ماردىمسىز قۇرىلىس باستاعان لاۋازىم يەلەرى جەمقورلىق بويىنشا جاۋاپقا تارتىلادى

ء«بىز قالانىڭ كەلبەتىن ساقتاپ قالۋىمىز كەرەك. استانادا الەمنىڭ ەڭ ۇزدىك ساۋلەت ۇلگىلەرى قولدانىلۋى كەرەك. بۇعان دەيىن قالانىڭ بىرىڭعاي ديزاين-كودى ازىرلەندى. بىراق بۇل قۇجات قاعاز جۇزىندە عانا قالدى»، دەپ اتاپ ءوتتى پرەزيدەنت.

مەملەكەت باسشىنىڭ ايتۋىنشا، قازىر ەلوردادا سالىنىپ جاتقان كەيبىر عيماراتتار ءبىر-بىرىمەن مۇلدە ۇيلەسپەيدى. قالانىڭ وڭتۇستىك-شىعىس اۋدانىندا سىرتقى سيپاتى سىن كوتەرمەيتىن، بەي-بەرەكەت سالىنعان نىساندار كوپ.

- «ارتەم» جانە «تۇلپار» ساۋدا ورتالىقتارىنىڭ ماڭىن دا رەتكە كەلتىرۋ كەرەك. اكىمدىك ناقتى شارالار قابىلداۋعا ءتيىس»، - دەپ قوستى ەل پرەزيدەنتى.

كەڭەس وتىرىسى بارىسىندا قاسىم-جومارت توقاەۆ قالانىڭ كەلبەتىن بۇزىپ تۇرعان الا-قۇلا جارنامالار كوبەيىپ كەتكەنىن دە ءسوز ەتتى.

«جارنامانىڭ بارلىعى تالاپقا ساي بولۋى كەرەك. سونداي-اق قالادا ورىنسىز قۇرىلىس جۇمىستارى كوبەيىپ كەتتى، ياعني ۇيلەردىڭ اراسىنا عيمارات سالىنا بەرەتىن بولدى. بۇل اسىرەسە، «مىڭجىلدىق» اللەياسىندا، سارايشىق، سىعاناق، تۇران، بەيسەكوۆ كوشەلەرىندە قاتتى بايقالادى. تۇرعىندارعا الەۋمەتتىك نىسان، ساياباق نەمەسە ويىن الاڭى سالىنادى دەپ ۋادە بەرىلەدى. الايدا، ول جەردە ءيىن تىرەسكەن عيماراتتار پايدا بولادى. مىسالى، «وليمپ پالاس-2» تۇرعىن-ءۇيىنىڭ اۋلاسىنداعى ويىن الاڭىنىڭ ورنىنا ءزاۋلىم كەڭسە سالىنعان. مۇنداي قۇرىلىستى ءبىرجولا دوعارۋ كەرەك. ايتپەسە، شەشىم قابىلداعان ءتيىستى لاۋازىم يەلەرى جەمقورلىققا بايلانىستى جاۋاپقا تارتىلادى. سەبەبى وسىنداي شەشىمدەردىڭ استارىندا قۇرىلىس كومپانيالارىنىڭ اكىمدىكتە جۇمىس ىستەيتىن ادامدارمەن بىرگە ازاماتتارىمىزدىڭ ىقىلاسىنا قارسى قابىلداعان ارەكەتتەرى جاتىر»، دەپ تۇيىندەدى قاسىم-جومارت كەمەل ۇلى.