پاكىستانداعى جارىلىستان قازا تاپقانداردىڭ سانى 72-گە جەتتى

پوليتسيانىڭ مالىمەتىنشە، جارىلىس مەشىتتىڭ ورتالىق زالىندا ساعات 13.00-دە بولعان. قاۋىپسىزدىك قىزمەتكەرلەرىنىڭ ايتۋىنشا، تەروريست ناماز كەزىندە ءوزىن-ءوزى جارىپ جىبەرگەن. ساحيبزادا مەشىتىنىڭ يمامى نۇر ۋل امين دە جارىلىستان قازا تاپقان.

شابۋىل ءۇشىن جاۋاپكەرشىلىكتى تىيىم سالىنعان «تەحريك-ي-تاليبان پاكىستان» (تتپ) توبى ءوز موينىنا العان.

پەشاۆارداعى پوليتسيا بەكەتىنىڭ اۋماعىنداعى مەشىتتەگى جارىلىس قۇرباندارىنىڭ سانى 72 ادامعا دەيىن وسكەن. قۇتقارۋشىلار ءۇيىندى استىنان تاعى توعىز ءمايىتتى الىپ شىققان.

ۋاقىتشا باس مينيستر مۇحاممەد ازام حان 31 قاڭتاردى پروۆينتسيادا شابۋىلعا بايلانىستى ازا تۇتۋ كۇنى دەپ جاريالادى. مەملەكەتتىك تۋ بۇكىل جەردە تۇسىرىلەدى. ۋاقىتشا ۇكىمەت باسشىسى زارداپ شەككەن وتباسىلارعا كومەك كورسەتىلەتىنىن ايتتى.

«شابۋىلعا بايلانىستى تەرگەۋ ىستەرى جالعاسىپ جاتىر. ءبىز جانكەشتىنىڭ قايدان شىققانىن جانە ونىڭ قالاي كىرگەنىن بىلمەيمىز. پوليتسيا بولىمشەلەرىنىڭ ىشىندە وتباسىلىق ۇيلەر بار جانە شابۋىلداۋشى بۇل ايماقتا تۇرىپ جاتقان بولۋى مۇمكىن»، دەدى حايبەر-پاحتۋنحۆا پروۆينتسياسىنىڭ پوليتسيا باس ينسپەكتورى مواززام دجاح انساري.

كۆارتالدىڭ باس ينسپەكتورى بەرگەن حابارلاماعا سايكەس، قوناقتاردىڭ پەشاۆار پوليتسيا بولىمشەلەرىنە كىرۋىنە تىيىم سالىندى جانە ءتارتىپ بۇزىلعان جاعدايدا قاتاڭ شارالار قابىلدانادى.

اۋرۋحانانىڭ ءباسپاسوز حاتشىسى رەدينگ مۇحاممەد اسيم جارىلىستان كەيىن 157 جارالانعان ادام مەديتسينالىق مەكەمەگە جەتكىزىلگەنىن حابارلادى.

«44 ادامنىڭ دەنەسى دە اۋرۋحاناعا جەتكىزىلدى. قازىرگى ۋاقىتتا زارداپ شەككەندەردىڭ 65-كە جۋىعى رەدينگ اۋرۋحاناسىندا ەمدەلىپ جاتىر. ولاردىڭ كەيبىرەۋلەرىنىڭ جاعدايى وتە اۋىر، ال كوپشىلىگىنىڭ جاعدايى جاقسارىپ كەلەدى»، دەدى مۇحاممەد اسيم. جارالانعاندار مەن قازا تاپقانداردىڭ كوپشىلىگى پوليتسيا قىزمەتكەرلەرى.

بۇدان بۇرىن پەشاۆاردا مەشىتتەگى جارىلىستان 30-دان استام ادام قازا تاپقانى تۋرالى حابارلانعان بولاتىن.

ايتولعان ءجۇنىسحان،

ل.ن. گۋميلەۆ اتىنداعى ەۇۋ ستۋدەنتى