قوعام • 31 قاڭتار، 2023

«AMANAT» پارتياسىنىڭ كادرلىق رەسۋرسى جەتكىلىكتى – ەرلان قوشانوۆ

72 رەت كورسەتىلدى

«AMANAT» توراعاسى ەرلان قوشانوۆ پارتيانىڭ قازىرگى جۇمىسى جانە الداعى سايلاۋ ناۋقانىنا دايىندىق بارىسى تۋرالى كەڭەس وتكىزدى. ءىس-شاراعا ورتالىق اپپارات قىزمەتكەرلەرى، بەلسەندىلەر مەن وڭىرلىك فيليالداردىڭ باسشىلىعى قاتىستى، دەپ حابارلايدى Egemen.kz.

ەرلان قوشانوۆ الدىمەن پارتيالىقتاردى تىڭداپ، الداعى سايلاۋ ناۋقانىنا دايىندىق ماسەلەسى بويىنشا بىرقاتار مىندەت جۇكتەدى.

«بۇل سايلاۋعا «AMANAT» ۇلكەن دايىندىقپەن، زور سەنىممەن بارا جاتىر. كوپ جۇمىس اتقارىلىپ جاتىر. ءبىزدىڭ مۇمكىندىگىمىز مول. اقپاراتتىق جانە كادرلىق رەسۋرسىمىز جەتكىلىكتى. قالىپتاسقان ءداستۇرلى ەلەكتوراتىمىز، ۇلكەن تاجىريبەمىز بار. ەندىگى مىندەت – جۇمىستى دۇرىس ۇيىمداستىرىپ، قوعامدى ورتاق ماقسات جولىندا جۇمىلدىرۋ. پارتيا ەلدەگى جۇرگىزىلىپ جاتقان رەفورمالاردىڭ الدىڭعى شەبىندە بولۋى كەرەك. بۇل – ءبىزدىڭ باستى ماقساتىمىز»، دەدى ەرلان قوشانوۆ.

اتقارۋشى حاتشى ەلنۇر بەيسەنباەۆ ءوز بايانداماسىندا بۇگىنگى كۇنى ءماجىلىس پەن ماسليحاتتارعا كانديداتتاردىڭ ءتىزىمىن جاساۋ جانە 7 اقپاندا استانا قالاسىندا وتەتىن پارتيا سەزىنە دايىندىق جۇرگىزىلىپ جاتقانىن اتاپ ءوتتى.

پارتيانىڭ سايلاۋالدى باعدارلاماسىن جۇزەگە اسىرۋ قورىتىندىلارى تۋرالى VII سايلانعان ماجىلىستەگى پارتيا فراكتسياسىنىڭ دەپۋتاتى ەكاتەرينا سمىشلياەۆا حابارلادى.

«ەكى جىل ىشىندە 5 جىلعا قويىلعان مىندەتتەردىڭ ۇشتەن ءبىرى تولىق كولەمدە ورىندالدى. تابيعي گازبەن 140 ەلدى مەكەن قامتاماسىز ەتىلدى، 8،4 مىڭ شاقىرىم جەرگىلىكتى جول جوندەلدى، اۋىز سۋمەن قامتاماسىز ەتۋ بويىنشا 200-دەن استام جوبا ىسكە اسىرىلدى. 84 مىڭ ورىنعا لايىقتالعان مەكتەپكە دەيىنگى ۇيىمدار اشىلىپ، ونداعى كەزەك تولىق اۆتوماتتاندىرىلدى. جالپى ماجىلىستە كوتەرىلگەن بارلىق زاڭ جوبالارىنىڭ 99%-ى – «AMANAT» پارتياسى فراكتسياسىنىڭ باستامالارى»، دەدى ەكس-ماجىلىسمەن.

