پاتريوت بولۋ – ازاماتتىق پارىز

«جوعارى وقۋ ورىندارىنىڭ ەۋروپالىق ستاندارت رەيتينگى» بويىنشا قازاقستاندىق جوو ىشىنەن جوعارى باعالانعان 5 ءبىلىم ورداسىنىڭ ءبىرى – قاراعاندى مەملەكەتتىك تەحنيكالىق ۋنيۆەرسيتەتى بولاشاق مامانداردى حالىقارالىق تالاپ دەڭگەيىندە دايارلاۋمەن بىرگە تاربيە بەرۋ ىسىنە باسا نازار اۋدارىپ كەلەدى. بۇل ماڭىزدى بۋىننىڭ باستى باعىتى شىن مانىندەگى قازاقستاندىق ءپاتريوتيزمدى قالىپتاستىرۋ ارقىلى ءاربىر جاستىڭ جۇرەك ۇنىمەن دە, كوڭىل سەزىمىمەن دە ءوز ەلىن دامىتۋ ىسىنە قاتىسۋ قاجەتتىگىن ۇعىنۋعا, مەملەكەت كەلەشەگى ءۇشىن بىرلەسە قىزمەت جاساۋ ازاماتتىق پارىز ەكەنىن كوكىرەككە تۇيۋگە ارنالىپ وتىر. وسى ماقساتتاعى ءىس-شارالار مەن مىندەتتەر جوعارى وقۋ ورىندارى اراسىندا ەلىمىز بويىنشا ءبىرىنشى رەت وتكىزىلگەن «جاڭا قازاقستاندىق پاتريوتيزمگە تاربيەلەۋدىڭ ماڭىزدى ماسەلەلەرى» رەسپۋبليكالىق عىلىمي-پراكتيكالىق كونفەرەنتسياسىندا ەكى كۇن بويى كەڭىنەن تالقىلاندى. ءبىلىم بەرۋ ورداسىندا ستۋدەنت جاستارعا بۇرىنعى ۇلگىلەردىڭ ءتالىمدى تاجىريبەسىن ەسكەرە وتىرىپ, جاڭا قازاقستاندىق ءپاتريوتيزمنىڭ اسىل مۇراتى – «ماڭگىلىك ەل» ورنىقتىرۋدا نىسالانعان وتانسۇيگىشتىك تاربيە بەرۋ جۇمىسىنىڭ جاڭا تەحنولوگياسىن جاساۋ قاتىسۋشىلار نازارىنا ۇسىنىلدى. ەلباسى «ءوز بويىمىزدا جانە جاس ۇرپاقتىڭ بويىندا جاڭا قازاقستاندىق ءپاتريوتيزمدى تاربيەلەۋىمىز كەرەك. بۇل ەڭ الدىمەن ەلگە جانە ونىڭ يىگىلىكتەرىنە دەگەن ماقتانىش سەزىمىن ۇيالاتادى» دەپ ايتقانداي, كوپۇلتتى مەملەكەتتىڭ جالپىۇلتتىق يدەولوگيالىق نەگىز جونىندە پارلامەنت ءماجىلىسىنىڭ دەپۋتاتتارى سۆەتلانا فەرحو, كامال بۇرحانوۆ, اباي تاسبولاتوۆ, جوو رەكتورلارى جانە تانىمال عالىمدار مەن ۇستازدار وي-تولعامدارىن ورتاعا سالدى. پاتريوتيزم ەل بىرلىگىنىڭ وزەگى بولسا, جاستار سونىڭ دىڭگەگى رەتىندە ءسوز قوزعالىپ, ولاردىڭ بويىنا وسىناۋ قاسيەتتى سەزىمدى ءسىڭىرۋ ماسەلەلەرى العا تارتىلدى. كونفەرەنتسياعا قاتىسۋشىلار قازاقستان رەسپۋبليكاسىنىڭ تۇڭعىش پرەزيدەنتى ءبىلىم العان اتالعان وقۋ ورنىندا ستۋدەنتتەرمەن كەزدەسىپ, سۇراقتارىنا جاۋاپ بەردى. ايقىن نەسىپباي, «ەگەمەن قازاقستان».