«تاعى ءبىر ماڭىزدى ماسەلە – استانانىڭ كولىك جۇيەسىن دامىتۋ. اۆتوكولىك سانى جىل سايىن كوبەيىپ جاتىر. سول سەبەپتى, كولىك كەپتەلىسى وتە كۇردەلى ماسەلەگە اينالدى. بۇل, ءتىپتى, قالا تۇرعىندارىنىڭ اشۋ-ىزاسىن تۋعىزىپ وتىر.
ماسەلەن, ماڭگىلىك ەل داڭعىلى كەپتەلىستەن كوز اشپايدى. تاۋەلسىزدىك داڭعىلىندا سالىنىپ جاتقان كوپىردىڭ قۇرىلىسىن وسى جىلدىڭ سوڭىنا دەيىن اياقتاۋ قاجەت. سونىمەن قاتار, كىشى اينالما جولدىڭ قۇرىلىسى سوزىلىپ كەتتى. ونىڭ ۇستىنە, جاڭا تۇرعىن ءۇي كەشەندەرىن سالعاندا جول ماسەلەسى تولىققاندى ەسكەرىلمەي جاتىر.
ءبىر سوزبەن ايتقاندا, كولىك سالاسىن دامىتۋ جۇمىسى اقساپ تۇر», دەدى قاسىم-جومارت توقاەۆ ەلوردانى دامىتۋ ماسەلەلەرى جونىندەگى كەڭەس وتىرىسىندا.
وسى تۇستا پرەزيدەنت اتالعان ماسەلەمەن جۇيەلى تۇردە اينالىسۋعا شاقىردى.
«قالا جولدارىنىڭ جاي-كۇيى دە ءماز ەمەس. مىسالى, كەيبىر كوشەلەر جىل سايىن جوندەلەدى. بىراق كوكتەم شىققاندا جولدىڭ ساپاسى سىن كوتەرمەيدى. ال كەيبىرى مۇلدەم قاراۋسىز قالعان. بۇل جول سالۋ جانە جوندەۋ جۇمىستارى دۇرىس جۇرگىزىلمەيدى دەگەن ءسوز. ۇكىمەت مەن اكىمدىك ماسەلەنى ارنايى باقىلاۋىنا الۋ كەرەك. قاجەت بولسا, مەردىگەرلەردى اۋىستىرۋعا ءتيىس», دەدى ول.
