تالابى زور «تابىستى وتباسى»

قۇرال-جابدىق جيىنتىقتارىن سالتاناتتى تۇردە تابىستاۋعا ارنالعان ءىس-شاراعا «سامۇرىق-قازىنا» اق مەن ونىڭ وڭىرلىك ەنشىلەس كومپانيالارى جانە جەرگىلىكتى اتقارۋشى ورگان وكىلدەرى، جوبا جەتەكشىلەرى مەن قوعام قايراتكەرلەرى قاتىستى.

«تابىستى وتباسى» جوباسى – جەتىسۋ وبلىسى ءۇشىن الەۋمەتتىك جاعدايدى، تۇرعىنداردىڭ ءومىر ءسۇرۋ ساپاسىن جاقسارتۋدىڭ ءبىر جولى. قاتىسۋشىنى قىسقا مەرزىم ىشىندە بەيىندىك باعىت بويىنشا وقىتۋ، ءوز ءىسىن دامىتۋعا ءبىلىم مەن داعدىلاردى بەرۋ جانە ولاردىڭ جابدىقتاردى تەگىن الۋى – تاماشا مۇمكىندىك. جو­بانىڭ تۇلەكتەرىن قۇتتىقتايمىن، ارقايسىسىنا ساتتىلىك پەن وتباسىلىق تابىسىنىڭ ارتۋىن تىلەيمىن»، دەدى وبلىس اكىمىنىڭ ورىنباسارى رۋستام ءالي ۇلى.

وبلىس اكىمىنىڭ ءباسپاسوز قىزمە­تىنىڭ اقپاراتىنا سۇيەنسەك، ەلىمىزدەگى بەس وڭىرگە بارلىعى 300 گرانت قاراس­تىرىلىپ، «Samruk-Kazyna Trust» قورى ارقىلى 200 ملن تەڭگەگە جۋىق قارجى بولىنگەن. جوبا كوپ­بالالى انالارعا، ەرەكشە قاجەتتىلىكتەرى بار بالالاردى تاربيەلەپ وتىرعان وتباسى مۇشەلەرىنە جانە از قامتىلعان وتباسىلارعا، جاستارعا تىكەلەي تابىس تابۋعا ناقتى مۇمكىندىك بەرەدى. ءوز ءىسىن اشقىسى كەلەتىن ءاربىر قاتىسۋشىعا 150 اەك سوماسىنا جابدىق وتەۋسىز بەرىلەدى.

«بەس وبلىستىڭ ىشىندە جەتىسۋ وبلىسىنىڭ اكىمدىگى ۇسىنعان ءتىزىم اياسىندا الەۋمەتتىك جەلىدەگى ماركەتينگ، تىگىنشىلىك، ەلەكتر مەحانيگى، سۇلۋلىق سالونى مامانى، اسپازدىق كاسىپتەرىن ءبىر ايدا العاشقى لەگىنىڭ 24 تۇلەگى يگەرىپ، «سامۇرىق-قازىنا» قورى اتىنان قۇرال-جابدىق تۇرىندەگى قايتارىمسىز گرانت الۋعا مۇمكىندىك يەلەنىپ وتىر. قازىر وقۋدىڭ ەكىنشى لەگىندە 36 قاتىسۋشى ءبىلىم الىپ جاتىر»، دەيدى «Samruk-Kazyna Trust» كق قامقورشىلىق كەڭەسىنىڭ مۇشەسى لاۋرا دەمەسىنوۆا.

بۇل الەۋمەتتىك جوبا – قاراپايىم تۇرعىندار ءۇشىن ۇلكەن مۇمكىندىك باس­تاۋى. «تابىستى وتباسى» تابىس تاۋىپ، كاسىپتىڭ ءناسىبىن كورۋگە، وسىلايشا ءوز ءىسىن باستاپ، بولاشاققا نىق قادام جاساۋعا مۇمكىندىك بەرەدى.

«كوپبالالى انامىن، جەتىسۋدىڭ تۇرعىنىمىن. وسىنداي بىرەگەي جوبا­نىڭ ءبىر بولىگى بولعانىما قۋانىش­تىمىن. مەن ءۇشىن «تابىستى وتباسى» بۇل ۇيدە تابىس تابۋدى باس­تاۋ مۇمكىندىگى عانا بولىپ قويماي، جاناشىرلىقتى سەزىنىپ، جاڭا دوس­تارمەن كەزدەستىم»، دەپ ءبولىستى جوبا قاتىسۋشىسى ايدا بايمۇحامبەتوۆا.

الداعى ۋاقىتتا وسى سەكىلدى ءوز ءىسىن اشۋعا قاجەتتى قۇرال-جابدىقتار تۇرىندەگى گرانتتى «تابىستى وتباسى» جوباسى اياسىندا ۇلىتاۋ، اباي، اقتوبە جانە تۇركىستان وبلىستارىنىڭ 114 تۇلەگىنە تابىستالادى.

جەتىسۋ وبلىسى