اسكەريلەر ۇشتوبە تۇرعىندارىن ورتتەن قۇتقاردى

بۇل وقيعا 20 قاڭتاردا بولعان. اسكەري قىزمەتشىلەردىڭ ەرجۇرەك قيمىلى تۋرالى مالىمەت بۇگىن عانا جەتىسۋ وبلىسى قاراتال اۋدانىنىڭ توتەنشە جاعدايلار قىزمەتى وكىلدەرىنىڭ اسكەري ءبولىم قولباسشىلىعىنا كەلىپ تۇسكەن حاتىنان بەلگىلى بولدى. وندا ولار ءورت كەزىندە شەشۋشى قادام جاساپ، ەرلىك كورسەتكەن كەلىسىمشارت بويىنش اسكەري قىزمەتشىلەرگە العىس بىلدىرگەن.

توتەنشە جاعداي كەزىندە اسكەريلەر مومىش ۇلى كوشەسىندەگى ءۇيدىڭ جانىنان ءوتىپ بارا جاتقان. وسى ساتتە جەكە عيماراتتا گاز باللونىنىڭ جارىلۋى سالدارىنان ءورت بولدى. كىشى سەرجانت داۋرەن جانىبەكوۆ، قاتارداعى جاۋىنگەرلەر راۋان اقكەمپىروۆ پەن ناۋرىز قارابەكوۆ وتقا ورانعان ۇيدەن ەكى جاس بالا مەن ايەلدى جانە ەرلى-زايىپتى قارت كىسىلەردى قاۋىپسىز جەرگە الىپ شىعادى.

وسى ۋاقىتتا قاتارداعى جاۋىنگەرلەر الىبەك شادەتوۆ پەن ءىلياس نيزامبەك ءوز ومىرلەرىن قاتەرگە تىگە وتىرىپ، باللوندى سىرتقا الىپ شىعىپ، بولۋى ىقتيمال جارىلىستىڭ الدىن العان.

بۇدان كەيىن قاتارداعى جاۋىنگەر الىبەك شادەتوۆ زارداپ شەككەندەردى اۆتوكولىكپەن ورتالىق اۋداندىق اۋرۋحاناعا جەدەل جەتكىزدى. قالعان اسكەري قىزمەتشىلەر ءورت ءسوندىرۋ بريگاداسى كەلگەنگە دەيىن ءتىلسىز جاۋدى اۋىزدىقتاپ، ءورتتى وقشاۋلاپ ۇلگەرەدى.

– ادامداردىڭ قيىنشىلىققا تاپ بولعانىن كورىپ، ءولىم قاۋپى بار ەكەنىن تۇسىنگەندىكتەن ءبىز باسقاشا ارەكەت ەتە المادىق. سىن ساتتە قىزمەت بارىسى مەن جاتتىعۋلاردا العان داعدىلارىمىز ىسكە قوسىلدى، – دەيدى قاتارداعى جاۋىنگەر الىبەك شادەتوۆ.

55078 اسكەري ءبولىمىنىڭ اسكەري قىزمەتشىلەرى ءورت بولعان وتباسىنىڭ قايعىسىنا بەي-جاي قاراماي، تۇرعىن ءۇيدى قالپىنا كەلتىرۋگە قولدان كەلگەنشە كومەك كورسەتۋدى ۇيعارىپ وتىر. ءبولىم قولباسشىلىعى ەرەكشە كوزگە تۇسكەن جاۋىنگەرلەردى ناگرادالارعا ۇسىندى.