سونداي-اق پارتيانىڭ سايلاۋالدى ۋادەلەرىن ورىنداۋ اياسىندا 200 مىڭنان استام وقۋشى ورنىنا ارنالعان 502 مەكتەپ سالىندى. بۇعان قوسا، مونوقالالاردا، اۋدان ورتالىقتارىندا جانە اۋىلداردا 2 مىڭنان استام مەكتەپ جاڭعىرتىلدى. جوعارى وقۋ ورىندارى مەن كوللەدجدەردىڭ 20 مىڭنان استام ستۋدەنتى جاتاقحاناعا ورنالاستى.

ءوز كەزەگىندە پارتيا حاتشىسى ەلدار جۇماعازيەۆ «اۋىل اماناتى» جوباسىنىڭ ارالىق قورىتىندىسىن جاسادى. ول پارتيانىڭ بارلىق فيليالى اتالعان جوبانى جۇزەگە اسىرۋعا باعدارلانعانىن ايرىقشا اتاپ ءوتتى.

«پرەزيدەنتتىڭ سايلاۋالدى باعدارلاماسى اياسىندا «اۋىل اماناتى» جوباسى ىسكە قوسىلدى. جەرگىلىكتى اتقارۋشى ورگاندارمەن بىرلەسىپ ەلىمىزدىڭ بارلىق وڭىرىندە 300 قاناتقاقتى اۋىلدىق وكرۋگ تاڭداپ الىندى. بيىل رەسپۋبليكالىق بيۋدجەتتەن وسى ماقساتتا 52،4 ملرد تەڭگە ءبولىندى»، دەدى ەلدار جۇماعازيەۆ.

پارتيا مۇشەسى، بەلگىلى زاڭگەر باقىتجان بازاربەك «جەر اماناتى» كوميسسياسىنىڭ قىزمەتى جونىندە ايتتى.

«كوميسسيانىڭ ارالاسۋىمەن اۋىل شارۋاشىلىعى ماقساتىنداعى 3،2 ملن گەكتار جەر مەملەكەت مەنشىگىنە قايتارىلدى. كوميسسيانىڭ باستاماسىمەن اۋىل شارۋاشىلىعى مينيسترلىگى وزگە دە مەملەكەتتىك ورگاندارمەن بىرگە قايتارىلعان جەرلەردىڭ ينتەراكتيۆتى كارتاسىن ازىرلەدى. سونداي-اق كوميسسيا جۇمىس بارىسىندا ەل اۋماعىنداعى 3000-عا جۋىق ۇلەسكەردىڭ قۇقىعىن قورعادى»، دەدى ول.

قۇقىق قورعاۋشى ابزال قۇسپان كەڭەسكە قاتىسۋشىلاردى اتىراۋ وبلىسىندا قاناتقاقتى جوبا رەتىندە قولعا الىنعان «قۇقىقتىق كومەك» پارتيالىق باستاماسى تۋرالى حاباردار ەتتى.

ء«بىرىنشى كەزەكتە ءبىز اۋىلدىق جەرلەردەگى حالىققا كەڭەس بەردىك. سەبەبى قۇقىقتىق سيپاتتاعى ماسەلەلەردى شەشۋ كەزىندە قالا تۇرعىندارىنىڭ مۇمكىندىگى كوبىرەك. اتىراۋ وبلىسىنىڭ ءارتۇرلى اۋداندارىندا بارلىعى 100-دەن استام ادام قابىلداندى. ازاماتتاردى اليمەنت تولەۋ، تۇرعىن ءۇيدى جەكەشەلەندىرۋ، ەڭبەك داۋلارى ماسەلەلەرى تولعاندىرادى»، دەدى ول.

كەڭەسكە قاتىسۋشىلارعا پارتيانىڭ اتىراۋ وبلىستىق فيليالىندا ىسكە قوسىلعان «AMANAT Service» قاناتقاقتى جوباسىنىڭ ناتيجەسى جانە الداعى ۋاقىتتا «AMANAT»-تىڭ قولداۋىمەن وتەتىن ايەلدەر فورۋمىنا دايىندىق جۇمىسى تۋرالى مالىمەت بەرىلدى.

ۇقساس جاڭالىقتار