى» كونتسەرتىمەن اشادى. فيلارمونيا سوليستەرىن مۇقاعالي ماقاتاەۆتىڭ شىعارماشىلىعى ەرەكشە اسەرلەندىرىپ، «ەسىڭە مەنى العايسىڭ...» جوباسىنا سەبەپشى بولدى. حالىق انشىلەرى اقان سەرىنىڭ 180 جىلدىعىنا وراي «دالا ءداستۇرى» كەشىن دايىنداپ وتىر، ال سيمفونيالىق وركەستر جىل بويى مۇقان تولەباەۆتىڭ 110 جىلدىعىنا ارنالعان ءىس-شارالار وتكىزەدى. سول سياقتى زاماناۋي حورەوگرافيا بالەتى ALEM – «SOLO» ديۆەرتيسمەنتىنىڭ پلاستيكالىق قويىلىمىندا جارقىن پرەمەرا كۇتىلىپ وتىر. كامەرالىق حور ءتۇرلى باعدارلامالاردى، ونىڭ ىشىندە گەرمانيادان كەلگەن بالالار حورىن جوسپارلاپ وتىر. ۇرمەلى اسپاپتار وركەسترى ءوزىنىڭ پرەمەرالارىمەن قۋانتادى جانە بيىل دانتە اليگەري، «سۋ ەلەمەنتتەرىنىڭ مۋزىكاسى»، «Tik-Tok» بويىنشا كونتسەرتتەر ۇسىنادى»، دەدى ەرلان داكەنوۆ.
بيىل فيلارمونيانىڭ شىعارماشىلىق ۇجىمدارى گاسترولدەرگە دە شىعادى. ماسەلەن، ناۋرىز مەرەكەسى كۇندەرى قازاق وركەسترى تۇركيادا ونەر كورسەتەدى، ال «سارىارقا» حالىق مۋزىكاسى ءانسامبلى مەن «شالقىما» حالىق بي ءانسامبلى ليۋكسەمبۋرگكە اتتانادى. ع.جۇبانوۆا اتىنداعى مەملەكەتتىك ىشەكتى كۆارتەت «La cle des portes» فرانتسۋز فەستيۆالىنە قاتىسادى.
قازاقستان بويىنشا دا گاسترولدىك ساپارلار جوسپارلانىپ وتىر. بۇقار جىراۋدىڭ 330 جىلدىعىنا ارنالعان «دالا ءداستۇرى» باعدارلاماسىمەن حالىق انشىلەرى قاراعاندى، قارقارالى، جاڭاارقا، جەزقازعان قالالارىنا بارادى. ال ۇرمەلى وركەستر پەتروپاۆل، قاراعاندى، اقتوبە، اتىراۋ، اقتاۋ جانە باسقا دا قالالارعا بارادى.
كونتسەرتتىك مەكەمەنىڭ ۇجىمدارى ەلوردانىڭ 25 جىلدىعىنا وراي كوپتەگەن اشىق فەستيۆالدەر مەن ءىس-شارالار جوسپارلاپ وتىر.
ايتا كەتسەك، دومبىرا كۇنىنە وراي قۇرمانعازىنىڭ 200 جىلدىعىنا ارنالعان فيلارمونيالار شەرۋى وتەدى، ەلوردا كۇنىنە ارنالعان وراسان زور مۋزىكالىق فەستيۆال دايىندالىپ جاتىر، وعان فيلارمونيانىڭ بارلىق ۇجىمى مەن ارنايى شاقىرىلعان جۇلدىزدار قاتىسادى. بيىلعى باعدارلامادا – «استانا داۋىسى» فەستيۆالى، ماناربەك ەرجانوۆ اتىنداعى رەسپۋبليكالىق بايقاۋ، العاش رەت اشىلعان «زاماناۋي بي فەستيۆالى» رەسپۋبليكالىق تەلەۆيزيالىق جوباسى جانە باسقالارى دا بار.
ايتا كەتسەك، وتكەن جىلى فيلارمونيا 350-گە جۋىق ءىس-شارا وتكىزدى، وعان 400 مىڭعا جۋىق ادام قاتىسقان. مەكەمە ۇجىمدارى 13 گاسترولدىك تۋرعا قاتىستى.
قازاقستاندىق اسكەري قىزمەتشى سۋپەر گران-پري جەڭىپ الدى
سپورت • بۇگىن، 16:54
بۇگىن ەلوردادا قازاقستان - دانيا ماتچى وتەدى
فۋتبول • بۇگىن، 16:27
تۇركىستاندا 11 جاستاعى قىز جوعالىپ كەتتى
ايماقتار • بۇگىن، 15:31
بەنزين مەن ديزەلدىڭ كوتەرمە ساۋداسىنا شەكتى باعا بەلگىلەنۋى مۇمكىن
قازاقستان • بۇگىن، 15:14
جانسايا ابدىمالىك ءبيبىسارا اساۋباەۆانىڭ سىنىنا جاۋاپ بەردى
سپورت • بۇگىن، 14:07
باتۋميدە ناۋرىز مەرەكەسى تويلاندى
الەم • بۇگىن، 13:47
ۇقساس جاڭالىقتار
